2 Korintoslylar 13 - Мукаддес Китап

13‑нҗи бап Соңкы дуйдурышлар

¹ Хәзир сизиң яныңыза үчүнҗи гезек баряндырын. Себәби Мукаддес Язгыларда «Әхли зат ики я-да үч шаядың гүвәси билен тассыклансын» дийип языландыр.

² Мен яныңыза икинҗи гезек баранымда гүнә эдйәнлере ве бейлекилере эййәм дуйдурыш берипдим. Инди яныңызда болмасам-да, дуйдурышымы гайталаярын: баранымда олары-да, бейлекилери-де гайгырмарын.

³ Себәби сиз Месихиң мен аркалы гүрлейәндигини субут эдйән делиллери талап эдйәрсиңиз ахырын. Месих сиз билен иш салшанда эҗиз дәлдир, Ол сизиң араңызда гүйчлүдир.

⁴ Иса Месих эҗизликде хача чүйленен болса-да, инди Худайың гудраты аркалы яшаяндыр. Биз хем Месихиң эҗизлигине шәрик болмак билен, сизиң угруңызда Худайың гудраты аркалы Месихиң яшайшына хем шәрикдирис.

⁵ Иманда мәкәм дуруп-дурмаянлыгыңызы билмек үчин, өзүңизи сынап гөрүң. Эйсем сиз Иса Месихиң араңыздадыгыны билмейәңизми? Я-да сиз сынагдан гечмейәнлерденми?

⁶ Бизиң сынагдан гечендигимизи билерсиңиз диен умыдым бар.

⁷ Биз сизиң яман ишлери этмезлигиңиз үчин Худая дога-дилеглер эдйәрис. Шейтмек билен, биз өзүмизи сынагдан гечен хөкмүнде гөркезмек исләмзок. Терсине, биз сынагдан гечмедик болуп гөрнәенимизде-де, сиз ягшы ишлери этсеңиз, шол етерликдир.

⁸ Чүнки хакыката гаршы чыкмага гайратымыз ёкдур, биз хакыкатың угрунда гайратлыдырыс.

⁹ Биз өзүмиз эҗиз, сиз-де гүйчли боланыңызда шатланярыс. Шонуң үчин-де, сизиң кәмиллешмегиңиз үчин дога-дилег эдйәрис.

¹⁰ Мен булары араңыза барманкам язярын. Мен араңыза баранымдан соң, Реббиң маңа берен ыгтыярыны уланып сизе ёвуз болмайын дийип язярын. Чүнки Реб маңа бу ыгтыяры вейран этмек үчин дәл-де, беркитмек үчин берендир.

Соңкы саламлар

¹¹ Шунлукда, эй, доганлар, шатланың! Догры ёла дүшмеги ниет эдиниң, айдянларыма гулак асың, бир пикирде болуң, парахат яшаң. Шонда сөйги ве парахатлык Худайы сизиң хемраңыз болар.

¹² Бири-бириңизи мәхирли огшап саламлашың. Худайың бәрдәки халкы сизе көп салам айдяр.

¹³ Реббимиз Иса Месихиң мерхемети ве Худайың сөйгүси хеммәңизе яр болсун! Мукаддес Рух билен якын гатнашыкда яшаң!