2 Korintoslylar 12 - Мукаддес Китап

12‑нҗи бап Павлуса гелен гөрнүшлер

¹ Хич пейдасы болмаса-да, магтанмагымы довам этдирмели болярын. Инди Ребден гелен гөрнүшлере ве аянлыклара гечейин.

² Мен Месихиң бир шәгирдини танаярын. Ол он дөрт йыл мундан озал гөклериң гөгүне әкидилди. Бу ахвал беденде я-да беденден дашарда болупмы – билемок, муны Худай билйәр.

³ Хава, мен шейле адамы танаярын. Ол хушундамы я гөрен гөрнүшиндеми – билемок, муны диңе Худай билйәр,

⁴ гараз, җеннеде әкидилйәр. Ол ерде сөз билен беян эдип болмаҗак аҗайып затлары, ынсана айтмага ругсат эдилмедик затлары эшидйәр.

⁵ Ине, мен шейле адам билен магтанарын. Өзүм бабатда диңе эҗизлигим болаймаса, башга магтанара задым ёк.

⁶ Эгер магтанмалы болаямда-да, акмагың эдиши ялы этмерин, хакыкаты айдарын. Эмма мен магтанмакдан сакланярын. Ёгса кимдир бири мени өз гөренинден я эшиденинден артыкмыкам өйдәймесин.

⁷ Өзүме шейле бейик ылхамларың берлендиги себәпли гопбамсырамаз ялы, маңа шейтаның бир илчиси, ягны бедениме эзъет бермек үчин бир тикен берилди.

⁸ Оны менден айырсын дийип, Реббе үч гезек ялбардым.

⁹ Эмма Реб шейле дийди: «Саңа берен мерхеметим бесдир, себәби Мениң гудратым эҗизликде кәмиллешйәндир». Шонуң үчин-де, Иса Месихиң гүйҗи менде месген тутсун дийип, өз эҗизликлерим барада хөвес билен магтанарын.

¹⁰ Шу себәпден мен Месихиң хатырасына эҗизликлере, сөгүнчлере, мәтәчликлере, ызарланмалара, мушакгатлара разыдырын. Чүнки мен эҗизкәм гүйчлүдирин!

Павлус коринтослылар барада алада эдйәр

¹¹ Мен магтанып, бир акмак ялы болдум. Йөне мени муңа сиз меҗбур этдиңиз-ә! Аслында мени сиз магтамалыдыңыз. Мен хич болаямда-да, өзлерини бейик сайян шол ресуллардан пес дәл ахырын.

¹² Хакыкы ресуллыгың нышанларыны араңыздакам аламатларда, мугҗызаларда ве гудратларда улы чыдамлылык билен гөркезендирин.

¹³ Мен сизе бейлеки йыгнаклардан кемтер гарадыммы? Хә, хава, мен сизе аграм салмадым-ов! Бу «адалатсызлыгым» үчин мени багышлавериң!

¹⁴ Ине, яныңыза гитмек үчин үчүнҗи гезек ёл шайымы тутярын. Мен сизе аграм салмарын, себәби мен задыңыза дәл-де, дидарыңыза зардырын. Галыберсе-де, чагалар эне-аталары үчин дәл-де, эне-ата чагалары үчин эмләк топламалыдыр.

¹⁵ Мен сизе диңе әхли задымы дәл, эйсем өзүми хем хөвес билен сарп эдерин. Мен сизи шейле сөййәрин! Онда нәме үчин сиз мени бейле аз сөййәрсиңиз?

¹⁶ Мениң сизе аграм салмандыгым билен ылалашярсыңыз. Эмма шонда-да мекирлик эдип, сизи хиле билен тутупдырын дийип, мени айыплаярсыңыз.

¹⁷ Йөне нәдип? Мен яныңыза иберен адамларым аркалы сизи хей-де өз бәхбидим үчин ишлетдимми?

¹⁸ Мен Титусдан сизиң яныңыза гитмегини хайыш этдим. Онуң яны билен имандакы доганымызы хем ибердим. Хей-де Титус сизи өз бәхбиди үчин ишлетдими? Эйсем биз шол бир Мукаддес Руха гөрә яшамаярысмы? Шол бир йөрелгә эермейәрисми?

¹⁹ Хә, сиз хениз-де өзүмизи сизиң өңүңизде аклаяндырыс өйдйәңизми? Ёк, биз Месихе дегишли болуп, Худайың хузурында сизе шуны айдярыс: эй, сөйгүли доганлар, бизиң әхли эдйәнлеримиз иманыңызы гүйчлендирмек үчиндир.

²⁰ Мен яныңыза баранымда, бири-биримиз бабатдакы тамамыз пуч чыкаярмыка дийип горкярын. Баранымда дава-җенҗел, гөриплик, гахар-газап, агзалалыклар, төхмет, гыбат, текепбирлик ве тертипсизлик гөрермикәм дийип горкярын.

²¹ Мен яныңыза баранымда, Худайым мени өңүңизде песелдеринден горкярын. Озал гүнә эдип, эден харамлыклары, зыналары ве азгынлыклары үчин тоба этмедиклериң көпүси зерарлы яс тутмалы болармыкам дийип горкярын.