2 Korintoslylar 11 - Мукаддес Китап

11‑нҗи бап Павлус ве галп ресуллар

¹ Кәшгә мениң акылсызлыгыма аз-кем гечиримлилик этседиңиз! Вах, гечиримлилик эдйәңиз-ле!

² Мен сизи Худайың габанҗаңлыгы билен габаняндырын. Себәби мен сизи еке-тәк бир Йигиде, ягны Месихе адаглап, сизи Оңа пәк гыз хөкмүнде ниетледим.

³ Йөне йыланың Хов энәни кеззаплык билен алдайшы ялы, сизиң-де алданмагыңыздан горкярын. Мен пикирлериңизиң булашдырылып, Месихе болан пәк садыклыгыңыздан айрылармыкаңыз дийип горкярын.

⁴ Чүнки кимдир бири гелип, бизиң вагыз эденимизден башга Исаны вагыз эденде, сиз оңа гечиримлилик эдйәңиз-ә! Вах, сиз кабул эден Мукаддес Рухуңыздан башга бир рухы я-да башга «хош хабары» кабул этмәге-де тайяр ахырын!

⁵ Йөне мен сизиң шол «бейик ресулларыңыздан» асла кем дәлдирин!

⁶ Мен гепе чепер болмасам-да, билиме байдырын. Биз муны әхли затда сизе айдың гөркезендирис.

⁷ Мен сизи бейгелтмек үчин, өзүми песелтдим, Худайың Хош Хабарыны мугт вагыз этдим. Эйсем шейле этмек билен гүнә галайдыммыкам?

⁸ Мен сизе хызмат этмек үчин, бейлеки йыгнаклардан хемаят пулуны алып, олары талан ялы болдум.

⁹ Мен араңызда болуп, мәтәчлик чекенимде-де, сизиң хич бириңизе аграм салан дәлдирин. Себәби герек затларымың барыны Македониядан гелен доганларым үпҗүн этдилер. Мен хайсыдыр бир затда сизе аграм салмакдан сакландым, мундан бейләк-де аграм салмарын.

¹⁰ Месихиң мендәки хакыкатындан ант ичйәрин: Ахая себитлеринде яшаянларың бири-де мени бу магтанмадан махрум эдип билмез!

¹¹ Эйсем мен нәме үчин сизе аграм салмадым? Сизи сөймейәндигим үчинми? Ёк, сизи сөййәндигиме Худай шаятдыр.

¹² Мен мундан бейләк-де хәзирки эдйәнлерими довам эдерин. Себәби мен өзлерини биз билен дес-дең ишлейәндир өйдүп, магтанмага пурсат агтарянлара тутарык бермерин.

¹³ Шейле адамлар галп ресуллардыр. Олар Месихиң ресулларының кешбине гирйән кеззап ишгәрлердир.

¹⁴ Гең галып отурасы зат ёк, себәби шейтаның өзи-де нур сачян перишдәниң кешбине гирип билйәндир!

¹⁵ Шоңа гөрә, онуң үлпетлериниң-де догрулык хызматкәрлериниң кешбине гирмеги гең зат дәлдир. Йөне оларың соңы эден ишлерине гөрә болар.

Павлус өз мушакгатлары билен магтаняр

¹⁶ Ене-де гайталаярын: мени акмак саймаң! Эгер сайян болсаңыз, мени хем бир акмак хөкмүнде кабул эдиң-де, бираз өвүнмәге ругсат эдиң.

¹⁷ Элбетде, шинди айтҗакларым Ребден дәл, мен бир акмак кимин магтанҗакдырын.

¹⁸ Хава, менем магтанып гөрейин-ә, себәби бу дүнйәниң адамлары өвүнмеги ерликли хасаплаярлар-а!

¹⁹ Чүнки сиз акмаклара чыдап, олара шейле гечиримлимишиңиз-ә!

²⁰ Хава, сиз гул эдилйәндигиңизе, хакыңызың ийилйәндигине, өзүңизе зулум эдилйәндигиңизе, текепбирлере, шапбатлара шейле чыдамлы ахырын!

²¹ Утансам-да, шуны боюн алярын: биз сизден асгын гелип, сиз ялы болуп билмәнмишик! Шунлукда, сизиң үчин хениз-де акмак болмак билен, шуны диййәрин: бейлекилериң магтанмага милт эденлерине мен-де милт эдйәрин.

²² Олар еврейми? Мен-де еврейдирин! Олар ысрайыллымы? Мен-де ысрайыллыдырын! Олар Ыбрайымың неслими? Мен-де Ыбрайымың неслидирин!

²³ Месихиң хызматкәрлерими? Акмаклыга салып шуны диййәрин: мен олардан-да артыкдырын! Мен олардан көп зәхмет чекдим, зынданлара-да олардан көп дүшдүм. Енҗилмекде-де олардан көп урлуп-енҗилдим. Олара гараныңда аҗал билен хас көп гезек йүзбе-йүз болдум.

²⁴ Яхудылардан бәш гезек отуз докуз гамчы ийдим.

²⁵ Үч гезек таякландым, бир гезек дашландым, үч гезек гәми хеләкчилигине учрадым, бир гиҗе-гүндизими ачык деңизде гечирдим.

²⁶ Мен элмыдама ёлда болмак билен, деряларда ховп-хатарлара учрадым; гаракчылардан, өз илимден, башга миллетлерден яңа ховп астында гездим. Шәхерде, чөлде, деңизде, догансумакларың арасында ховп-хатарлара учрадым.

²⁷ Мен агыр зәхмет чекдим, гара ишде ишледим, энчеме гиҗәни укусыз гечирдим; ач-сувсузлыгың нәмедигини билйәрин; ачлыкда гездим, совукда ярым-ялаңач галдым.

²⁸ Булардан башга-да, әхли йыгнаклар барадакы гайгы-аладалар гүнде үстүми басмарлаяр.

²⁹ Кимдир бири эҗизләнде, мен хем эҗизлемейәринми? Кимдир бири гүнә итеклененде, йүрек-багрым көймейәрми?

³⁰ Эгер магтанмалы болайсам-да, өз эҗизлигим билен магтанарын.

³¹ Бакы шан-шөхрата мынасып Худай ве Реббимиз Исаның Атасы мениң ялан сөзлемейәндигими билйәндир.

³² Дамаск шәхеринде Арета патышаның велаят хәкими мени туссаг этмек үчин, шәхери гөзегчилик астында саклаярды. Эмма мени себеде салып, шәхериң диварындакы пенҗиреден ашак салладылар. Шейдип, онуң элинден халас болдум.