2 Korintoslylar 10 - Мукаддес Китап

10-нҗы бап Павлус дүнйәниң йөрелгелери боюнча сөвешмейәр

¹ Мен, Павлус, хава, араңыздакам юмшак, сизден узакдакам берк хасаплаян шол Павлусыңыз, Иса Месихиң юмшаклыгы ве мәхрибанлыгы билен хайыш эдип,

² ялбарярын: сизе баранымда, мени сизиң билен айгытлы ве чүрт-кесик гүрлешмәге меҗбур этмәң. Хава, мен өзүмизи бу дүнйәниң йөрелгелерине гөрә гезйәндир өйдйәнлер билен шейле гүрлешип билйәрин. Йөне өзүңиз билен шейле гүрлешмәге меҗбур этмәң.

³ Биз бу дүнйәде яшасак-да, онуң йөрелгелери боюнча сөвешмейәрис.

⁴ Бизиң сөвеш ярагларымыз ынсан яраглары дәл-де, Худайың гүйчли ярагларыдыр. Биз олар билен галалары йыкып, хер ялан пикири пуҗа чыкарярыс.

⁵ Бу яраглар билен Худай барадакы билиме гаршы чыкян хер белентлиги юмурярыс, хер пикири есирлиге алып, оны Иса Месихе табын эдйәрис.

⁶ Сизиң Иса Месихе бүтинлей табындыгыңыза гөз етиренимизде, хер битабынлыга җеза бермәге тайярдырыс.

⁷ Месе-мәлим гөрнүп дурана середиң-ә! Эгер кимдир бириниң өзүниң Месихе дегишлидиги барада берк ынамы бар болса, гой, шуңа дүшүнсин: биз хем эдил шонуң ялы Месихе дегишлидирис.

⁸ Реббиң бизе берен ыгтыяры бабатда хас көпрәк өвнәемде-де, утанмарын. Себәби бу ыгтыяр иманыңызы юмурмак үчин дәл-де, оны беркитмек үчин берлендир.

⁹ Йөне сизи диңе өз хатларым билен горкузҗак болярмыкам өйтмәң.

¹⁰ Кәбир адамлар: «Павлусың хатлары ёвуз ве гүйчли болса-да, онуң өзи арамыза геленде эҗиз гөрүнйәр. Онуң гепи-де дерексиз!» дийип айдярлар.

¹¹ Шейле диййән адамлар, гой, шуны билип гойсунлар: биз узакдакак өз хатларымызда нәхили болсак, сизиң араңыздакак хем шолар ялы боларыс.

¹² Биз өзлерини махабатландырянларың кәбирлери билен өзүмизи бир хатарда гоймага я деңемәге милт-де эдип билемзок. Олар өзлерини өлчег нусгасыдырыс дийип, бири-бирлерини шоңа гөрә өлчейәрлер. Вах, нәхили наданлык!

¹³ Биз ченденаша дәл-де, Худайың өзүмизе беллән чәклеринде магтанярыс. Бу чәклериң ичине сиз хем гирйәнсиңиз.

¹⁴ Биз өзүмизе белленилен чәкден чыкмаярыс. Эгер сизе бармадык болсадык, онда белленен чәкден чыкып, ченденаша магтандыгымыз боларды. Йөне биз Иса Месихиң Хош Хабарыны сизе-де етирдик ахырын!

¹⁵ Биз өз чәгимизден дашарда башгаларың эден иши билен-де магтанмаярыс. Терсине, сизиң иманыңыз гитдигисайы өсүп, сизиң араңыздакы ишимиз хас-да яйбаңланар дийип умыт эдйәрис.

¹⁶ Шонда биз сизиң себитлериңизден хас узакларда-да Хош Хабары вагыз эдип билерис. Себәби биз башганың чәклериндәки тайяр ишлер билен өвүнмек ислемейәрис.

¹⁷ Өвүнйән диңе Реб билен өвүнсин!

¹⁸ Чүнки өзүни өзи бейгелдйән дәл-де, Реббиң бейгелдйәни арзылыдыр.