2 Korintoslylar 1 - Мукаддес Китап

1‑нҗи бап

¹ Худайың ырадасы билен Иса Месихиң ресулы болан мен Павлусдан ве доганымыз Тимотеосдан Худайың Коринтосдакы йыгнагына, шейле-де тутуш Ахая велаятындакы Худайың халкының барына догайы салам!

² Атамыз Худайың ве Реббимиз Иса Месихиң мерхемети ве парахатлыгы, гой, сизе яр болсун!

Теселли берйән Худай

³ Әхли теселлилериң гөзбашы болан мерхеметли Ата Худая, Реббимиз Иса Месихиң Худайына ве Атасына алкыш болсун!

⁴ Худай әхли мушакгатларымызда бизе теселли берйәр. Биз хем өз гезегимизде хер хили мушакгатлара учран адамлара Худайдан алан теселлимиз аркалы теселли берйәрис.

⁵ Чүнки Иса Месихиң гөргүлериниң дурмушымызда артдыгысайы, Ол аркалы Худайдан алян теселлимиз-де артяндыр.

⁶ Эгер биз гөргүлер гөрйән болсак, бу сизиң теселли тапмагыңыз ве халас болмагыңыз үчиндир. Худай бизе теселли берйән болса, бу бизиң-де сизе теселли бермегимиз үчиндир. Сиз хем биз ялы гөргүлер гөрениңизде, шу теселлимизден теселли тапып, мушакгатларың барына дөз гелерсиңиз.

⁷ Сизе баглаян умыдымыз беркдир, себәби сизиң диңе мушакгатларымыза дәл, эйсем теселлимизе-де шәрикдигиңизи билйәрис.

⁸ Эй, доганлар! Бизиң Азия велаятында башымыза инен күлпетлерден сизиң-де хабарлы болмагыңызы ислейәрис. Бу күлпетлер чекип-чыдардан җуда агырды, биз дири галарыс-да өйтмедик.

⁹ Хава, аҗал бизиң якамыздан тутандыр өйтдүк. Бу ягдай бизиң өзүмизе дәл-де, диңе Худая, мерхумлары дирелдйән Худая бил багламагымыз үчин йүзе чыкыпды.

^10-11 Худай бизи аҗалың пенҗесинден халас этди ве ене-де халас эдер. Бизиң үчин эдйән дога-дилеглериңиз аркалы Онуң бизи ене-де халас этҗекдигине умыт баглаярыс. Шонда көплериң дога-дилегине җогап хөкмүнде бизе берлен мерхемет үчин көп адамлар Худая шүкүр эдерлер.

Павлус ниетини үйтгедйәр

¹² Ине, биз шуңа буйсанярыс: биз хер кес, ылайта-да сиз бабатда Худайың берен гөвначыклыгы ве пәк йүреклилиги билен херекет эдйәрис. Биз муны ынсан даналыгына дәл-де, Худайың мерхеметине даянып эдйәрис. Муңа бизиң ынсабымыз-да шаятдыр.

^13-14 Бизиң сизе язанларымызда окап дүшүнмез ялы гүмүртик зат ёк. Сиз бизе хәзир бөлеклейин дүшүнйәрсиңиз, йөне соңра долы дүшүнерсиңиз диен умыдым бар. Онсоң Реббимиз Иса Месихиң гелҗек гүнүнде бизиң сизе буйсанышымыз ялы, сиз-де бизе буйсанып билерсиңиз.

¹⁵ Бу бабатда ынамым болансоң, яныңыза ики гезек барып, шатлыгыңызы артдырмакчыдым.

¹⁶ Соңра Македония гидип, ондан соң ене сизе доланмакчыдым. Ол ерден Яхудыя юрдуна мени ёла саларсыңыз диен ниетим барды.

¹⁷ Эйсем мен өз ниетләнлеримде дурнуксызлык этдимми? Я-да булары ниетләнимде бу дүнйәниң адамлары ялы икигөвүнли болуп, илки «хава, хава», соңра-да «ёк, ёк» диййәринми?

¹⁸ Худай ынамдардыр. Ол бизиң айданларымызың шол бир вагтың өзүнде хем «хава», хем-де «ёк» дәлдигине шаятдыр.

¹⁹ Мен, Силван ве Тимотеос дагы араңызда Худайың Оглы Иса Месих барада вагыз этдик. Бизиң вагыз эден Иса Месихимиз хем «хава», хем «ёк» диен дәлдир. Худай Иса Месих аркалы «хава» диййәндир.

²⁰ Чүнки Худайың берен вадаларының әхлиси Иса Месих аркалы «хавадыр». Худайы шөхратландырып айдян «омын» сөзүмиз-де Иса Месих аркалыдыр.

²¹ Худай бизи сиз билен бирликде Иса Месихе баглап, иманда берк дурмагымыза ярдам берйәр. Ол бизи сечип-сайлады-да,

²² мөхүрләп, буларың кепили хөкмүнде йүрегимизе Мукаддес Рухуны берди.

²³ Мен сизи гынандырмайын дийип, Коринтоса доланып бармадым. Мунуң хакыкатдыгына Худай-да шаятдыр.

²⁴ Биз сизиң иманыңызың үстүнден хөкүм сүрмекчи боламзок, терсине, шатлыгыңызың хатырасына сиз билен хызматдашлык эдйәрис. Чүнки сиз иманда берк дурсуңыз.