2 Ёханна 1 - Мукаддес Китап

1‑нҗи бап Саламлар

¹ Мен яшулудан Худайың сайлап-сечен хорматлы зенанына ве онуң чагаларына догайы салам! Мен сизи чын йүрекден сөййәрин, диңе мен дәл, эйсем, хакыкаты билйәнлериң хеммеси-де сизи сөййәр.

² Себәби хакыкат калбымыза орнандыр ве ол эбедилик бизиң билен болар.

³ Атамыз Худайың ве Оглы Иса Месихиң мерхемети, рехим-шепагаты, парахатлыгы хакыкат ве сөйги аркалы бизе яр болсун!

Хакыкат ве сөйги

^4-5 Эй, хорматлы зенан! Атамыз Худайың буйрушы ялы, бирнәче перзентлериңиң хакыката эерип яшаяндыгыны гөрүп, гаты шат болдум. Инди саңа бир хайышым бар: бири-биримиз билен сөйгүде яшалың. Мен саңа бир тәзе буйрук язамок, бу илкибашдан бизе мәлим буйрукдыр.

⁶ Сөйги – бу Худайың буйругына гөрә яшамакдан ыбарат. Овал-башдан эшидишиңиз ялы, Худай бири-бириңизи сөйүп яшамагы буюрды.

⁷ Энчеме яланчылар дүнйә яйрады. Олар Иса Месихиң ынсан болуп гелендигини инкәр эдйәрлер. Бейле адамлар яланчыдыр, Месихиң душманыдыр.

⁸ Шонуң үчин әгә болуң. Чекен зәхметиңизи еле совурман, онуң рәхнетини долы гөрер ялы, берк дуруң.

⁹ Ёлуны урдурып, Месих хакдакы таглыматдан дашлашан адамда Худай ёкдур. Эмма бу таглымат боюнча яшаян адамда Ата-да, Огул-да бардыр.

¹⁰ Эгер кимдир бири яныңыза геленде, Месих хакдакы таглыматы гетирмесе, оны өйүңизе салмаң, оңа салам хем бермәң.

¹¹ Оңа салам берен онуң эрбет ишлерине шәрик боляндыр.

Хошлашык сөзи

¹² Сизе айтмалы затларым көп, йөне олары сыя, кагыз билен язасым геленок. Муңа дерек яныңыза барып, сизиң билен йүзбе-йүз гүрлешерис диен умыдым бар. Шонда шатлыгымыз долуп-дашар.

¹³ Худай тарапындан сайланып-сечилен уяңың чагалары хем сизе салам ёллаярлар.