1 Timoteos 6 - Мукаддес Китап

6-нҗы бап Гуллар барадакы үндевлер

¹ Худайың адына ве өвредйән таглыматымыза дил етмез ялы, гулчулык боюнтырыгы астындакыларың бары өз хоҗайынларыны хормата мынасып сайсын.

² Хоҗайынлары иманлы болан гуллар: «Инди биз догандырыс» дийип, өз хоҗайынларына гелеңсизлик этмесинлер, терсине, өңкүден-де ыхласлы хызмат этсинлер. Себәби оларың хоҗайынлары имандакы эзиз доганлары болуп, ягшылык эдйәндирлер. Буларың барыны өврет ве үнде.

Ялан мугаллымлар барада дуйдурышлар

³ Эгер кимде-ким мениң өвреденлеримден өзгесини өвретсе, Реббимиз Иса Месихиң сагдын таглыматыны ялан сайып, Худайың йөрелгесине лайык болан таглыматы оңламаян болса,

⁴ онда ол хич зада дүшүнмейән текепбирдир. Ол җеделлешмек ве сөзлериң манысы барада давалашмак кеселине ёлугып, гөриплигиң, агзалалыгың, төхметлериң хем-де эрбет шүбхелериң дөремегине себәп боляр.

⁵ Булар зерарлы пикирлери заяланан адамларың арасында агзалалыклар йүзе чыкяр. Олар хакыкаты ёюп, Худайың йөрелгеси газанч ёлудыр өйдйәрлер.

⁶ Хакыкатда болса, барыңа кайыл болуп, Худайың йөрелгесине эермек улы газанчдыр.

⁷ Чүнки биз дүнйә хич зат гетирмедик. Ондан хич зат әкидип билмеҗегимиз хем месе-мәлимдир.

⁸ Шонуң үчин-де, ийҗегимизиң, гейҗегимизиң бардыгына шүкүр этмелидирис.

⁹ Баямакчы болянлар болса сынага дүшүп, акмак ве эрбет хөвеслериң торуна чолашяндырлар. Бу хөвеслер олары вейранчылыга ве хеләкчилиге учрадяндыр,

¹⁰ себәби пул хөвеси әхли бела-бетериң көрүгидир. Кәбир адамлар онуң ышкына дүшүп, имандан азашдылар, өзлерини көп гөргүлере сезевар этдилер.

Павлусың Тимотеоса соңкы үндевлери

¹¹ Эмма сен, эй, Худайың адамы, бу затлардан гач. Догрулык, таквалык, иман, сөйги, сабыр-такатлык ве юмшаклык йөрелгелерине эер.

¹² Иман угрундакы гөрешде эдерменлик билен гөреш ве бакы яшайшы макәм тут. Худай сени муңа чагырды, сен хем иманыңы көп шаядың өңүнде долы ыкрар эденсиң.

¹³ Әхли зада яшайыш берйән Худайың хузурында ве Понтий Пилатың өңүнде диңе Худая бил баглаяндыгыны тассыклан Иса Месихиң хузурында саңа шулары табшырярын:

¹⁴ Реббимиз Иса Месих гелйәнчә, өзүңе буйруланлары долы ве биркемсиз берҗай эт.

^15-16 Худай бейик ве еке-тәк Хөкүмдардыр, Ол шаларың Шасы, таңрыларың Таңрысы, өлмезлигиң еке-тәк Эесидир. Ол ынсаның гөзүни гамашдырян нурда яшаяр, Оны хич бир ынсан гөрмеди, гөрүп-де билмез. Ол Иса Месихи Өз беллән вагтында иберер. Хормат ве гудрат бакы Онуңкы болсун! Омын.

¹⁷ Бу дөврүң байларына текепбир болмазлыгы табшыр. Гой, олар ыгтыбарсыз, вагтлайын байлыга дәл-де, багтыяр яшамагымыз үчин хер зады болелин етирйән Худая бил багласынлар.

¹⁸ Олара ягшылык этмеги, ягшы ишлер, сахылык ве җомартлык хазынасыны топламагы буюр.

¹⁹ Шейле хазына оларың гелеҗегиниң берк биняды болуп, хакыкы яшайша етирер.

²⁰ Эй, Тимотеос, өзүңе ынанылып берлени гора. Бош гүррүңлерден ве «билим» сайылян гапма-гаршы пикирлерден йүз өвүр.

²¹ Себәби кәбир адамлар бу ялан билиме улашып, имандан азашандырлар. Худайың мерхемети, гой, сизе яр болсун!