1 Timoteos 5 - Мукаддес Китап

5‑нҗи бап Дул аяллар барадакы үндевлер

¹ Гарры адамлары гөдек язгарма-да, олара өз атаң кимин гарап, сыпайылык билен өвүт-үндев бер. Яш йигитлере өз доганларың ялы,

² гарры аяллара өз энең ялы, яш аяллара өз аял доганларың ялы гарап, олара пәк йүрекден өвүт-үндев бер.

³ Ялңыз галан дул аяллары сыла.

⁴ Эмма дул аялың чагалары я агтыклары бар болса, гой, олар онуң аладасыны этсинлер. Гой, олар озал өзлери барада алада эден эне-аталарына хормат гойсунлар. Чүнки бу Худайың халаяныдыр.

⁵ Ялңыз галан дул аял әхли умыдыны Худая баглаяндыр. Худайдан ярдам сорап, гиҗе-гүндиз дилег эдйәндир.

⁶ Эмма айшы-эшрет чекйән дул аялың өзи дири болса-да, рухы өлүдир.

⁷ Шонуң үчин-де, дул аялларың мүйнсүз болары ялы, олара бу язан табшырыкларымы буюр.

⁸ Кимде-ким өз доган-гарындашларының, ылайта-да өз машгаласының аладасыны этмейән болса, имандан дәндигидир. Шейле адам имансыздан хем бетердир.

⁹ Дул аял алтмыш яшдан гечен болса, өмрүнде диңе бир гезек дурмуша чыкан болса, йыгнак онуң адыны дуллар санавына язсын.

¹⁰ Шейле дул аял ил арасында өз ягшы ишлери билен таналмалы: чагаларыны кемала гетирен, мыхмансөер, имандакы доганларына хызмат эден ве мушакгат ичиндәкилере ярдам берен, умуман, элмыдама ягшылык этмәге ымтылян болмалыдыр.

¹¹ Яш дул аялларың адыны бу санава гошма. Себәби оларың тен хесери Месихе болан садыклыгындан үстүн гелсе, дурмуша чыкмак исләрлер.

¹² Шонда озал Месихе эден вадаларыны унудандыклары зерарлы, олар җеза сезевар боларлар.

¹³ Мундан башга-да, олар өйден-өе айланып, бикәр гезмәге эндик эдерлер. Бикәрликлери билен хем чәкленмән, гелшиксиз геплери агза алып, башгаларың ишине гатышян гыбаткешлер боларлар.

¹⁴ Шонуң үчин-де, мен яш дул аялларың дурмуша чыкып, чага догурмакларыны ве өй ишлерине гүмра болмакларыны үндейәрин. Шонда душманларымызың олара мыҗабат атмага тутарыгы болмаз.

¹⁵ Себәби оларың кәбири шейтаның гепине гулак габардып, эййәм ёлдан чыкдылар.

¹⁶ Эгер иманлы аялың гарындашларының арасында дул галан аяллар бар болса, гой, ол шоларың аладасыны этсин, йыгнага аграм салмасын. Йыгнак болса мадды көмегини мәтәчлик чекйән ялңыз дул аяллара берсин.

Йыгнак ёлбашчылары барадакы үндевлер

¹⁷ Йыгнагы оңат доландырян ёлбашчылар, ылайта-да вагыз эдип, таглыматы өвретмекде зәхмет чекйәнлер, ики эссе хормата лайык гөрүлсин.

¹⁸ Чүнки Мукаддес Язгылар: «Харман дөвйән өкүзиң агзыны багламаң», «Ишгәр өз хакына мынасыпдыр» диййәр.

¹⁹ Ики я үч шаят болмаса, йыгнагың ёлбашчысы хакдакы айыпламаны кабул этме.

²⁰ Гүнәли чыканлары болса көпчүлигиң өңүнде паш эт. Гой, бу бейлекилере хем сапак болсун.

²¹ Шу буйруклары берҗай эдениңде, меселәниң аныгына етмән, хич кими язгарма, тарапгөйлик этме. Ине, шуларың барыны Худайың, Иса Месихиң ве сайланан перишделериң өңүнде саңа берк табшырярын.

²² Кимдир бириниң гүнәсине шәрик болмаз ялы, онуң башына эл гоюп, оны хызмата беллемәге ховлукма. Өзүңи пәк сакла.

²³ Мундан бейләк диңе сув ичмән, аз-кем шерап хем ич. Бу ашгазаныңа ве йыгы-йыгыдан гайталанян нәхошлугыңдан сапланмага ярдам берер.

²⁴ Кәбир адамларың гүнәлери гөз-гөртеле болуп, олар кыямат гүнүнден өң әшгәрдир. Кәбирлериниң гүнәси болса вагтың гечмеги билен әшгәр боляр.

²⁵ Шонуң ялы, оңат ишлериңем кәбирлери әшгәр, кәбирлери болса әшгәр дәлдир. Йөне әшгәр дәллери хем иру-гич мәлим боляндыр.