1 Timoteos 4 - Мукаддес Китап

4‑нҗи бап Тимотеоса берилйән үндевлер

¹ Мукаддес Рух ахыркы гүнлерде кәбир адамларың имандан дәнип, аздырыҗы рухлара ве җынларың таглыматларына эерҗекдиклерини айдың айдяр.

² Бу таглыматлар ынсапларыны ювудан икийүзли яланчылар тарапындан яйрадыляр.

³ Олар өйленмеги, дурмуша чыкмагы гадаган эдйәрлер. Худайың ярадан нәз-ныгматларының кәбирини иймезлиги буюрярлар. Йөне Худай бу нәз-ныгматлары хакыкаты билйән иманлыларың шүкүр билен иймеклери үчин яратды ахырын.

⁴ Худайың ярадан затларының әхлиси говудыр. Шүкүр билен кабул эдилен хер зат асла рет эдилмели дәлдир.

⁵ Себәби Худайың сөзи ве дога-дилег аркалы кабул эдилен иймит Худайың назарында халалдыр.

⁶ Эй, оглум, сен булары доганлара өвретсең, өз эерен иманың барадакы хакыкат таглыматының сөзлери билен етишдирилерсиң. Шейдип, Иса Месихиң оңат хызматчысы боларсың.

⁷ Худайың халамаян геплерине ве кемпир эртекилерине улашма-да, говусы, Худайың ёлунда түргенлеш.

⁸ Бедени түргенлешдирмегиң пейдалы тараплары бардыр. Йөне өзүңи Худайың ёлунда түргенлешдирмек хемметараплайын пейдалыдыр. Себәби мунда хәзирки ве гелҗекки яшайшың вадасы бардыр.

⁹ Бу вада ыгтыбарлыдыр, хер җәхтден кабул эдерликдир.

¹⁰ Чүнки биз хемме адамларың, ылайта-да иманлыларың Халасгәри болан дири Худая бил багламак билен, шол ваданың хатырасына зәхмет чекип, ыхлас эдйәрис.

¹¹ Буларың барыны буюр ве өврет.

¹² Яшдыгың үчин саңа хич ким әсгермезлик этмесин. Сен хем сөзде, яшайышда, сөйгүде, иманда ве пәкликде иман гетиренлере гөрелде бол.

¹³ Мен барянчам, йыгнага Мукаддес Язгылары окамак, өвүт-несихат этмек ве өвретмек билен мешгул бол.

¹⁴ Пыгамберлик сөзи аркалы ве йыгнак ёлбашчыларының сениң үстүңе эл гоймагы билен өзүңе берлен пешгеши әсгермезлик этме.

¹⁵ Бу ишлерде ыхласлы бол. Иманда өсүшиңи хеммелер гөрер ялы, җан-тенден ыхлас эт.

¹⁶ Яшайыш йөрелгәңе ве өвредйән таглыматыңа үнс бер. Бу ишлери эрҗеллик билен амал эт. Шонда сен өзүңи-де, диңлейҗилериңи-де халас эдерсиң.