1 Timoteos 1 - Мукаддес Китап

1‑нҗи бап

¹ Халасгәримиз Худайың ве умыдымыз болан Иса Месихиң буйругына гөрә Онуң ресулы мен Павлусдан

² Тимотеоса догайы салам! Эй, Тимотеос, сен өз иманың аркалы маңа хакыкы огул болансың. Гой, Атамыз Худайың ве Реббимиз Иса Месихиң мерхемети, рехим-шепагаты, парахатлыгы саңа яр болсун!

Ялан таглыматлардан әгә болуң!

³ Мен Македония угранымда, Эфес шәхеринде галмагыңы хайыш эдипдим. Сен ол ердәки адамларың кәбирине ялан таглыматлары яйратмазлыгы буюр.

⁴ Гой, олар гадымы роваятлара, түкениксиз несил шеҗерелерине йыкгын этмесинлер. Булар дава-җенҗеллериң дөремегине себәп болуп, Худайың табшырыгының иман аркалы амала ашырылмагына пәсгел берйәндир.

⁵ Буйругымың эсасы максады иманлылара бири-бирини сап йүрекден, пәк выждандан, хакыкы имандан дөрейән сөйги билен сөймегине ярдам бермекдир.

⁶ Кәбир адамлар мундан дәнип, ховайы гүррүңлере баш урдулар.

⁷ Олар Мукаддес Кануны өвретмекчи болярлар, йөне не өз айдянларына, не-де вагыз эдйән затларына дүшүнйәрлер.

⁸ Биз Кануның оны догры уланянлар үчин ягшыдыгыны билйәрис.

⁹ Мундан башга-да, бу Кануның догры адамлар үчин дәл-де, оны бозянлар ве битабынлар, худайсызлар ве гүнәкәрлер, адамлары сыламаянлар ве имансызлар, ата-энесини өлдүрйәнлер, ганхорлар,

¹⁰ зынахорлар, бири-бири билен ятян эркеклер, гул сөвдагәрлери, яланчылар, әхтияланлар, умуман, сагдын таглымата гаршы чыкянларың әхлиси үчиндигини билйәрис.

¹¹ Хава, бейик ве шөхратлы Худайың маңа ынанан Хош Хабары хут шейле өвредйәндир.

Павлус Худая шүкүр эдйәр

¹² Мен Реббимиз Иса Месихиң маңа гуҗур-гайрат берендиги үчин шүкүр эдйәрин. Ол мени садык сайып, Өзүне хызмат этмәге белледи.

¹³ Мен озаллар Иса Месихе дил етирип, азар берип, залымлык барыны эдипдим. Йөне мен буларың барыны билмезликден ве имансызлыкдан эденим үчин, маңа рехим эдилди.

¹⁴ Реббимиз Иса Месихиң чәксиз мерхемети, сөйгүси ве Онуң берен иманы үстүме болдан-бол ягды.

¹⁵ Шоңа гөрә-де: «Иса Месих гүнәкәрлери халас этмәге гелди» диен сөзлер догры ве хер җәхтден кабул эдерликдир. Шол гүнәкәрлериң иң гүнәкәри-де мендирин.

¹⁶ Эмма Иса Месих маңа Өз чәксиз рехим-шепагатыны гөркезди. Хава, Ол маңа рехим этди ве Өзүне иман эдип, бакы яшайша говушҗакларың әхлиси үчин мени мысал хөкмүнде уланды.

¹⁷ Эбедилигиң Шасы, өлмез ве гөзе гөрүнмез еке-тәк Худая бакы хормат ве шөхрат болсун! Омын.

Өкде сөвешиҗи кимин сөвешмек

¹⁸ Эй, оглум Тимотеос, сен барада айдылан пыгамберликлери назара алып, саңа шуны берк табшырярын: бу пыгамберликлере даянып, өкде сөвешиҗи кимин сөвеш,

¹⁹ иманда берк дуруп, ынсабыңы пәк сакла. Кәбир адамлар ынсапларыны ювудандыгы үчин, иманлары гая урлан гәми кимин чым-пытрак болды.

²⁰ Хименей билен Исгендер-де шейле адамлара дегишлидир. Мен Худая дил етирмезлиги өвренсинлер дийип, олары шейтана табшырдым.