1 Şamuwel 6 - Мукаддес Китап

6-нҗы бап Әхт сандыгы гайдып гелйәр

¹ Реббиң сандыгы еди айлап пилиштлилериң юрдунда болды.

² Шондан соң пилиштлилер руханылардыр палчылары чагырып, олара: «Реббиң сандыгыны нәме этсеккәк? Оны өз меканына нәхили гайтармалыдыгыны бизе айдың» дийдилер.

³ Олар: «Эгер сиз Ысрайыл Худайының сандыгыны ызына гайтармакчы болсаңыз, онда оны бош гойбермәң, Худая язык гурбанлыгыны бериң. Шонда сиз беладан гутуларсыңыз ве Онуң нәме себәпден өзүңизи ызыны үзмән җезаландырандыгына гөз етирерсиңиз» дийдилер.

⁴ Пилиштлилер: «Биз Оңа нәдип язык гурбанлыгыны бермели?» дийип, олардан сорадылар. Олар шейле җогап бердилер: «Пилиштли ханларың санына гөрә бәш саны чыкувың, бәш саны-да сычаның алтындан шекилини ясаң. Чүнки бу бела сизиң өзүңизе-де, ханларыңыза-да дең дереҗеде дегишлидир.

⁵ Шоңа гөрә эндамыңыза чыкан чыкувларың хем-де юрдуңыза гыргынчылык гетирен сычанларың алтындан шекиллерини ясап, Ысрайылың Худайыны шөхратландырың; шейтсеңиз, белки, Худай сизден, сизиң худайларыңыздан ве юрдуңыздан эл чекер.

⁶ Нәме үчин сиз мүсүрлилериң ве фараоның эдиши ялы доңйүреклик эдйәрсиңиз? Тә ысрайыллара Мүсүрден чыкмага ыгтыяр берйәнчәлер, оларың нәхили аңкасыны ашырандыгыны ядыңыздан чыкармаң.

⁷ Инди тәзе араба хем-де хениз боюнтырык салынмадык ики саны сагынлык сыгыр тапың-да, олары араба гошуң. Сыгырларың гөлелерини болса, оларың янындан айрып, дөледе саклаң.

⁸ Реббиң сандыгыны шол арабада ерлешдириң; язык гурбанлыгы хөкмүнде Реббе иберйән алтын шекиллериңизи хем гута салып, онуң гапдалында гоюң. Соңра оны ёла салың, гой, ол өз угруна гитсин.

⁹ Йөне оңа гөзегчилик эдиң. Эгер ол өз меканына барян ёл билен – Бейтшемешиң ёлы билен гитсе, онда бу айылганч бетбагтчылыгы бизиң башымыза Реббиң салдыгыдыр, эмма ол шол ёлдан гитмесе, онда бу ишде Онуң элиниң ёклугыдыр, мунуң төтәнлик болдугыдыр».

¹⁰ Адамлар айдылышы ялы этдилер: ики саны сагынлык сыгыр тапып, олары араба гошдулар. Оларың гөлелерини болса дөлә габап гойдулар.

¹¹ Реббиң сандыгыны хем-де алтындан ясалан сычандыр чыкув шекиллери салнан гутыны пилиштлилер араба йүкледилер.

¹² Сыгырлар сага-сола совулҗак болман, гөни Бейтшемеше барян улы ёл билен молашып гитдилер. Тә Бейтшемешиң арачәгине ченли пилиштли ханлар оларың ызындан галмадылар.

¹³ Шол вагт бейтшемешлилер җүлгеде бугдай оруп йөрдүлер. Реббиң сандыгына гөзлери дүшенде, олар бегендилер.

¹⁴ Бейтшемешли Ешуваның экин мейданындакы уллакан дашың янында араба тогтады. Олар арабаның агачларыны дөвүшдирип, одун этдилер-де, сыгырлары союп, Реббе якма гурбанлык бердилер.

¹⁵ Левилер Реббиң сандыгыны хем-де онуң янындакы алтын шекиллер салнан гутыны арабадан дүшүрип, шол уллакан дашың үстүнде гойдулар. Шол гүн бейтшемешлилер Реббе якма ве бейлеки гурбанлыклары бердилер.

¹⁶ Пилиштлилериң бәш ханы бу ваканы гөзи билен гөрди. Олар шол гүн Экрона доланып гелдилер.

¹⁷ Пилиштлилериң Реббе язык гурбанлыгы хөкмүнде иберен алтындан ясалан чыкув шекиллериниң бири Ашдот үчин, бири Газа үчин, бири Ашкелон үчин, бири Гат үчин, ене бири болса Экрон галалары үчиндир.

¹⁸ Алтындан ясалан сычан шекиллери болса пилиштлилериң бәш ханы тарапындан доландырылян берк галаларың ве оларың төверегиндәки обаларының санына гөрә иберилди. Үстүнде Реббиң сандыгы гойлан уллакан даш бейтшемешли Ешуваның экин мейданында шу гүне ченли дур.

¹⁹ Әхт сандыгының ичине середендиклери үчин, Реб бейтшемешлилери өлдүрди. Халкың ичинден Ол етмиш адамы өлдүрди. Халк матам тутды, чүнки халкы Реб гырыпды.

²⁰ Бейтшемешлилер: «Реббиң, ягны бу мукаддес Худайың өңүнде дуруп билҗек бармы нәме?! Ол бизден эл чекер ялы, биз сандыгы киме ёлласаккак?» дийишдилер.

²¹ Соңра: «Пилиштлилер Реббиң сандыгыны ызына иберипдирлер. Гелиң-де, оны алып гидиң» диен хабар билен олар Кирятегарыма чапар гөндердилер.