1 Şamuwel 28 - Мукаддес Китап

28‑нҗи бап Шавул порхан аяла йүз тутяр

¹ Шол гүнлерде пилиштлилер, Ысрайылың гаршысына урушмак үчин, өз гүйчлерини җемләпдилер. Акыш хан Давуда: «Өз адамларыңы-да алып, мениң билен биле бир гошунда сөвешмелидигиңи, элбетде, сен билйәнсиң» дийди.

² Давут оңа: «Өрән оңат, сен хем өз гулуңың башарныгыны гөрерсиң» дийди. Акыш хан Давуда: «Гаты говы, сен өмүрбойы мениң җанпенам боларсың» дийди.

³ Шамувел өлүпди ве бүтин ысрайыл халкы онуң ясыны тутупды. Оны Рамада – өз галасында җайладылар. Шавул болса порханлардыр җадыгөйлери чыкарып ковупды.

⁴ Пилиштлилер топландылар ве гелип, Шунемде дүшелге гурдулар. Шавул хем әхли ысрайыллары җемләп, Гилбовада дүшелге гурды.

⁵ Пилиштлилериң гошуныны гөренде, Шавулың горкудан яңа йүреги сарсып гитди.

⁶ Шавул Реббе йүз тутды, йөне Реб оңа не дүйшде, не Урымың үсти билен, не-де пыгамберлериң үсти билен җогап берди.

⁷ Соңра Шавул өз хызматкәрлерине: «Маңа бир порхан аял тапың. Мен онуң янына гидип, ондан бир зады хайыш этҗек» дийди. Хызматкәрлер оңа: «Эндорда бир порхан бар» дийдилер.

⁸ Шавул башга гейим гейип, дашкы гөрнүшини үйтгетди ве янына-да ики адам алып, гиҗе ол аялың янына гитди. Ол: «Мениң үчин рухлара йүз тут ве адыны тутҗак кишими чагыр» дийди.

⁹ Аял оңа: «Сен Шавулың порханлардыр җадыгөйлери юртдан чыкарып ковандыгыны билибем, мени өлдүрмек үчин дузак гурҗак болярмың?» дийди.

¹⁰ Эмма Шавул: «Ребден ант ичйәрин, шу ишден саңа хич хили зыян етмез» дийип, Ребден ант ичди.

¹¹ Аял ондан: «Мен сениң яныңа кими гетирмели?» дийип сорады. Ол: «Шамувели» дийип җогап берди.

¹² Аял Шамувели гөренде, чиркин гыгырып, оңа «Мени нәме үчин алдадың? Сен Шавул ахырын!» дийди.

¹³ Патыша оңа: «Горкма. Нәме гөрйәң?» дийди. Аял Шавула: «Ерден чыкып гелйән рухы гөрйән» дийип җогап берди.

¹⁴ Шавул: «Гөрнүши нәхили?» дийди. Аял: «Эгни донлы бир гарры адам ерден чыкып гелйәр» дийди. Шондан соң Шавул онуң Шамувелдигине гөз етирип, йүзүни ере берип, оңа тагзым этди.

¹⁵ Шамувел Шавула: «Нәме үчин мени ёкары чыкарып, алада гойдуң?» дийди. Шавул шейле җогап берди: «Мен чыкгынсыз ягдая дүшдүм. Пилиштлилер мениң гаршыма урушярлар, Худай болса менден йүз өвүрди. Инди Ол маңа пыгамберлериң үсти билен-де, дүйшде-де җогап бермейәр. Шоңа гөрә нәме этмелидигими өвредериң ялы, мен сени чагырдым».

¹⁶ Шамувел оңа шейле дийди: «Нәме үчин, Реб өзүңден йүз өврүп, саңа душман болансоң, менден сораярсың?

¹⁷ Реб мениң үстүм билен саңа айдан задыны этди. Ол сениң элиңден патышалыгы алып, оны саңа дерек Давуда берди.

¹⁸ Себәби сен Реббиң сөзүне гулак асмадың, Онуң Амалегиң гаршысына болан газабыны ерине етирмедиң. Шонуң үчин хем Реб сени бу гүн шу ягдая салды.

¹⁹ Үстесине-де, сениң билен билеликде Ол Ысрайылы пилиштлилериң элине берер; эртир огулларың билен биле мениң яныма гелерсиң. Реб Ысрайыл гошуныны хем пилиштлилериң элине берер».

²⁰ Шол бада Шавул өзүни ере гойберди, чүнки Шамувелиң айданларындан ол өлер ялы горкды. Узаклы гүн бүтин гиҗеси билен хич зат иймәнсоң, онда гүйч-гурбат галманды.

²¹ Яңкы аял Шавулың янына гелди ве онуң өлер ялы горкандыгыны гөрүп, оңа шейле дийди: «Гырнагың саңа гулак асды ве башыны этегине салып, сениң диениңи этди.

²² Инди сенем гырнагыңа гулак ас. Мен саңа бир дөвүм чөрек берейин. Шоны ийсең, ёла чыканыңда гурбатланарсың».

²³ «Ёк, ийҗек дәл» дийип, Шавул муны рет этди. Онуң хызматкәрлери ве яңкы аял оны ырмага чалышдылар. Ол разылашды. Ол еринден турды ве дүшегиң үстүнде отурды.

²⁴ Бу аялың мал ятагында бир семиз гөлеси барды. Ол оны дессине сойды; хамыр югурды ве петир биширди.

²⁵ Ол оны Шавулың хем онуң хызматкәрлериниң өңүнде гойды. Олар оны ийдилер ве шол гиҗе өз ёлларына гитдилер.