1 Şamuwel 17 - Мукаддес Китап

17‑нҗи бап Җалут ысрайыллара гыҗалат берйәр

¹ Урушмак үчин гошунларыны җемлән пилиштлилер Яхуданың Соко галасына топландылар ве Соко билен Азеканың аралыгындакы Эпесдаммым галасында дүшелге гурдулар.

² Шавул билен ысрайыллар хем топландылар. Олар Эла җүлгесинде дүшелге гурдулар ве пилиштлилер билен урушмак үчин, сап-сап болуп дурдулар.

³ Пилиштлилер бир депеде, ысрайыллар болса бейлеки тарапдакы депеде орнашдылар. Оларың араларында җүлге барды.

⁴ Пилиштлилериң дүшелгесинден Гат галасындан Җалут атлы бир пәлван өңе чыкды. Онуң бойы алты тирсек бир гарышды.

⁵ Башында бүрүнч тувулга, эгнинде болса теңңели совут барды. Совудың аграмы үч батман бүрүнҗе барабарды.

⁶ Аяклары бүрүнч дызбентлиди, эгнине бүрүнч найза асылгыды.

⁷ Найзасының сапы пүрс агаҗы ялыды; найзасының тыгының аграмы он еди гадак демре барабарды. Өңүнде-де галканчы нөкери барды.

⁸ Җалут аяк чекди-де, ысрайыл гошунына тарап шейле дийип гыгырды: «Нәме үчин нызама дуруп, сөвеше чыкдыңыз? Мен пилиштли, сиз болса Шавулың гуллары. Шейле дәлми? Араңыздан бирини сайлап сечиң, гой, ол мениң яныма гелсин.

⁹ Эгер ол мениң билен тутлушып, мени өлдүрип билсе, биз сизе гул боларыс. Йөне мен үстүн чыкып, оны өлдүрәйсем, онда сиз бизе гул болуп, гуллугымызда дурарсыңыз».

¹⁰ Пилиштли: «Мен бу гүн ысрайыл гошунына гыҗалат берйәрин. Мениң билен тутлушар ялы адам бериң» дийди.

¹¹ Пилиштлиниң бу сөзлерини эшиденде, Шавулы ве әхли ысрайыллары алҗыраңңылык хем горкы гаплап алды.

Давут Шавулың дүшелгесинде

¹² Давут Яхуданың Бейтуллахам галасындан эфратлы Йышай диен адамың оглуды. Йышайың секиз оглы барды. Шавулың дөврүнде Йышай эййәм гаррап, яшы бирчене баран адамды.

¹³ Йышайың улы үч оглы Шавул билен биле сөвеше гидипди. Ол үчүсиниң иң улусының ады Элияп, икинҗисиниң ады Абынадап, үчүнҗисиниң ады болса Шаммады.

¹⁴ Давут иң кичилериди; улы үч огул Шавулың янындады.

¹⁵ Давут өз какасының гоюнларыны бакмак үчин, Шавулың янындан кәвагт Бейтуллахама гелип-гидерди.

¹⁶ Ол пилиштли кырк гүнләп ирден хем агшам орта чыкып, өзүни гөркезди.

¹⁷ Бир гүн Йышай оглы Давуда шейле дийди: «Бир батман говурга билен, ине, шу он саны чөреги ал-да, деррев дүшелгедәки доганларыңа әкит.

¹⁸ Бу он бөлек пейнири болса оларың мүңбашысына бер. Агаларыңың хал-ахвалындан хабар ал-да, олардан бир нышан гетир».

¹⁹ Шол вагт Шавул, Давудың доганлары ве әхли ысрайыллар Эла җүлгесинде пилиштлилер билен сөвешип йөрдүлер.

²⁰ Давут ирден туруп, гоюнлары сакча табшырды. Йышайың табшырышы ялы, азыклары алып ёла дүшди. Давут дүшелгә геленде, гошун гыкылыклап, сөвеш мейданына тарап барярды.

²¹ Ысрайыллар хем-де пилиштлилер сөвешмек үчин сап-сап болуп, йүзбе-йүз дурдулар.

²² Давут затларыны сакча табшырды-да, гошуна тарап ылгады. Агаларының янына барып, олар билен саламлашды.

²³ Давут агалары билен геплешип дурка, ине, бирден Гатдан пилиштли Җалут пәлван гошуның ичинден чыкды-да, шол өңки сөзлерини гайталады. Онуң айданларыны Давут эшитди.

²⁴ Җалуды гөренлеринде, әхли ысрайыллар горкуларына гачдылар.

²⁵ Ысрайыллар: «Бу өңе чыкып дураны гөрйәңизми? Ол Ысрайыла гыҗалат бермек үчин чыкяр. Шоны өлдүрене патыша уммасыз байлык билен бирликде гызыны-да берҗек, машгаласыны болса Ысрайылда салгытдан бошатҗак» дийишдилер.

²⁶ Давут янындакылардан: «Бу пилиштлини өлдүрип, Ысрайылы шу айыпдан дындарана нәме эдилҗек дийдиңиз? Дири Худайың гошунына гыҗалат берер ялы, бу сүннетсиз ким болупдыр?» диыип сорады.

²⁷ Адамлар оңа: «Хава, оны өлдүрене шейле эдилҗек» дийип, өңки җогабы бердилер.

²⁸ Давудың адамлар билен геплешип дураныны гөрүп, газаба мүнен иң улы агасы Элияп оңа шейле дийди: «Сениң ашакда нәме ишиң бар? Чөлдәки оҗагаз гоюнларыңы киме ташлап гайтдың? Гедем хем гара йүрег-ә сен. Сөвеше томаша этмәге геленсиң сен».

²⁹ Давут оңа: «Мениң эден задым нәме? Мен инди геплемелем дәлми?» дийди.

³⁰ Ол бейлесине өврүлди-де, ене-де өңки сөзлерини гайталады. Адамлар хем оңа өңки җогабы бердилер.

³¹ Давудың айданларыны эшиденлер муны Шавула етирдилер. Шавул оны гетиртди.

³² Давут Шавула: «Шол зерарлы еке адамам өзүни хорламасын. Гулуң гидип, ол пилиштли билен уршар» дийди.

³³ Шавул Давуда: «Бу пилиштлиниң гаршысына сен чыкып билмерсиң, себәби сен энтек яш. Ол болса яшлыгындан бәри уршуп йөрен адам» дийди.

³⁴ Эмма Давут Шавула шейле дийди: «Мен гулуң өз какамың гоюнларыны бакардым. Ёлбарс я-да айы гелип, сүрүден бир гузыны алайса,

³⁵ мен онуң ызындан етердим-де, оны өлдүрип, гузыны агзындан алардым. Барды-гелди ол маңа топулайса, сакгалындан тутардым-да, оны уруп өлдүрердим.

³⁶ Гулуң ёлбарс-да, айы-да өлдүрип гөрди. Бу сүннетсиз пилиштли хем шоларың гүнүне дүшер, чүнки ол дири Худайың гошунына гыҗалат берди».

³⁷ Давут сөзүни довам эдип: «Мени ёлбарсдыр айының пенҗесинден халас эден Реб шу пилиштлиниң элинден хем халас эдер» дийди. Шавул Давуда: «Бар, Реб саңа яр болсун!» дийди.

³⁸ Соңра Шавул өз ярагларыны Давуда дакды, башына өз бүрүнч тувулгасыны, эгнине болса теңңели совут гейдирди.

³⁹ Давут ярагларының үстүнден Шавулың гылыҗыны билине баглады ве йөреҗек болды, чүнки ол булары өң дакынып гөрмәнди. Онсоң Давут Шавула: «Мен булар билен йөрәп билемок, чүнки мен өң булары дакынып гөрмәндим» дийди. Шейдип, Давут булары чыкарып ташлады.

Давут Җалуды өлдүрйәр

⁴⁰ Соңра Давут элине таягыны алды ве чешмеден бәш саны йылманак даш сайлап, торбасына салды. Сапаныны элине алып, пилиштлә голайлашды.

⁴¹ Пилиштли хем өз өңүндәки галканчысы билен биле Давуда голайлап гелйәрди.

⁴² Давуда гөзи дүшенде, пилиштли оңа әсгермезлик билен серетди, чүнки Давут яшды, гызылмеңизди хем гөрмегейди.

⁴³ Пилиштли Давуда: «Үстүме таяклы гелер ялы, мен нәме итми?» дийди-де, өз худайларының адындан Давуда гаргады.

⁴⁴ Пилиштли ене Давуда: «Ханы, бир гелсене, этиңи йыртыҗы гушлар билен вагшы хайванлара шам эдейин» дийди.

⁴⁵ Соңра Давут пилиштлә: «Сен мениң үстүме гылычлы, найзалы ве гамалы гелйәрсиң, эмма мен сениң үстүңе сениң гыҗалат берен Ысрайыл гошунының Худайы Хөкмүрован Реббиң адындан гелйәрин.

⁴⁶ Шу гүн Реб сени мениң элиме берер ве мен сени уруп, келләңи кесерин. Мен бу гүн пилиштлилериң әхлисиниң ләшини йыртыҗы гушлардыр ябаны хайванлара шам эдерин. Шонда тутуш ер йүзи Ысрайылда Худайың бардыгыны билер.

⁴⁷ Шу әхли халк Реббиң гылычдыр найзалы халас этмейәндигини билер, чүнки сөвеш Реббиңкидир. Ол сизи бизиң элимизе берер».

⁴⁸ Пилиштли Давуда голайлашанда, Давут ол пилиштли билен урушмак үчин, сөвеш мейданына тарап батлы ылгап гитди.

⁴⁹ Давут элини торбасына сокуп, ондан бир даш чыкарды-да, оны сапанына салып атып гойберди ве пилиштлиниң маңлайындан урды. Даш пилиштлиниң маңлайыны дешди ве ол йүзинлигине ере язылды.

⁵⁰ Гылычсыз, сапан хем-де даш билен Давут пилиштлиден үстүн чыкып, оны уруп өлдүрди.

⁵¹ Соңра ол ылгап барып, пилиштлиниң үстүне чыкды ве онуң гылыҗыны гынындан согруп алды-да, гылыч билен келлесини кесип ташлады. Өз пәлванларының өлдүрилендигини гөрүп, пилиштлилер гачдылар.

⁵² Ысрайыллар ве яхудалар гыкылыклап аяга галдылар, олар Гата ве Экроның дервезелерине ченли пилиштлилериң ызындан ковдулар. Яраланан пилиштлилер Гат ве Экрон галаларына барян Шагарайым ёлуның угрунда серлип ятырды.

⁵³ Пилиштлилериң ызындан ковга гиден ысрайыллар доланып гелдилер ве оларың дүшелгесини таладылар.

⁵⁴ Давут пилиштлиниң келлесини алып, Иерусалиме гетирди, онуң ярагларыны болса өз чадырында гойды.

Давут Шавулың хузурында

⁵⁵ Давудың Җалут пилиштли билен урушмага баряныны гөренде, Шавул өз гошунбашысы Абнерден: «Бу йигит кимиң оглы, Абнер?» дийип сорапды. Абнер: «Патышаның өмри узак болсун, билмедим» дийип җогап берипди.

⁵⁶ Патыша: «Онуң кимиң оглудыгыны аныкла» дийипди.

⁵⁷ Давут пилиштлини өлдүрип, ызына доланып геленде, Абнер оны Шавулың хузурына алып барды. Җалут пилиштлиниң келлеси хем онуң элиндеди.

⁵⁸ Шавул ондан: «Йигит, сен кимиң оглы боларсың?» дийип сорады. Давут: «Сениң бейтуллахамлы хызматкәриң Йышайың оглы мен» дийип җогап берди.