1 Salonikliler 3 - Мукаддес Китап

3‑нҗи бап

¹ Биз дидарыңыздан мундан артык махрум болмага чыдаман, Афиныда еке галмагы макул гөрдүк.

² Сизиң яныңыза болса Месихиң Хош Хабарыны яйратмак үчин Худайың хызматында эгиндешимиз болан Тимотеос доганымызы ибердик. Биз муны сизи иманыңызда беркитмек, рухландырмак үчин,

³ мушакгатлар зерарлы сизиң хич бириңиз имандан дәнмесин дийип этдик. Йөне өзүңиз билйәнсиңиз, бу мушакгатлар Месихе иман гетиренлериң башында бардыр.

⁴ Биз мушакгат чекҗекдигимизи хениз яныңыздакак өңүнден айдыпдык. Билшиңиз ялы, шейле хем болды.

⁵ Шоңа гөрә-де, мундан артык чыдап билмән, иманыңыздан хабар алмак үчин, мен Тимотеосы яныңыза ибердим. Чүнки аздырыҗы шейтаның хайсыдыр бир ёл билен сизи аздырып, азабымызың бидерек боларындан горкдум.

Салоникиден гелен оңат хабарлар

⁶ Эмма яныңыздан шу пурсат гелен Тимотеос сизиң иманыңыз ве сөйгиңиз барада оңат хабарлар гетирди. Ол бизи хемише ягшылыкда ятлаяндыгыңызы, сизи гөресимизиң гелши ялы, сизиң-де бизи гаты күйсейәндигиңизи гүррүң берди.

⁷ Шоңа гөрә-де, эй, доганлар, әхли мушакгатларымыза ве ызарланмалара гарамаздан, сизиң иманыңыздан теселли тапдык.

⁸ Сизиң Ребде берк дурмагыңыз инди җанымыза җан гошяр.

⁹ Биз Худайымызың өңүнде сиз себәпли өрән шатландык. Сизиң үчин Худая нәче шүкүрлер айтсагам аздыр!

¹⁰ Биз дидарыңызы гөрмек ве иманыңызың артмагы үчин, гиҗе-гүндиз эрҗеллик билен дога-дилег эдйәрис.

¹¹ Инди болса сизе тарап ёлумызы, гой, Атамыз Худайың Өзи хем-де Реббимиз Иса ачсын.

¹² Бизиң сизи сөйшүмиз ялы, гой, Реб бири-бириңизе, әхли адамлара болан сөйгиңизи артдырып, пүрепүр этсин.

¹³ Реббимиз Иса Өз әхли перишделери билен биле геленде, Атамыз Худайың өңүнде айыпсыз ве мукаддес болуп билериңиз ялы, гой, Ол йүреклериңизи кувватландырсын.