1 Salonikliler 1 - Мукаддес Китап

1‑нҗи бап

¹ Атамыз Худайың ве Реббимиз Иса Месихиң Салоникидәки иманлылар йыгнагына Павлус, Силван ве Тимотеосдан догайы салам! Гой, мерхемет билен парахатлык сизе яр болсун!

Павлус Салоникидәки иманлылар үчин Худая шүкүрлер эдйәр

² Биз сизи дога-дилеглеримизде ятлап, элмыдама әхлиңиз үчин Худая шүкүрлер эдйәрис,

³ себәби иманыңыз ягшы ишлери, сөйгиңиз җаныпкешлиги, Реббимиз Иса Месихе болан умыдыңыз чыдамлылыгы хасыл берйәр. Биз Атамыз Худайың хузурында буларың барыны дынгысыз ятлаярыс.

^4-5 Эй, доганлар! Бизиң яйрадян Хош Хабарымыз сизе диңе сөз билен дәл, эйсем Мукаддес Рухуң гүйҗи ве берк ынам билен говушды. Шонда биз Худайың сизи сөйүп, сайландыгына гөз етирдик. Биз сизиң араңызда боланымызда нәхили яшандыгымызы өзүңиз-де билйәнсиңиз.

⁶ Сиз агыр мушакгатлар чексеңиз-де, Мукаддес Рухуң берен шатлыгы билен Хош Хабары кабул эдип, бизиң ве Реббиң гөрелдесине эердиңиз.

⁷ Шейдип, Македония билен Ахаядакы иманлыларың әхлисине гөрелде болдуңыз.

⁸ Реббиң Хош Хабары сизден әхли ере, хатда Македония билен Ахаядан узак ерлере хем яң салды. Сизиң Худая болан иманыңыз барадакы гүррүң әхли ере яйрады. Бизе ол барада айдара-да зат галмады.

^9-10 Гайтам, оларың өзлери сизиң бизи кабул эдишиңиз барада гүррүң берйәрлер. Шейле-де сизиң бутлардан йүз өврүп, Худая тарап өврүлендигиңизи айдып берйәрлер. Сиз инди хакыкы, дири Худая гуллук эдйәрсиңиз ве Онуң өлүмден дирелден Оглы Исаның гөклерден гелмегине гарашярсыңыз. Иса Месих бизиң әхлимизи гелеҗекдәки газапдан халас эдйәндир.