1 Petrus 5 - Мукаддес Китап

5‑нҗи бап Яшулулара ве яшлара өвүт-үндевлер

¹ Мен Месихиң чекен эҗирлериниң шаяды ве Онуң аян болҗак шөхратының шәриги хөкмүнде араңыздакы өзүм ялы ёлбашчылардан шулары хайыш эдйәрин:

² чопанларың өз сүрүсине середиши ялы, сиз хем Худайың өзүңизе ынананлары барада алада эдиң. Муны меҗбуры дәл-де, мейлетинлик билен эдиң. Олара бетнебислик билен дәл-де, улы хөвес билен гөзегчилик эдиң.

³ Гол астыңыздакылара агалык этмезден, ягшы гөрелде гөркезиң.

⁴ Шейле этсеңиз, Баш Чопан аян боланда, солмаз шөхрат тәҗини аларсыңыз.

⁵ Эй, яшлар, сиз хем яшулулара табын болуң. Хеммәңиз бири-бириңиз билен песпәл болуң, себәби «Худай текепбирлере гаршыдыр, эмма песпәл адамлара мерхемет эдйәндир».

⁶ Худай сизи вагты геленде бейгелдер ялы, Онуң гудратлы голы астында өзүңизи пес тутуң.

⁷ Әхли гайгы-аладаңызы Худая табшырың, себәби Ол сизиң гамхоруңыздыр.

⁸ Хүшгәр ве оя болуң. Душманыңыз иблис арлайҗы арслан ялы айланып, авуны агтарып йөрендир.

⁹ Дүнйәниң әхли еринде доганларыңызың хем хут шунуң ялы эҗирлере дучар боляндыкларыны билйәндигиңиз үчин, берк иман билен иблисе гаршы дуруң.

¹⁰ Бол мерхемет эчилйән Худай сизи Месих аркалы Өз эбеди шөхратына чагырды. Сиз дурмушда эҗир чекйән болсаңыз хем, Ол сизи дикелдер, беркидер, гүйчлендирер ве сарсмаз бина эдип гурар.

¹¹ Гүйч-гудрат эбедилик Онуңкы болсун! Омын.

Хошлашык сөзи

¹² Бу гысга хатымы сизе садык доганым Силван аркалы яздым. Мунуң билен сизи рухландырып, Худайың хакыкы мерхеметине шаятлык этдим.

¹³ Сизиң ялы сайланып-сечилен Бабылдакы йыгнак ве доганымыз Марк сизе салам айдяр.

¹⁴ Бири-бириңизи мәхирли огшап саламлашың. Месихе дегишли болан сизиң хеммәңизе парахатлык яр болсун!