1 Petrus 4 - Мукаддес Китап

4‑нҗи бап Худай үчин яшамак

¹ Шунлукда, Месихиң дүнйәде эҗир чекиши ялы, сиз хем шейле пикирлер билен ярагланып, муңа тайяр болуң. Себәби Месих үчин эҗир чекмәге тайын болсаңыз, гүнә этмекден йүз өвренсиңиз.

² Инди бу бедендәки галан яшаҗак өмрүңизде ынсаның ислегине дәл-де, Худайың ислегине эериң.

³ Гечмишде бутпаразлыга уюп яшаныңыз етерликдир. Шол дөвүрлери сиз ахлаксызлыкда, харам кейп чекмекде, серхошлыкда, ичгили кейпи-сапада ве йигренҗи бутпаразлыкда гечирдиңиз.

⁴ Инди болса шол өңки бутпаразлык эдйәнлер сизиң өзлери билен биле азгын зынахорлыга гошулмаяндыгыңыза гең галып, сизе сөгйәрлер.

⁵ Эмма дирилериң хем, өлүлериң хем үстүнден хөкүм чыкармага тайяр дуран Худая олар хасабат берерлер.

⁶ Шонуң үчин хем Хош Хабар хатда өлүлере-де вагыз эдилди. Олар хем әхли ынсанлар ялы дурмушында эден ишлери үчин хөкүм эдилен болсалар-да, Худайың Рухы аркалы яшап билерлер.

⁷ Әхли затларың соңы якын гелди. Мунуң үчин сагдын дүшүнҗели болуп, хүшгәрлик билен дилег эдиң.

⁸ Озалы билен бири-бириңизи җандан сөйүң, себәби сөйги көп гүнәлериң үстүни өртйәндир.

⁹ Зейренмезден бирек-биреги мыхман алың.

¹⁰ Худай сизиң хер бириңизе дүрли рухы пешгешлер берди. Олары бири-бириңизе хызмат этмек үчин уланың.

¹¹ Ким геплесе, Худайың сөзлери билен геплесин. Ким хызмат этсе, Худайың берен гүйч-кувватына гөрә хызмат этсин. Иса Месих аркалы Худай әхли затда шөхратлансын! Шөхрат ве гудрат эбедилик Онуңкы болсун! Омын.

Месих угрунда эҗир чекмек

¹² Мәхрибанларым, сизи сынамак үчин башыңыза инен от беласына гең зада саташан ялы хайран галмаң.

¹³ Терсине, Месихиң чекен эҗирлерине шәрик болян ялы шатланың. Онуң шөхраты аян боланда, шатлыгыңызың чәги болмаз.

¹⁴ Месихиң ады себәпли кемсидилйән болсаңыз, багтыярсыңыз, себәби Худайың шөхратлы Рухы сизде месген тутандыр.

¹⁵ Йөне сизден хич ким ганхор я огры, башга бир җенаятчы, я шугулчы болуп эҗир чекмесин.

¹⁶ Ким месихи болуп эҗир чекйән болса утанмасын. Ол бу ат билен Худайы шөхратландырсын.

¹⁷ Чүнки хөкүмиң Худайың машгаласындан башланмалы вагты гелип етди. Хөкүм өңүрти бизден башланса, онда Худайың Хош Хабарына табын болмаянларың соңы нәме болар?

¹⁸ Эгер догры адам зордан халас болян болса, онда худайсызың ве гүнәкәриң ахвалы ничик болар?

¹⁹ Мунуң үчин Худайың ислеги билен эҗир чекйәнлер ягшылык этмегини довам этдирип, өзлерини садык Ярадана табшырсынлар.