1 Petrus 3 - Мукаддес Китап

3‑нҗи бап Әр-аял гатнашыгы

^1-2 Эдил шунуң ялы, эй, аяллар, сиз хем өз әриңизе табын болуң. Эгер әриңиз Худайың сөзүне ынанмаян болса, ол аялының ар-намыслы, Худайдан горкуп яшаян пәк дурмушыны гөрүп, хич бир айдып-диймезден имана гелер.

³ Сизиң гөзеллигиңиз өрүлен сачлар, дакылан алтынлар, овадан эшиклер ялы дашкы гөрнүшден ыбарат болмасын.

⁴ Терсине, калбыңыздакы юваш хем юмшак рух сизиң солмаян ички гөзеллигиңиз болсун. Бу Худайың назарында хас гымматлыдыр.

⁵ Өңки вагтларда Худая умыт баглап, йүреклерини пәк саклан аяллар хем өзлерини шейле безейәрдилер, олар әрине табындылар.

⁶ Мысал үчин, Сара Ыбрайыма табын болуп, оны хоҗайыным дийип атландырды. Эгер сиз хем ягшылык эдип, хич бир ховпдан горкмасаңыз, Сараның гызлары боларсыңыз.

⁷ Эй, әрлер, эдил шунуң ялы, сизем өз аялыңыза хормат гоюң, онуң билен өзара дүшүнишип яшаң. Сиз оларың өзүңизден эҗиздигини билйәнсиңиз, эмма олар хем сизиң билен Худайың берен яшайшыны дең мирас аландырлар. Дога-дилеглериңизиң бөкделмезлиги үчин шейле эдиң.

Догрулык угрундакы гөргүлер

⁸ Шейлеликде, хеммәңиз пикирдеш, дертдеш болуп, бири-бириңизи доганлык сөйгүси билен сөйүң. Рехим-шепагатлы ве песпәл болуң.

⁹ Яманлыга яманлык, сөгүнҗе сөгүнч билен гайтаргы бермән, терсине, алкыш билен җогап бериң, себәби сиз шунуң ялы яшамага чагырылансыңыз.

¹⁰ Чүнки: «Дөвран сүрмеги ислейән болсаң, ягшы гүнлери гөрмекчи болсаң, яманлыкдан сакла сен өз дилиңи ве хилели гепден – додакларыңы;

¹¹ яманлыкдан айрыл, эт сен ягшылык, парахатлык агтар, ызындан галма.

¹² Догры адамларда Реббиң гөзлери, перятларына ачык Онуң гулагы. Йөне Реббиң йүзи яманлык эдйәнлере гаршыдыр».

¹³ Ягшылык этмәге җан этсеңиз, сизе ким яманлык эдер?

¹⁴ Сиз догрулык үчин гөрги гөрсеңиз хем багтыярсыңыз. Адамларың сизе салян ховпундан горкмаң, довла дүшмәң.

¹⁵ Эмма Месихе Реб хөкмүнде йүрекден хормат гоюң. Калбыңыздакы умыт хакында өзүңизден хасабат соран хер бир адама хемише җогап бермәге тайяр болуң.

¹⁶ Муны мылайымлык ве эдеплилик билен берҗай эдиң. Выжданыңызы арасса саклаң, шонда сизиң Месихе дегишли догры яшайшыңыз барада гыбат эденлер сизи яманлап айдан геплеринден утанарлар.

¹⁷ Эгер Худайың ырадасы билен эҗир чекмели болса, яманлык эдип эҗир чекмекден ягшылык эдип эҗир чекмек хас говудыр.

¹⁸ Иса Месих хем бизи Худая гетирмек үчин, бизиң гүнәлеримиз себәпли бир гезек өлди. Өзи догры болса-да, гүнәкәрлер үчин өлди. Ынсан ялы өлдүрилсе-де, Худайың Рухы аркалы Ол дирелдилди.

¹⁹ Ол туссагдакы рухлара барып, вагыз этди.

²⁰ Бу рухлар гадым заманда Нухуң гәмиси ясалып йөркә, Худай хениз сабыр-такатлык эдип гарашярка, Оңа табын болмадылар. Шол гәмиде болса аз адам, җеми секиз адам сув аркалы халас болды.

²¹ Ине, бу сув хәзирки сизи халас эдйән чүмдүрилишиң нышаныдыр. Сиз сува чүмдүрилениңизде бедениңизиң кири ювландыгы үчин дәл-де, Иса Месихиң дирелмеги аркалы пәк выждан билен Худая тарап өврүлендигиңиз үчин халас эдилдиңиз.

²² Иса Месих гөге чыкып, Худайың сагында отурды, әхли перишделер, ыгтыярлылар ве гүйчлер Оңа табын болды.