1 Petrus 2 - Мукаддес Китап

2‑нҗи бап

¹ Шонуң үчин хем хер хили яман ниети, хилегәрлиги, икийүзлүлиги, бахыллыгы, гыбат-гүррүңлери өзүңизден айрып ташлаң.

² Яңы доглан бәбеклер ялы сап рухы сүйди күйсәң, шонда өсүп, халас боларсыңыз.

³ Себәби сиз Реббиң ягшылыгыны дадып гөрдүңиз.

Дири дашлар

⁴ Сиз ынсанлар тарапындан рет эдилен, эмма Худайың назарында сайланан ве гымматлы сайылан дири Даша, ягны Иса Месихе якынлашярсыңыз.

⁵ Шонуң үчин сиз хем дири дашлар ялы рухы бина болуп гурлуң. Шонда Иса Месих аркалы Худайың халаян рухы гурбанлыкларыны хөдүрлейән мукаддес руханылар боларсыңыз.

⁶ Мукаддес Язгыларда шейле дийилйәр: «Ине, Мен Сионда бина дашыны, сайлама ве гымматбаха бурч дашыны гойярын. Оңа бил баглан асла утандырылмаз».

⁷ Хава, иман эден сизиң үчин бу даш гымматлыдыр. Эмма иман этмедиклер үчин, «Уссаларың рет эден дашы, бинаның бурч дашы болды».

⁸ Шейле хем бу «бүдреме дашы, йыкян гая». Олар өңден беллениши ялы, бу сөзе табын болмансоңлар бүдрейәрлер.

⁹ Эмма сиз бейле дәлсиңиз, чүнки сиз сайланып-сечилен халксыңыз. Сиз патышаның руханылары, мукаддес миллет, Худая дегишли халксыңыз. Худай сизи гараңкылыкдан Өзүниң аҗайып нуруна чагырды. Сиз Онуң шан-шөхратыны ыглан этмек үчин сайланып-сечиленсиңиз.

¹⁰ Бирвагтлар сиз халк дәлдиңиз, эмма инди Худайың халкысыңыз. Өңлер сиз Онуң рехим-шепагатындан махрумдыңыз, инди болса оңа говшансыңыз.

¹¹ Эзиз достлар, җаныңыза гаршы сөвешйән гүнәли хөвеслерден гача дуруң дийип ялбарярын. Чүнки сиз бу дүнйәде кесеки хем гелмишексиңиз.

¹² Имансызларың арасында хич хили мүйнсүз яшаң. Шонда олар сизи нәдогры иш этмекде айыпласалар-да, догры ишлериңизи гөрүп, Худайың гелҗек гүни Оны шөхратландырарлар.

Ёлбашчылара табын болуң

¹³ Сиз хер бир ынсан хәкимиетине Реббиң хакы үчин табын болуң. Юрдуң башы болан патыша болсун

¹⁴ я-да онуң беллән эмелдарлары болсун, тапавуды ёк, олара табын болуң. Патыша өз эмелдарларыны яманлык эденлери җезаландырмага, ягшылык эденлери тарыпламага белледи.

¹⁵ Себәби Худайың ислеги сизиң ягшылык эдип, акылсыз наданларың агзыны юмдурмагыңыздыр.

¹⁶ Азат адам ялы яшаң, эмма өз азатлыгыңызы эрбетлик этмек үчин уланмаң. Худайың гуллары дек яшаң.

¹⁷ Хеммелере хормат гоюң. Иманлы доганларыңызы сөйүң, Худайдан горкуң, патышаны сылаң.

¹⁸ Эй, хызматкәрлер, диңе бир мәхирли хем юмшак хоҗайынларыңыза дәл-де, эйсем, ёвуз хоҗайынларыңыза-да хормат гоюп, табын болуң.

¹⁹ Эгер ким нәхак ере эҗир чекип, Худайы танаяндыгы үчин бу гөргүлере чыдаян болса, ол адам Худайы хошнут эдер.

²⁰ Эгер эден нәдогры ишиңиз үчин енҗилмелере дөз гелйән болсаңыз, бу сизе нәме хормат гетирер? Эмма ягшылык эдибем ене эҗир чексеңиз ве муңа чыдасаңыз, Худай мундан хас көп разы болар.

²¹ Ине, сиз шунуң үчинем чагырылдыңыз, себәби Месих сизиң үчин эҗир чекди. Өз ызына эермегиңиз үчин, Ол сизе гөрелде болды.

²² «Ол хич хили гүнә этмеди, агзындан бир ялан сөз чыкмады».

²³ Ол сөгүленде сөгмеди, эҗир чекенде хич киме ховп салмады. Муңа дерек Өзүни адыл хөкүм чыкарян Худая табшырды.

²⁴ Бизиң гүнә гаршы өлүп, догручыллык угрунда яшамагымыз үчин, Ол хачда гүнәлеримизи Өз үстүне йүкледи. Сиз Онуң яралары аркалы шыпа тапдыңыз.

²⁵ Сиз гоюнлар ялы азашыпдыңыз, эмма инди җаныңызың Чопанына хем Гөзегчисине доланып гелдиңиз.