1 Patyşalar 6 - Мукаддес Китап

6-нҗы бап Сүлейман ыбадатхананы гуряр

¹ Ысрайылларың Мүсүрден чыкып гайтмагының дөрт йүз сегсенинҗи йылында, Сүлейманың патышалыгының дөрдүнҗи йылында, икинҗи ай болан Зив айында Реббиң өйи гурлуп башланды.

² Сүлейман патышаның Реб үчин гуран өйүниң узынлыгы алтмыш тирсек, ини йигрими тирсек, бейиклиги отуз тирсекди.

³ Реббиң өйүниң дашкы отагының өңүндәки эйванының ини өйүң ини ялы йигрими тирсекди, узынлыгы өйүң өң тарапында он тирсекди.

⁴ Ол Реббиң өйүне гөзенекли пенҗирелер этди.

⁵ Сүлейман Реббиң өйүниң дашкы ве ички отагларың, дашкы диварларына янашдырып, гапдал отагларыны салды.

⁶ Пүрслер өйүң диварыны дешмез ялы, өйүң диварының йүзүнден даш чыкгытлар этдилер. Ашакы гатың ини бәш тирсек, ортакы гатың ини алты тирсек, үчүнҗи гатың ини еди тирсекди.

⁷ Реббиң өйи гурланда өңден ёнулып тайярланан дашлардан гурулды. Шол себәпден өй гурулярка ондан не чекич, не палта, не-де демир гуралың сеси эшидилди.

⁸ Ортакы гатың гапысы Реббиң өйүниң гүнорта тарапындады; айлавлы басганчаклар билен ортакы гата, ортакы гатдан үчүнҗи гата чыкып болярды.

⁹ Шейдип, Сүлейман Реббиң өйүниң гурлушыгыны тамамлады. Ол өйүң үчегини кедр пүрслери ве кедр тагталары билен басырды.

¹⁰ Тутуш өе янашдырылып салнан отагларың хер гатының бейиклиги бәш тирсекди. Ол отаглар өе кедр пүрслери билен бирикдирилди.

^11-12 Сүлеймана гуруп йөрен өйи хакында Реббиң шу сөзи аян болды: «Эгер сен Мениң парзларымы берҗай эдип, хөкүмлериме боюн болуп, әхли табшырыкларымы саклап, олары берҗай этсең, Мен какаң Давуда берен вадамы сениң үстүң билен ерине етирерин.

¹³ Мен ысрайылларың арасында яшап, Өз халкым ысрайылы терк этмерин».

¹⁴ Шейдип, Сүлейман Реббиң өйүни гуруп гутарды.

¹⁵ Ол өйүң ички диварларының йүзүне дүйбүнден үчегине ченли кедр тагталарыны тутды ве өйүң полуны серви агаҗындан этди.

¹⁶ Ол өйүң арка тарапында, дүйбүнден депесине ченли кедр агачларындан бейиклиги йигрими тирсек болан дивар бина этди. Ол муны иң мукаддес отаг болан ички отаг хөкмүнде гурды.

¹⁷ Ички отагың өңүндәки дашкы отагың узынлыгы кырк тирсекди.

¹⁸ Өйүң ичи кедр тагтасындан кесилип, кәдә хем-де ачылып отуран гүллере чалым эдйән нагышлар билен хашамлананды. Дивардакы дашлар гөрүнмез ялы, дивар тутушлыгына кедр тагтасы билен өртүленди.

¹⁹ Ол өйүң төрүнде Реббиң Әхт сандыгыны гояр ялы ички отаг тайярлады.

²⁰ Ички отагың узынлыгы-да, ини-де, бойы-да йигрими тирсекди, оңа сап алтын чайыланды. Ол шейле хем кедр агаҗындан ясалан сыпа-да алтын чайды.

²¹ Сүлейман Реббиң өйүниң ичини сап алтын билен өртди; ички отагың өңүнден алтын зынҗырлар герип, оны-да алтына гаплады.

Ыбадатхана безелйәр

²² Соңра ол тутуш өйи кемсиз-көстсүз болар ялы, оны тутушлыгына алтына гаплады. Хатда ички отагың өңүнде дуран сыпа хем алтын чайды.

²³ Ол ички отагда хер бириниң бойы он тирсек болан зейтун агаҗындан ики саны керуп ясады.

²⁴ Керупларың икисиниң хем ганатының узынлыгы бәш тирсекди.

²⁵ Оларың херсиниң ганаты, ганатының бир уҗундан бейлеки ганатының уҗуна ченли он тирсекди. Керупларың икисиниң өлчеги-де, шекили-де бирди.

²⁶ Керупларың икисиниң-де бейиклиги он тирсекди.

²⁷ Сүлейман керуплары Реббиң өйүниң ички отагында гойды. Оларың ганатлары, бириниң ганаты диварың бир тарапына, бейлекисиниң ганаты диварың эйлеки тарапына етер ялы герлип гойланды. Керупларың бейлеки ганатлары өйүң ортасына тарап герлип дурды.

²⁸ Сүлейман керуплара хем алтын чайды.

²⁹ Тутуш өйүң диварлары, ички ве дашкы отагларың диварларының йүзи оюлып, керуплар, палма агачлары ве ачылан гүллер билен хашамлананды.

³⁰ Ол өйүң ички ве дашкы отагларының полуна хем алтын чайды.

³¹ Сүлейман ички отага зейтун агаҗындан гапылар ясады. Гапыларың гермевлери ве сөелери бәш бурчлыды.

³² Зейтун агаҗындан ясалан ики гапының йүзи оюлып, керуплар, палма агачлары ве ачылан гүллер билен хашамлананды. Сүлейман олара алтын чайды, керупларың ве палма агачларының йүзүне хем алтын чайды.

³³ Шейле хем Сүлейман өйүң дашкы отагының гапысына зейтун агаҗындан дөртбурч сөелер ясады.

³⁴ Ол серви агаҗындан ики тайлы гапы этди, онуң ики тайы хем ики тарапа-да ачылярды.

³⁵ Сүлейман гапыларың йүзи оюлып, керуплар, палма агачлары билен хашамланан нагшың үстүне алтын чайды.

³⁶ Ол үч хатар ёнулан даш ве бир хатар кедр пүрсүнден ички ховлы гурды.

³⁷ Сүлейманың патышалыгының дөрдүнҗи йылында, Зив айында Реббиң өйүниң дүйби тутулды.

³⁸ Сүлейманың патышалыгының он биринҗи йылында, секизинҗи ай болан Бул айында Реббиң өйи мейилнама гөрә долулыгына гурлуп гутарылды. Сүлеймана өйи гурмак үчин еди йыл герек болды.