1 Patyşalar 4 - Мукаддес Китап

4‑нҗи бап Сүлейманың эмелдарлары

¹ Сүлейман патыша бүтин Ысрайылың үстүнден шалык сүрди.

² Онуң янындакы эмелдарлар шуларды: Садогың оглы Азаря руханыды,

³ Шишаның огуллары Элихореп билен Ахыя кәтиплерди, Ахылудың оглы Ехошапат баш эмелдарды.

⁴ Ехояданың оглы Беная гошунбашыды, Садок билен Абятар руханыларды.

⁵ Натаның оглы Азаря хәкимлериң үстүнден гараярды; Натаның оглы Забут болса хем руханы, хем патышаның яраныды.

⁶ Ахышар көшгүң баштутанды; Абданың оглы Адонырам болса меҗбуры ишдәкилериң үстүнден гараярды.

⁷ Бүтин Ысрайылда Сүлейманың он ики саны хәкими барды. Оларың херси патышаны ве онуң өй-ичерисини, гезекли-гезегине, йылда бир ай азык билен үпҗүн этмелиди.

⁸ Оларың атлары шуларды: Эфрайым даглык юрдунда Бенхур,

⁹ Макасда, Шагалбымда, Бейтшемешде ве Эйлонбейтхананда Бендекер,

¹⁰ Арубот үлкесинде Бенхесет (Соко билен бүтин Хепер юртлары хем оңа дегишлиди),

¹¹ бүтин Напатдор үлкесинде Бенабынадап (ол Сүлейманың гызы Тапата өйленипди),

¹² Тагнак, Мегидо үлкелеринде, Йизрегелиң этегиндәки Саретаның янындакы бүтин Бейтшеян үлкесинде, Бейтшеяндан Абелмехола, Ёкмыгамың аңырсына ченли болан аралыкдакы үлкеде Ахылудың оглы Багана,

¹³ Рамотгилгат үлкесинде Бенгебер (Бенгеберде Манашаның оглы Яйырың Гилгатдакы обалары барды. Башандакы Аргоп этрабында берк диварлы, дервезелери бүрүнч гөзенекли алтмыш саны улы гала хем оңа дегишлиди),

¹⁴ Маханайым үлкесинде Ыдоның оглы Ахынадап,

¹⁵ Нафталы үлкесинде Ахымагас (ол Сүлейманың гызы Босмата өйленипди),

¹⁶ Ашер ве Бегалот үлкелеринде Хушайың оглы Багана,

¹⁷ Ысакар үлкесинде Паруваның оглы Ехошапат,

¹⁸ Бенямин үлкесинде Эланың оглы Шимги,

¹⁹ аморлар патышасы Сихон хем-де Башан патышасы Огуң юрды болан Гилгатда Урының оглы Гебер. Ол бу ериң хәкимиди.

Сүлейманың патышалыгы

²⁰ Яхуда халкы билен ысрайыл халкы деңиз якасындакы чәге дей көпди. Олар ийип-ичип, хошбагтлылыкда яшадылар.

²¹ Сүлейман Евфрат дерясындан пилиштлилер юрдуна ве Мүсүр серхедине ченли болан бүтин юрда патышалык этди. Олар Сүлейманың өмрүниң ахырына ченли оңа салгыт төләп, хызмат этдилер.

^22-23 Сүлейманың көшгүниң бир гүнлүк азыгы, ики йүз йигрими бәш батман ёкары хилли ундан, дөрт йүз элли батман адаты ундан, он саны бага бакылан өкүзден, йигрими саны яйлада бакылан өкүзден, йүз саны гоюндан, ондан дашары-да сугунлардан, җеренлерден, сайгаклардан хем-де семиз гушлардан ыбаратды.

²⁴ Чүнки ол Евфрат дерясының гүнбатарындакы әхли велаятларда, Типсадан Газа ченли болан аралыкдакы Евфрат дерясының гүнбатарындакы әхли патышаларың үстүнден хөкүм сүрйәрди. Ол төверегиндәки гоңшы юртларының әхлиси билен асудалыкда яшады.

²⁵ Сүлейманың бүтин өмрүне Дандан Беершеба ченли аралыкдакы тутуш Яхудадакы ве Ысрайылдакы хер бир адам үзүм ве инҗир агачларының ашагында асудалыкда яшады.

²⁶ Шейле хем Сүлейманың сөвеш арабаларына гошулян атлары үчин кырк мүң саны ат ятагы, он ики мүң атлысы барды.

²⁷ Шол хәкимлериң хер бири Сүлейман патышаны ве онуң сачагындан иймитленйәнлериң барыны, өз белленен айларында азык билен үпҗүн эдйәрди. Оларың хич бир зады кемлик этмезди.

²⁸ Оларың херси өзүне табшырылышына гөрә, йөнекей ве сайлама атлар үчин оларың сакланян ерине арпа ве саман гетирерди.

²⁹ Худай Сүлеймана деңиз кенарындакы чәге дей учурсыз акыл-пайхас, дуйгурлык хем-де дүшүнҗелилик берди.

³⁰ Сүлейман пәхим-пайхасында бүтин гүндогарлылардан, бүтин мүсүрлилерден өңе гечди.

³¹ Чүнки онуң пәхим-пайхасы, ислендик адамыңкыдан, эзралы Эйтаныңкыдан, Махолың огуллары Хеймандыр Калколыңкыдан ве Дарданыңкыдан-да йитиди. Төверегиндәки әхли миллетлериң арасында онуң ады мешхурды.

³² Сүлейман үч мүң тымсал айтды; онуң нагмалары болса мүңден агдыкды.

³³ Ол Ливандакы кедр агаҗындан башлап диварың йүзүнде гөгерйән кәкилик отуна ченли болан агачлардан сөз ачарды, хайванлар, гушлар, сүйрениҗилер ве балыклар барада сөзләрди.

³⁴ Сүлейманың пәхим-пайхасы хакында эшиден ер йүзүндәки әхли патышалар Сүлейманы диңлемәге адам ёлладылар.