1 Patyşalar 16 - Мукаддес Китап

16-нҗы бап

¹ Багша гаршы Хананының оглы Ехува Реббиң шу сөзи аян болды:

² «Сен хич кимдиң, эмма Мен сени халкым ысрайыла патыша этдим. Сен Яробгамың ёлундан йөрәп, халкым ысрайыла гүнә этдирип, оларың гүнәлери билен мениң гахарымы гетирдиң.

³ Шонуң үчин хем Мен Багшаны ве онуң бүтин несиллерини Небадың оглы Яробгамың несиллери ялы ёк эдерин.

⁴ Багшаның несиллеринден галада өленлерини итлер, дүзде өленлерини гушлар иер».

⁵ Багшаның галан ишлери, онуң эдерменликлери барада ысрайыл патышаларының йыл язгыларында языландыр.

⁶ Багша ата-бабаларына говушды. Ол Тирсада ата-бабаларының янында җайланды. Оглы Эла онуң ерине патыша болды.

⁷ Хананының оглы Еху пыгамбере Багша ве онуң несиллерине гаршы Реббиң шу сөзи аян болды. Чүнки Багша Яробгамың несиллери ялы херекет этди ве Яробгамың несиллерини өлдүрди. Шейдип, ол Реббиң йигренйән ишлерини эдип, өз пис ишлери билен Онуң гахарыны гетирипди.

Ысрайыл патышасы Эла

⁸ Яхуда патышасы Асаның шалыгының йигрими алтынҗы йылында Багшаның оглы Эла Тирсада Ысрайыла патыша болуп, ики йыл шалык сүрди.

⁹ Эла Тирсада өз көшк эмелдары Арсаның өйүнде серхош болуп отырка, Зимри оңа гаршы дилдүвшүк гурды. Зимри сөвеш арабаларының ярысының серкердесиди.

¹⁰ Зимри гелип, Эланы өлдүрди ве өзи онуң орнуна патыша болды. Бу вака Яхуда патышасы Асаның шалыгының йигрими единҗи йылында болуп гечди.

¹¹ Зимри патыша болуп, Эланың тагтында отуран бадына, Багшаның бүтин несиллеринден, доган-гарындашларындан ве дост-ярларындан болан бар эркеги өлдүрди.

¹² Шейдип, Зимри Багшаның әхли несиллерини ёк этди. Реббиң Еху пыгамбериң үсти билен Багша гаршы айдан сөзлери берҗай болды.

¹³ Чүнки Багша ве онуң оглы Эла бутлар ясап, гүнә этдилер ве олар ысрайыл халкына-да гүнә этдирип, Ысрайыл Худайы Ребби газапландырдылар.

¹⁴ Эланың галан ишлери ве әхли эден ишлери барада ысрайыл патышаларының йыл язгыларында языландыр.

Ысрайыл патышасы Зимри

¹⁵ Яхуда патышасы Асаның патышалыгының йигрими единҗи йылында Зимри Тирсада еди гүн патышалык этди. Ысрайыл гошунлары пилиштлилере дегишли болан Гибетон галасының дашыны габапдылар.

¹⁶ Дүшелгедәки гошунлар Зимриниң Эла патыша гаршы дилдүвшүк эдип, оны өлдүрендиги барадакы хабары эшиденлеринде, ысрайыл халкы гошунбашы Омрыны дүшелгеде Ысрайыла патыша этдилер.

¹⁷ Шейдип, Омры бүтин ысрайыл халкы билен Гибетон галасындан чыкып, Тирсаның дашыны габадылар.

¹⁸ Зимри галаның басылып алнаныны гөренде, патыша көшгүниң ички галасына гирип, патышаның көшгүне от берип, ода янып өлди.

¹⁹ Зимри Яробгамың ёлундан йөрәп, Реббиң назарында йигренҗи ишлери этди. Ол өз эден гүнәлери ве Ысрайыла этдирен гүнәлери үчин өлди.

²⁰ Зимриниң галан ишлери ве гуран дилдүвшүги барада ысрайыл патышаларының йыл язгыларында языландыр.

Ысрайыл патышасы Омры

²¹ Зимри өленден соң, ысрайыл халкы ики бөлеге бөлүнди. Халкың ярысы Гинатың оглы Тибнини патыша этҗек болуп, онуң ызына эерди, галан ярысы болса Омрының ызына эерди.

²² Омрының ызына эерен халк, Гинатың оглы Тибниниң ызына эерен халкдан гүйчли болуп чыкды. Шейдип, Тибни өлүп, Омры онуң орнуна патыша болды.

²³ Яхуда патышасы Асаның шалыгының отуз биринҗи йылында Омры Ысрайыла патыша болуп, он ики йыл шалык этди. Омры Тирсада алты йыл шалык сүрди.

²⁴ Омры Самария байырлыгыны Шемерден үч ярым батман күмше сатын алып, байырлыкда шәхер гуруп, байырлыгың эеси Шемериң адына гөрә гуран шәхерине Самария дийип ат дакды.

²⁵ Омры Реббиң назарында йигренҗи ишлери этди. Онуң эден пис ишлери өзүнден өңки патышаларың әхлисиниңкиден чөкдер болды.

²⁶ Омры Небадың оглы Яробгам ялы гүнә этди. Ол ысрайыл халкына-да гүнә этдирип, Ысрайыл Худайы Ребби газапландырды.

²⁷ Омрының эден бейлеки ишлери ве гөркезен гайдувсызлыгы хем эдерменлиги барада ысрайыл патышаларының йыл язгыларында языландыр.

²⁸ Омры ата-бабаларына говушды. Ол Самарияда ата-бабаларының янында җайланды. Оглы Ахап онуң ерине патыша болды.

Ысрайыл патышасы Ахап

²⁹ Яхуда патышасы Асаның патышалыгының отуз секизинҗи йылында Омрының оглы Ахап Ысрайыла патыша болуп, Самарияда йигрими ики йыл шалык сүрди.

³⁰ Ахап Реббиң назарында йигренҗи ишлери этди. Онуң эден пис ишлери өзүнден өңки патышаларың әхлисиниңкиден чөкдер болды.

³¹ Ахаба Небадың оглы Яробгамың гүнәли ёлларындан йөремеклигиң өзем етерликди, йөне ол онуң үстесине сидонлыларың патышасы Этбагалың гызы Изебеле өйленип, Багала сежде этди.

³² Ахап Самарияда Багал үчин гуран бутханасында Багал үчин гурбанлык сыпасыны гурды.

³³ Ахап хем аял худайы Ашера бутуны ясады. Ахап Ысрайыл Худайы Реббиң гахарыны гетирмекде Ысрайылың өзүнден өңки патышаларының барындан оздурды.

³⁴ Ахабың дөврүнде бейтелли Хиел Ерихоны тәзеден дикелтди. Хиел онуң дүйбүни тутанда, новбахар оглы Абырамы гурбанлык этди. Ерихоның дервезелерини отурданда, ол иң кичи оглы Сегубы гурбанлык берди. Шейдип, Реббиң Нун оглы Ешува аркалы айдан сөзи берҗай болды.