1 Patyşalar 15 - Мукаддес Китап

15‑нҗи бап Яхуда патышасы Абыям

¹ Небадың оглы Яробгамың патышалыгының секизинҗи йылында Абыям Яхуда патыша болды.

² Абыям Иерусалимде үч йыл патышалык этди; онуң эҗесиниң ады Магакады. Ол Абышаломың гызыды.

³ Абыям хем какасының эден гүнәлерини гайталады. Ол атасы Давут ялы Реббе вепалы болмады.

⁴ Муңа гарамаздан, онуң Худайы Реб Иерусалими кувватландырмак үчин, Абыям өленден соң орнуна патыша болар ялы, оңа бир огул берди. Худай Реб муны Давудың хатырасы үчин этди.

⁵ Чүнки Давут диңе хетли Урыя эден яманлыгындан башга бүтин өмрүне Худайың назарында догры ишлери этди. Ол Реббиң өзүне берен табшырыкларының барыны өмүрбойы берҗай этди.

⁶ Рехабгам билен Яробгамың арасында башлан уруш Абыямың өмрүниң ахырына ченли довам этди.

⁷ Абыямың галан ишлери ве әхли эден ишлери Яхуда патышаларының йыл язгыларында языландыр.

⁸ Абыям ата-бабаларына говушды. Ол Давут галасында җайланды. Онсоң онуң ерине оглы Аса патыша болды.

Яхуда патышасы Аса

⁹ Ысрайыл патышасы Яробгамың патышалыгының йигриминҗи йылында Аса Яхуда патыша болды.

¹⁰ Аса Иерусалимде кырк бир йыл патышалык этди; онуң энесиниң ады Магакады. Ол Абышаломың гызыды.

¹¹ Аса атасы Давут ялы Реббиң назарында догры ишлери этди.

¹² Аса сеждегәхлериң азгын эркеклерини юртдан чыкарып, өз ата-бабаларының ясан әхли бутларыны ёк этди.

¹³ Аса патыша хатда эҗеси Магаканы меликеликден махрум этди, чүнки ол Ашера үчин йигренҗи бут ясапды. Аса Ашера бутуны кесип, Кидрон дересинде якды.

¹⁴ Эмма Ысрайылдакы сеждегәхлер ёк эдилмәнди. Муңа гарамаздан, Асаның йүреги бүтин өмрүнде Реббе вепалы болды.

¹⁵ Ол какасының хем-де өзүниң айдан садакаларыны, ягны күмши, алтыны ве гап-гачлары Реббиң өйүне гетирди.

¹⁶ Аса билен ысрайыл патышасы Багша бүтин өмүрлерине уруш этдилер.

¹⁷ Ысрайыл патышасы Багша Яхуданың үстүне чозды. Ол Яхуда патышасы Асаның янына гелип-гитмек ислейәнлериң ёлуны япмак үчин Рама галасыны беркитди.

¹⁸ Соңра Аса Реббиң өйүниң ве патыша көшгүниң хазыналарында галан әхли күмүшдир алтыны алып, олары өз көшк эмелдарларына берди. Аса олары Табрыммоның агтыгы, Хезёның оглы, Дамаскда яшаян Сирия патышасы Бенхадада иберди.

¹⁹ Аса өз эмелдарларындан Бенхадада шейле хабар ёллады: «Сениң какаң билен мениң какамың арасында болшы ялы, икимизиң арамызда-да ылалашык болсун. Мен саңа күмүшдир алтын совгат иберйәрин. Сен гит-де, Ысрайылың патышасы Багша билен эден ылалашыгыңы боз, ол мениң үстүмден совулсын».

²⁰ Бенхадат Аса патышаның айданларына гулак асды. Ол гошун серкерделерини иберип, Ыёны, Даны, Абелбейтмагаканы, тутуш Нафталы юрды билен бирликде бүтин Киннереди басып алды.

²¹ Багша муны эшиденде, Раманы беркитмекден эл чекип, Тирсада месген тутды.

²² Соңра Аса патыша Рама галасындакы Багшаның беркитме үчин уланып йөрен дашларыны, агачларыны алып гитмәге яхудалара буйрук берди. Аса патыша бу дашдыр агачлар билен Беняминдәки Геба галасыны ве Миспа галасыны беркитди.

²³ Асаның галан әхли ишлери, онуң гайдувсыз эдерменликлери, әхли эден ишлери ве беркиден галалары барада яхуда патышаларының йыл язгыларында языландыр. Гоҗалан чагында, ол аякдан дерт чекди.

²⁴ Аса ата-бабаларына говушды. Ол ата-бабаларының янында, атасы Давут галасында җайланды. Оглы Ехошапат онуң ерине патыша болды.

Ысрайыл патышасы Надап

²⁵ Яхуда патышасы Асаның патышалыгының икинҗи йылында Яробгамың оглы Надап Ысрайыла патыша болды. Ол Ысрайылда ики йыл патышалык этди.

²⁶ Надап Реббиң назарында йигренҗи ишлери этди. Ол какасының ысрайыл халкына этдирен гүнәли ёлларындан йөреди.

²⁷ Ысакар неслинден болан Ахыяның оглы Багша Надаба гаршы дилдүвшүк гурды. Багша пилиштлилере дегишли болан Гибетонда Надабы өлдүрди, чүнки Багша билен бүтин ысрайыллар Гибетоның дашыны габапдылар.

²⁸ Шейдип, Багша яхуда патышасы Асаның шалыгының үчүнҗи йылында Надабы өлдүрип, онуң ерине өзи патыша болды.

²⁹ Ол патыша болан дессине Яробгамың несиллериниң барыны гырды, Реббиң Өз гулы шилолы Ахыя аркалы айдан сөзүне гөрә, Яробгамың несиллеринден бир адам хем дири галдырылман, оларың бары өлдүрилди.

³⁰ Бу Яробгамың Ысрайыл Худайы Реббиң гахарыны гетирендиги зерарлы, өз эден ве Ысрайыла этдирен гүнәлери зерарлы болды.

³¹ Надабың галан ишлери ве әхли эден ишлери барада ысрайыл патышаларының йыл язгыларында языландыр.

³² Аса билен ысрайыл патышасы Багша бүтин өмүрлерини уршуп гечирдилер.

Ысрайыл патышасы Багша

³³ Яхуда патышасы Асаның шалыгының үчүнҗи йылында Ахыяның оглы Багша Тирсада бүтин Ысрайылың үстүнден патышалык эдип, йигрими дөрт йыл хөкүм сүрди.

³⁴ Багша хем Яробгам ялы Ысрайыла гүнә этдирип, Реббиң назарында йигренҗи ишлери этди.