1 Patyşalar 14 - Мукаддес Китап

14‑нҗи бап Яробгамың оглы өлйәр

¹ Шол вагтларда Яробгамың оглы Абыя сыркавлады.

² Яробгам өз аялына шейле дийди: «Бар, Яробгамың аялыдыгың билинмез ялы башга гейиме гир-де, Шило гит, чүнки Ахыя пыгамбер шол ердедир. Ол мениң бу халка патыша болҗагымы айдыпды.

³ Элиңе он чөрек, күлчелер, бир голча-да бал алып, онуң янына гит; ол саңа оглумыза нәме болҗагыны айдып берер».

⁴ Яробгамың аялы шейле-де этди. Ол Шило гидип, Ахыяның өйүне барды. Ахыя көрди, чүнки гоҗалыкдан яңа онуң гөзлери чөңңелипди.

⁵ Онсоң Реб Ахыя: «Яробгамың аялы сыркав оглы хакда сорамага гелер» дийди. Реб Ахыя Яробгамың аялына нәме җогап бермелидигини айтды. Ол геленде, нәтаныш аял болуп гелди.

⁶ Эмма ол аял гапыдан гирип гелйәркә, Ахыя онуң аяк сесини эшидип: «Эй, Яробгамың аялы, ичери гирибер. Сен нәме үчин нәтаныш аял болан болярсың? Менде сениң үчин гаты эрбет хабар бар.

⁷ Гит-де, Яробгама Ысрайыл Худайы Реб шейле диййәр дий: „Мен сени халкың арасындан сайлап, халкым Ысрайылың үстүнден патышалыга белледим.

⁸ Патышалыгы Давудың неслинден алып, саңа бердим. Эмма сен Мениң табшырыкларымы берҗай эдип, Мениң назарымда догры ишлери эдип, бүтин калбы билен Маңа вепалы болан гулум Давут ялы болмадың.

⁹ Гайтам, сен өзүңден өңки патышаларың барындан бетер пислик этдиң. Сен гуйма алтын гөле бутларыны ясап, олара сежде эдип, Мениң гахарымы гетирдиң ве Менден йүз өвүрдиң.

¹⁰ Шонуң үчин хем Мен Яробгамың несиллериниң башындан бетбагтчылык индерерин. Исле азат болсун, исле гул, пархы ёк, Яробгамың неслинден болан Ысрайылдакы хер бир эркеги бүтинлей ёк эдерин. Дерсиң сырылып-сүпүрилип ташланышы ялы, Мен Яробгамың несиллериниң барыны иң соңкусына ченли бүтинлей ёк эдерин.

¹¹ Яробгамың несиллериниң галада өленлерини итлер, дүзде өленлерини гушлар иер, чүнки Реб шейле дийди“.

¹² Инди сен тур-да, өйүңе гит. Сен гала аяк басан бадыңа, оглуң өлер.

¹³ Бүтин ысрайыл халкы онуң ясыны тутуп, оны җайлар. Яробгамың машгаласындан диңе шу оглан дәбе гөрә җайланар. Чүнки Яробгамың неслинден диңе шу оглан Ысрайыл Худайы Реббиң гөвнүнден турды.

¹⁴ Реб Өзи үчин Ысрайылың үстүнден бир патыша гояр. Ол Яробгамың неслини хут шу гүн, эдил шу пурсатда ёк эдер.

¹⁵ Реб Ысрайыла җеза берер. Ол ысрайыл халкыны сувуң башында ыранян гамыш кимин сарсдырар. Реб ысрайыллары оларың ата-бабаларына берен говы юрдундан чыкарып, олары Евфрат дерясының аңры тарапына даргадар, чүнки олар Ашера бутларыны ясап, Реббиң гахарыны гетирдилер.

¹⁶ Яробгамың өз эден хем-де Ысрайыла этдирен гүнәлери зерарлы, Реб Ысрайылы терк эдер».

¹⁷ Соңра Яробгамың аялы ызына гайтды. Ол Тирса гелип, өйүниң ишигине етен бадына, онуң чагасы ёгалды.

¹⁸ Бүтин ысрайыл халкы чаганы җайлап, онуң ясыны тутдулар. Шейдип, Реббиң Өз гулы Ахыя пыгамбер аркалы айдан сөзи амала ашды.

Яробгамың өлүми

¹⁹ Яробгамың галан ишлери, онуң эден сөвешлери ве нәхили патышалык эдендиги барада ысрайыл патышаларының йыл язгыларында языландыр.

²⁰ Яробгам йигрими ики йыл патышалык этди. Ол ата-бабаларына говушды. Онуң ерине оглы Надап патыша болды.

Яхуда патышасы Рехабгам

²¹ Сүлейманың оглы Рехабгам Яхудада патышалык этди. Рехабгам патыша боланда кырк бир яшындады; ол Реббиң Өзүне ыбадат эдилмеги үчин Ысрайылың бүтин тирелеринден сайлан шәхери Иерусалимде он еди йыл патышалык этди. Эҗеси аммонлы болуп, онуң ады Нагамады.

²² Яхуда халкы Реббиң назарында йигренҗи ишлери эдип, ата-бабаларының эден гүнәлеринден-де хас бетер гүнә этдилер. Олар Реббиң габанҗаңлыгыны оярдылар.

²³ Чүнки олар хем хер бир бейик байырда, гүр япраклы хер бир агаҗың астында өзлерине сеждегәхлери, дикме дашларыны хем-де Ашера бутларыны гурдулар.

²⁴ Шейле хем юртдакы сеждегәхлериң азгын эркеклери барды. Олар Реббиң ысрайылларың өңүнден ковуп чыкаран миллетлериниң неҗис ишлерини этдилер.

²⁵ Рехабгамың патышалыгының бәшинҗи йылында Мүсүр патышасы Шишак Иерусалиме хүҗүм этди.

²⁶ Ол Реббиң өйүндәки хазыналарың, патышаның көшгүндәки хазыналарың барыны талады. Ол Сүлейманың алтындан ясадан әхли галканларыны хем алып гитди.

²⁷ Рехабгам патыша болса оларың дерегине бүрүнчден галканлар ясадып, олары патышаның көшгүниң гапысыны саклаян гаравулларың баштутанларының элине берди.

²⁸ Патыша хер сапар Реббиң өйүне гиденде, гаравуллар олары гөтерип гетирип, соңра ене ызына гаравулхана әкидйәрдилер.

²⁹ Рехабгамың галан ишлери ве әхли эден ишлери барада Яхуда патышаларының йыл язгыларында языландыр.

³⁰ Рехабгам билен Яробгамың арасында хемише уруш болды.

³¹ Рехабгам ата-бабаларына говушды. Ол ата-бабаларының янында, Давут галасында җайланды. Онуң эҗеси аммонлы болуп, ады Нагамады. Рехабгамың ерине оглы Абыям патыша болды.