1 Korintoslylar 9 - Мукаддес Китап

9-нҗы бап Ресулың хак-хукуклары

¹ Эйсем мен азат дәлми нәме? Я мен ресул дәлми? Мен Реббимиз Иса Месихи өз гөзүм билен гөрмедимми нәме? Эйсем сиз мениң Реб үчин чекен зәхметимиң нетиҗеси дәлми?

² Башгалар мени ресул хасапламасалар-да, мен сизиң үчин ресулдырын! Чүнки сиз Реб ёлундакы ресуллыгымың мөхүрисиңиз.

³ Ресуллыгымың хак-хукуклары бабатда мени танкытлаянлара, ине, шуны диймекчи.

⁴ Эйсем бизиң ийип-ичмәге хакымыз ёкмы?

⁵ Иманлы болса, аялымызы янымыз билен әкитмәге хакымыз ёкмы? Петрус ве бейлеки ресуллар, Реббимиз Исаның инилери хем хут шейле эдйәр ахыры.

⁶ Я-да мен билен Барнабың иманлылардан мадды көмегини алмага хакымыз ёкмы?

⁷ Гуллукдакы эсгерлер өз хасабына яшаярлармы? Эйсем мивесинден иймеҗек болса, үзүм агаҗыны отурдян бармы? Сүри бакып-да, онуң сүйдүни ичмейән бармы?

⁸ Мен муны диңе ынсан нукдайназарындан айтмаярын. Канун хем бу бабатда шейле диймейәрми нәме?

^9-10 Чүнки Төвратда: «Харман дөвйән өкүзиң агзыны багламаң» дийип язылгыдыр. Худай муны бүтинлей бизиң үчин айтмаярмы? Эйсем Ол өкүзлериң аладасыны эдйәрми? Хава, бу бизиң үчин языландыр. Чүнки ер сүрйән-де, дөвек дөвйән-де хасылдан пай алмак умыды билен ишлейәндир.

¹¹ Биз араңызда рухы затлары экип, сизден мадды хасылы орсак, муны җуда көп гөрерсиңизми?

¹² Эгер башгалар сизден мадды көмеги алмага хаклы болса, онда биз олардан-да көп хаклыдырыс! Йөне биз бу хакымыздан пейдаланмадык. Терсине, Месихиң Хош Хабарының яйрамагына пәсгел бермеҗек болуп, әхли зада чыдаярыс.

¹³ Ыбадатханада хызмат эдйәнлер өз ийҗегини ыбадатханадан алярлар. Гурбанлык сыпасында хызмат эдйәнлер-де гурбанлык садакаларындан пай алярлар. Булары өзүңизем билйәнсиңиз.

¹⁴ Реб Хош Хабары вагыз эдйәнлериң-де Хош Хабардан экленмегини буйрандыр.

¹⁵ Йөне мен бу хак-хукукларымың биринден-де пейдаланан дәлдирин. Мен муны язмак билен сизден хак-хукугымы талап этмекчи боламок. Мениң бу магтанмамы, гой, хич ким пуҗа чыкармасын. Шейле боланындан, өленим говудыр!

¹⁶ Мен Хош Хабары вагыз эдйәним билен магтанмага хаклыдырын өйдемок: муны этмек борҗумдыр. Эгер мен Хош Хабары вагыз этмесем, вай, мениң халыма!

¹⁷ Эгер мен муны өзүм сайлан болсадым, онда сылага тамакин болардым. Эмма муны маңа Худай буюрды.

¹⁸ Онда сылагым нәмедир? Хош Хабары хич бир муздсуз вагыз эдип, онуң маңа берйән хак-хукугындан пейдаланмазлык мениң үчин сылагдыр.

Павлус хер кесиң гулудыр

¹⁹ Мен азат болсам-да, хер кеси газанҗак болуп, хеммелериң гулы болдум.

²⁰ Яхудылары газанҗак болуп, олар үчин яхуды болдум. Мен Мукаддес Кануның гулы болмасам-да, Мукаддес Кануна гөрә яшаянлары газанҗак болуп, Мукаддес Кануның гулы болдум.

²¹ Мен Худайың Кануныны билмейәнлери газанҗак болуп, оны билмедиксирән болдум. Хакыкатда велин, Худайың Канунына гөрә яшап, Месихиң буйрукларына табындырын.

²² Эҗизлери газанҗак болуп, эҗизе өврүлдим. Гараз, кәбирлери халас этҗек болуп, мен хеммелере хер зат болдум.

²³ Мен буларың барыны Хош Хабарың ак паталарына шәрик болуп билерим ялы, Хош Хабарың хатырасына эдйәрин.

²⁴ Ярыша гатнашян йүврүклериң хеммеси ылгаса-да, байрагы диңе бири аляндыр. Сиз-де байрак алар ялы шейле ылгаң.

²⁵ Ярыша гатнашян хер кес өзерклилиги түргенлешдирйәндир. Ол муны вагтлайын бир тәҗи алмак үчин эдйәр. Биз болса муны бакы тәҗи алмак үчин эдйәндирис.

²⁶ Шоңа гөрә-де, мен максатсыз ылгаянлар ялы ылгамаярын, хованы юмруклаян киши ялы херекет этмейәрин.

²⁷ Ёк, мен Хош Хабары башгалара вагыз эденимден соң, ярыша гатнашмакдан махрум эдилесим гелмейәр. Шонуң үчин-де, беденими түргенлешдирип, оны өзүме табын эдйәрин.