1 Korintoslylar 8 - Мукаддес Китап

8‑нҗи бап Бутлара берилйән гурбанлык

¹ Инди болса бутлара гурбанлык берилйән эт барада шулары айтмакчы. Сизиң: «Әхлимизиң билимимиз бар» дийип айдяныңыз догрудыр. Йөне билим ынсаны текепбир эдйәр, сөйги болса оңа өвүт берйәндир.

² Ким хайсыдыр бир зады эййәм билйәндирин өйтсе, онда ол хениз билмелиси ялы билйән дәлдир.

³ Эмма ынсан Худайы сөййән болса, ол эййәм Худай тарапындан таналяндыр.

⁴ Шунлукда, бутлара гурбанлык берлен эти ийип-иймезлик барада шуны айтмакчы. Сизиң: «Бут аслында хичдир. Еке-тәк бир Худай бардыр» диййәниңиз догрудыр.

⁵ Хатда ерде я гөкде «худай» дийлип атландырылянлар бар болайса-да (аслында «худайлар» хем «хөкүмдар» сайылянлар көпдүр),

⁶ бизиң үчин еке-тәк Худай бардыр, Ол бизиң Атамыздыр, әхли задың гөзбашы-да Олдур. Биз Онуң үчин яшаяндырыс. Бизиң үчин еке-тәк Хөкүмдар бар, Ол Реббимиз Иса Месихдир, хемме зат Ол аркалы ярадыландыр. Биз Ол аркалы яшаяндырыс.

⁷ Эмма бу билим хемме адамларда ёкдур. Кәбир адамлар бутпаразлык пикирлеринден сапланып билмән, бу гурбанлык этини иенлеринде, хениз-де бута сежде эдйәндир өйдйәрлер. Бу хем оларың эҗиз ынсабыны мурдар эдйәр.

⁸ Йөне иймит бизи Худая якынлашдырмаяр. Иймәнимиз билен зыян чекемзок, иенимиз билен-де пейда гөремзок.

⁹ Өз азатлыгыңыза сересаплы чемелешиң. Сизиң азатлыгыңыз ынсабы эҗиз болан доганларың бүдремегине себәп болмасын!

¹⁰ Чүнки олардан бири сени, ягны билими боланы, бутханада сачак башында гөрмеги ахмал. Шонда онуң ынсабы эҗизләп, бута берлен гурбанлыгы иймәге ымтылмазмы?

¹¹ Шунлукда, эй, доган, бу ынсабы эҗиз доган сениң билимиң аркалы вейран эдилди. Иса Месих болса онуң угрунда өлди.

¹² Сиз өз доганларыңызың эҗиз ынсабыны яраламак билен, олара гаршы гүнә эдениңизде, Иса Месихе гаршы гүнә эдйәнсиңиз.

¹³ Шоңа гөрә-де, иййән задым доганымың бүдремегине себәп болҗак болса, мен оны асла иймерин. Мен онуң бүдремегини исләмок.