1 Korintoslylar 7 - Мукаддес Китап

7‑нҗи бап Ника барада

¹ Инди болса сизиң маңа: «Эркегиң аяла янашмазлыгы ягшыдыр» дийип язанларыңыз барада айтмакчы.

² Азгынлыга ёл бермезлик үчин, гой, хер эркек өз аялы, хер аял-да өз әри билен яшасын.

³ Әр өз аялы бабатда, аялы-да өз әри бабатда әр-аяллык борчларыны берҗай этмелидирлер.

⁴ Аялың бедени өзүниң дәл-де, әриниң ыгтыярындадыр. Әри бабатда хем шейледир: әриниң бедени өзүниң дәл-де, аялының ыгтыярындадыр.

⁵ Диңе Худая дога эдйән вагтыңыз болаймаса, башга вагт бири-бириңизи әр-аяллык хукугындан махрум этмәң. Бу хем өзара ылалашыга гөрә диңе вагтлайын болсун. Соңра гайтадан биригиң. Ёгса өзүңизе эрк эдип билмейәнлигиңизден пейдаланып, шейтан сизи аздыраймасын.

⁶ Мен булары буйрук дәл-де, маслахат хөкмүнде айдярын.

⁷ Элбетде, хер кимиң мен ялы болмагыны ислейәрин. Йөне хер кимиң Худайдан алан өз пешгеши бардыр: бириниң пешгеши бейледир, башганың пешгеши эйледир.

⁸ Эмма дул галан эркеклере ве аяллара шейле диййәрин: олара мен ялы өйленмезлик ягшыдыр.

⁹ Эмма өзлерине эрк эдип билмейән болсалар, онда өйленсинлер. Чүнки ышк хесерине янандан, өйленмек ягшыдыр.

¹⁰ Никадакылара болса мен дәл-де, Реб буюряндыр: аял өз әринден айрылмасын.

¹¹ Эгер айрылан болса, башга әре бармасын я-да өз әри билен ярашсын. Әр-де өз аялындан айрылмасын.

¹² Бейлекилере болса Реб дәл-де, мен диййәрин: эгер хайсыдыр бир доганың иман этмедик аялы бар болса, ол аял хем онуң билен яшамага разы болса, онда бу доган өз аялы билен айрылышмасын.

¹³ Эгер аялың иман этмедик әри бар болса, әри-де онуң билен яшамага разы болса, бу аял әри билен айрылышмасын.

¹⁴ Чүнки иман этмедик әр өз аялы аркалы Худая дегишли боляндыр. Иман этмедик аял-да өз иман эдйән әри аркалы Худая дегишлидир, ёгса сизиң чагаларыңыз Худайың халкына дегишли болмаздылар. Инди велин олар дегишлидир.

^15-16 Худай бизи билеликде парахат яшамага чагырандыр. Эй, аял, белки, әриң сен аркалы халас эдилер. Эй, әр, белки, аялың сен аркалы халас эдилер. Эмма иман этмедик янёлдаш айрылышҗак болса, гой, айрылышсын. Иманлы әр я-да аял шейле ягдайларда борчлы дәлдир.

¹⁷ Йөне хер нәхили болса-да, хер кес Реббиң оңа беллейши ялы, Худай оны хайсы халда чагыран болса, шоңа гөрә-де яшасын. Мен муны хемме йыгнаклара буюрярын.

¹⁸ Эгер кимдир бири сүннетликә чагырылан болса, гой, сүннетлилигини сүннетсизлиге өвүрҗек болуп азара галмасын. Эгер кимдир бири сүннетсизкә чагырылан болса, сүннетленҗек болмасын.

¹⁹ Сүннетлилик-де, сүннетсизлик-де хичдир. Иң эсасы зат Худайың табшырыкларыны берҗай этмекдир.

²⁰ Ким хайсы халда чагырылан болса, шонда-да галсын.

²¹ Сен гул вагтың чагырылдыңмы? Гой, бу сени биынҗалык этмесин. Йөне азат болуп билйән болсаң, пурсады элден гидерме.

²² Чүнки гул вагты Реб тарапындан чагырылан киши Онуң азат бендесидир. Шонуң ялы, азат вагты Реб тарапындан чагырылан киши Месихиң гулудыр.

²³ Сиз улы баха сатын алындыңыз. Адамларың гулы болмаң!

²⁴ Эй, доганлар, хер кес Худай тарапындан нәхили халда чагырылан болса, гой, шол халда-да галсын.

Адагланма, өйленме ве өйленмезлик барада

²⁵ Өйленмедик яшлар бабатда Ребден алан буйругым ёк. Йөне Реббиң мерхемети аркалы ынамдар киши хөкмүнде маслахат берйәрин.

²⁶ Шу мушакгатлы дөвүрде хер кесиң өңки халында галаны ягшыдыр.

²⁷ Эгер эййәм өйленен болсаң, никаңы бозма. Хениз өйленмедик болсаң, онда гелинлик гөзлеме.

²⁸ Йөне өйленсең-де, бу гүнә дәлдир. Бой гыз хем дурмуша чыкса гүнә дәлдир. Эмма дурмуш гуранлар бу дурмушда көп кынчылыклара дучар боларлар. Мен сизи шолардан горамак ислейәрин.

²⁹ Эй, доганлар, мен сизе шуны хем айтмакчы: белленилен вагт җуда голайландыр. Шоңа гөрә-де, машгаласы боланлар эдил машгаласы ёк адамлар ялы болсун.

³⁰ Аглаянлар агламаянлар ялы, шатланянлар шатланмаянлар ялы, эмләк эдинйәнлер эдил эмләги болмадыклар ялы яшасын.

³¹ Бу дүнйәниң ишлерине мешгул кишилер-де өз вагтыны олара совурмасын. Чүнки бу дүнйә соңланып баряндыр.

³² Мен сизиң хысырдылы аладалардан азат болмагыңызы ислейәрин. Өйленмедик киши Реббиң гөвнүнден турҗак болуп, Реббиң ишлерини алада эдйәндир.

³³ Эмма өйленен киши өз аялының гөвнүнден турҗак болуп, бу дүнйәниң ишлерини алада эдйәндир.

³⁴ Шейдип, онуң калбы икә бөлүнендир. Әрсиз аял я-да дурмуша чыкмадык гыз Реббиң ишлериниң аладасыны эдип, өзүни җан-тенден Реббе багыш эдендир. Эмма әрли аял өз әриниң гөвнүнден турҗак болуп, бу дүнйәниң ишлерини алада эдйәндир.

³⁵ Мен булары сизи чәклендирмек үчин айтмаярын. Терсине, тутуш калбыңызы Реббе багыш эдип, догры яшарыңыз ялы, сизиң пейдаңыза айдярын.

³⁶ Эгер йигит хесер одуна чыдаман, өз адагланан гызына болмалысы ялы гарамаса ве өйленмек карарына гелсе, гой, өйлениберсин, бу гүнә дәлдир.

³⁷ Эмма ол өйленмезлиги йүрегине дүвен болса, бу бабатда мәтәчлиги болман, өзүне эрк этмеги башарып, берк карара гелен болса, онда ол говы эдйәр.

³⁸ Шунлукда, адаглысына өйленйән говы эдйәндир. Өйленмейән болса ондан-да говы эдйәндир.

³⁹ Аял әри өлйәнчә, оңа баглыдыр. Әри өлсе, өз исләнине бармага ыгтыярлыдыр. Йөне онуң барҗагы Реббе иман эдйән болмалыдыр.

⁴⁰ Ол дул аял дуллугына галса, хас-да багтыярдыр. Бу мениң пикирим. Мен болса өзүмде Худайың Рухы бар дийип хасаплаярын.