1 Korintoslylar 6 - Мукаддес Китап

6-нҗы бап Иманлыларың арасындакы давалар

¹ Сиз имандакы доганыңыз билен давалашаныңызда, нәме үчин онуң меселесине казыетде имансызларың өңүнде гараярсыңыз?! Эйсем сиз муны Худайың халкының өңүнде чөзмели дәлми?

² Сиз Худайың халкының бу дүнйә казылык этҗекдигини билмейәрсиңизми? Эгер сиз дүнйә казылык этҗек болсаңыз, хей-де овнук-ушак давалары чөзүп билмерсиңизми?

³ Эйсем сиз бизиң хатда перишделере-де казылык этҗекдигимизи билмейәрсиңизми? Гүнделик дурмушың ишлери барада гүррүң-де ёк!

⁴ Шейле даваларыңыз бар болса, нәме үчин олары йыгнага дегишли болмадыкларың казылыгына табшырярсыңыз?

⁵ Шейле этмәге утанмаярсыңызмы? Эйсем араңызда доганларың давасыны чөзүп билҗек бир дана-да ёкмы?

⁶ Терсине, доган доганы билен казыетде давалашяр. Мунуң үстесине-де, олар муны имансызларың өңүнде эдйәрлер!

⁷ Аслында бири-бириңиз билен казыетде давалашмагың өзи сизиң эййәм еңлендигиңизи хабар берйәр. Эйсем хаксызлыга чыданыңыз говы дәлми? Талаңа чыданыңыз говы дәлми?

⁸ Сиз болса адалатсызлык эдйәрсиңиз, алдаярсыңыз. Өзем кими? Өз доганларыңызы!

⁹ Эйсем сиз яманлык эдйәнлериң Худайың Шалыгыны мирас алмаҗакдыгыны билмейәрсиңизми? Өз-өзүңизи алдамаң! Не азгынлар, не-де бутпаразлар, не зынахорлар, не-де эркекбазлар, не бечебазлар,

¹⁰ не-де огры-җүмрүлер, не бетнебислер, не-де аракхорлар, не пайыш сөгүнйәнлер, не-де кеззаплар – шуларың бири-де Худайың Шалыгыны мирас алмаз.

¹¹ Сизиң-де кәбирлериңиз шолар ялыдыңыз. Йөне сиз Реббимиз Иса Месихиң ады билен Худайымызың Рухы аркалы ювулдыңыз, Худайың мукаддес халкы болдуңыз, акландыңыз.

Иманлыларың арасындакы җынсы азгынлык

¹² Сиз: «Мен хер зады этмәге хакым бар» диййәрсиңиз. Хава, йөне хер зат сизиң үчин бәхбитли дәлдир. Мен хем ислән задымы этмәге хакым бар дийип билйәрин, йөне хич зат мениң үстүмден агалык сүрмели дәлдир.

¹³ Сиз: «Нахар гарын үчин, гарын-да нахар үчиндир. Худай оларың икисини хем ёк эдер» дийип догры айдярсыңыз. Эмма беден азгынчылык үчин дәл-де, Реббе хызмат этмек үчин берлендир. Реб хем беденимиз барада алада эдйәндир.

¹⁴ Худай Өз гүйҗи аркалы Реб Исаны дирелтди. Ол бизи хем дирелдер.

¹⁵ Эйсем сиз өз бедениңизиң Иса Месихиң бедениниң агзасыдыгыны билмейәрсиңизми? Инди Месихиң агзасыны алып, оны бир лолы билен бирикдирейинми? Асла этмен!

¹⁶ Эйсем сиз өзүни лолы билен бирикдирениң онуң билен бир тен боляндыгыны билмейәрсиңизми? Чүнки Төвратда: «Икиси бир тен боляр» дийип язылгыдыр.

¹⁷ Реб билен бириген хем рухда Онуң билен бир болар.

¹⁸ Азгынлыкдан гачың. Адам хер нәхили гүнә этсе-де, ол онуң тенине галташян дәлдир. Эмма азгынлык эдйән өз тенине гаршы гүнә эдйәндир.

¹⁹ Эйсем сиз өз бедениңизиң Мукаддес Рухуң яшаян ыбадатханасыдыгыны билмейәрсиңизми? Сиз бу Рухы Худайдан алдыңыз. Сиз диңе өзүңизиңки дәлсиңиз.

²⁰ Сиз баха, онда-да улы баха сатын алнансыңыз. Шоңа гөрә-де, өз бедениңиз билен Худайы шөхратландырың.