1 Korintoslylar 4 - Мукаддес Китап

4‑нҗи бап

¹ Адамлар бизе, гой, Месихиң хызматчылары, Худайың сырларыны аян эдйән хызматчылар хөкмүнде гарасынлар.

² Шейле хызматчылардан болса садыклык талап эдилйәндир.

³ Сизиң я-да ислендик ынсан казыетиниң маңа нәхили хөкүм чыкаряндыгы мени аз гызыкландыряр. Өз үстүмден хатда өзүм-де хөкүм чыкарамок.

⁴ Ынсабым пәк болса болуберсин, йөне бу барыбир мени акламаяр. Маңа Реб казылык эдйәндир.

⁵ Шоңа гөрә-де, белленилен вагт етйәнчә, хич кимиң үстүнден хөкүм чыкармаң. Реб гелйәнчә гарашың. Ол гараңкылыкдакы гизлин затлары ягтылыга чыкарар, адамларың йүрек ниетлерини аян эдер. Шонда хер кес Худайдан өз эденине лайык өвгүсини алар.

⁶ Эй, доганлар! Мен айданларымың барыны сизиң пейдаңыза болсун дийип, өзүм ве Аполло барада айтдым. Шонда сиз гөрелдәмиз аркалы «Языланың чәгинден чыкмаң» дийленине дүшүнип, кимдир бирини бейлекиден ёкары тутмарсыңыз.

⁷ Эйсем сиз бейлекилерден үйтгешикми? Сиз өзүңиздәкилериң барыны Худайдан алмадыңызмы нәме? Эгер Ондан алан болсаңыз, нәме үчин өзүңиз газанан ялы өвүнйәрсиңиз?!

⁸ Сиз эййәм доюп, аша дүшүпсиңиз! Сиз эййәм баяпсыңыз! Бизсиз хөкүм сүрдүңиз. Вах, кәшгә догрудан-да хөкүм сүрседиңиз! Шонда биз-де сизиң билен биле хөкүм сүрердик.

⁹ Худай бизи, ягны ресуллары, дабаралы йөришде иң соңкы хатарда гояйды өйдйән. Биз мәрекәниң гөз алнында өлдүрилҗеклер кимин болдук. Хава, биз тутуш әлем-җахана: перишделере-де, ынсанлара-да томаша болдук.

¹⁰ Биз Месихе болан иманымызың хатырасына акмакдырыс, сиз болса Месихиң саясында пайхаслысыңыз! Биз эҗиз, сиз болса гүйчлүсиңиз! Сиз ат-абрайлы, биз болса биабрайдырыс!

¹¹ Биз хениз хем ач-сувсуз, эшиклеримиз сал-салдыр. Биз енҗилйәрис, өйсүз-өвзарсыз сергездандырыс.

¹² Биз гара дер дөкүп, зәхмет чекйәрис. Бизе гарганларында, олара ягшылык дилейәрис. Бизи ызарланларында, муңа чыдаярыс.

¹³ Бизе мыҗабат йөңкәнлеринде, мылайымлык билен җогап берйәрис. Биз шу пурсада ченли ер йүзүниң чөп-чөри, дүнйәниң зир-зибили кимин боландырыс.

¹⁴ Мен булары сизи утандырмак үчин дәл-де, сизе несихат болсун дийип язярын, себәби сиз мениң эзиз балаларым ахырын!

¹⁵ Месихиң ёлунда сизиң мүңлерче тербиечиңиз болса-да, аталарыңыз аздыр. Мен Хош Хабар аркалы сизиң Иса Месихдәки атаңыз болдум.

¹⁶ Шоңа гөрә-де, ялбарярын: мениң ялы болуң.

¹⁷ Ине, Тимотеосы шу максат билен яныңыза ибердим. Ол мениң сөйгүли оглум ве Реббиң садык гулудыр. Ол мениң Иса Месихиң йөрелгесине эерйәндигими сизе ятладар. Мен әхли ерде ве хер йыгнакда бу йөрелгә эермеги өвредйәндирин.

¹⁸ Сизиң кәбирлериңиз мен яныңыза бармарын өйдүп, текепбирлиге йүз урдулар.

¹⁹ Худай ёл берсе, мен тизара сизе барҗакдырын. Шонда оларың гепини дәл-де, гүйҗүни гөрәерин.

²⁰ Чүнки Худайың Шалыгы сөзде дәл-де, гүйчдедир.

²¹ Мен сизе нәме билен барайын? Гамчы биленми я-да сөйги ве юмшаклык биленми? Сиз буларың хайсыны сайлаярсыңыз?