1 Korintoslylar 3 - Мукаддес Китап

3‑нҗи бап

¹ Эй, доганлар, мен сизиң билен Мукаддес Рухдан долан ынсанлар хөкмүнде гүрлешип билмедим. Мен сизе бу дүнйәниң ынсанларына, Месихе яңы-якында иман эден ынсанлара гүррүң берен ялы гүррүң бердим.

² Сизе гаты-гуты бермедим, сүйт бердим. Себәби сиз гаты-гутыны иймәге хениз тайын дәлдиңиз. Шинди хем тайын дәлсиңиз.

³ Бу дүнйә хениз-де сизе өз тәсирини етирйәр, себәби араңызда гөриплик, дава-җенҗел бар. Эйсем булар сизиң дүнйә дегишлидигиңизи аңлатмаярмы? Сиз дүнъеви адамлар ялы херекет этмейәрсиңизми нәме?

⁴ Бириңиз «мен Павлусың шәгирди», башгаңыз «мен Аполлоның шәгирди» диййәрсиңиз. Эйсем шейле диймек билен, дүнъеви адамлар ялы херекет этмейәрсиңизми?

⁵ Аполло ким? Павлус ким? Булар сизиң Иса Месихе иман гетирмегиңизе ярдам берен хызматчылар ахырын. Реббиң беллейши ялы, бизиң херимиз өз ишимизи ерине етирдик.

⁶ Мен тохум экдим, Аполло суварды. Эмма өсдүрен Худайдыр.

⁷ Шунлукда, экен-де, суваран-да хичдир. Диңе өсдүрйән Худай әхмиетлидир.

⁸ Экйәниң-де, суваряның-да максады бирдир. Оларың херси өз чекен зәхметине гөрә сылагланар.

⁹ Чүнки биз Худайың ишдешидирис; сиз Худайың экини, Онуң ымаратысыңыз.

¹⁰ Мен Худайың өзүме берен мерхемети аркалы уссат бинагәр кимин ымаратың бинядыны тутдум. Башга бири болса бинаны гуряр. Йөне хер кес өз гуряны бабатда үнсли болмалыдыр.

¹¹ Хич ким эййәм тутулан бинятдан, ягны Иса Месихден башга бир биняды тутуп билмез.

¹² Бу бинядың үстүнде болса кимиң алтындан, күмүшден, гымматбаха дашлардан, агачдан, чөп-чаламдан я-да самандан

¹³ гурандыгы соңра белли болар. Бу Реббиң гүнүнде от-алав аркалы аян болар. От-алав хер кесиң эден ишиниң нәхилидигини сынар.

¹⁴ Эгер онуң гуран бинасы ода чыдаса, ол өз сылагыны алар.

¹⁵ Гуран бинасы отда көйсе, ол йитги чекер. Йөне алтын-күмшүң отда арассаланышы ялы сапланып, халас болар.

¹⁶ Эйсем сиз өзүңизиң Худайың ыбадатханасыдыгыңызы, араңызда Худайың Рухуның яшаяндыгыны билмейәрсиңизми?

¹⁷ Худайың ыбадатханасыны вейран эдени Худай вейран эдер. Чүнки Худайың ыбадатханасы мукаддесдир, шол ыбадатхана – сизсиңиз.

¹⁸ Гой, хич ким өз-өзүни алдамасын. Эгер кимдир бири өзүни дүнйә өлчегине лайыклыкда дана сайян болса, гой, «акмак» болсун. Шонда ол догрудан-да дана болар.

¹⁹ Чүнки бу дүнйәниң даналыгы Худайың назарында акмаклыкдыр. Мукаддес Язгыларда: «Худай акыллысыраяны өз хилесинде тутяр» дийип язылгыдыр.

²⁰ «Реб даналарың пикирлериниң паныдыгыны билйәр».

²¹ Шунлукда, кимдир бирине дегишлидигиңиз бабатда өвүнмәң! Чүнки хемме зат сизиңкидир:

²² Павлус-да, Аполло-да, Петрус-да, дүнйә-де, яшайыш-да, өлүм-де, шу вагт ве гелеҗек-де – хемме зат сизиңкидир.

²³ Сиз Месихиңкисиңиз, Месих болса Худайыңкыдыр.