1 Korintoslylar 2 - Мукаддес Китап

2‑нҗи бап

¹ Эй, доганлар, мен сизе Худай барадакы шаятлыгы ыглан этмәге баранымда, дилеварлык я сөз даналыгы билен бармандым.

² Мен сизиң араңыздакам, Иса Месихден ве Онуң хача чүйленмегинден башга әхли зады унутмагы йүрегиме дүвүпдим.

³ Мен яныңыза баранымда эҗиздим, горкудан яңа галпылдаярдым.

⁴ Мен вагыз эденимде сизи ынандырмак үчин пайхаслы сөзлери уланмадым. Сизи ынандыран зат Худайың Рухуның аян болан гүйҗүди.

⁵ Бу сизиң иманыңызың ынсан пайхасына дәл-де, Худайың гүйҗүне даянмагы үчинди.

Худайың даналыгы Мукаддес Рух аркалы аян боляр

⁶ Хава, биз даналыгы кәмиллериң арасында вагыз эдйәрис. Бизиң вагыз эдйән даналыгымыз бу эйямың я-да дүнйәдәки вагтлайын, соңы пуч болян ыгтыярлыларың даналыгы дәлдир.

⁷ Биз Худайың сырлы, яшырын сакланылан даналыгыны сөзлейәрис. Худай бу даналыгы бизиң хем Онуң шөхратына шәрик болмагымыз үчин, оны дүнйә ярадылмаздан өң ниетләпди.

⁸ Бу даналыга дүнйә ыгтыярлыларының хич бири дүшүнмеди. Чүнки дүшүнен болсадылар, шөхратлы Ребби хача чүйлемездилер.

⁹ Эмма Мукаддес Язгыларда язылышы ялы: «Худайы сөййәнлер үчин Онуң тайынлан затларыны не гөз гөрүпди, не-де гулак эшидипди, не-де ынсан акылы чаклапды».

¹⁰ Бизе болса Худай бу даналыгы Өз Рухы аркалы аян этди. Чүнки Мукаддес Рух әхли зады, хатда Худайың чуң пикирлерине дүшүнйәндир.

¹¹ Ынсаның пикирлерини онуң ичиндәки өз рухундан башга хич ким билмейәр. Худай бабатда хем шейле: Онуң Өз Рухундан башга хич ким Худайың пикирлерини билйән дәлдир.

¹² Биз бу дүнйәниң рухуны алан дәлдирис. Биз Худайың Өз мерхемети аркалы бизе эчиленлерине дүшүнеримиз ялы, Худайың Рухуны аландырыс.

¹³ Биз булары ынсан даналыгының өвреден сөзлери билен дәл-де, Мукаддес Рухуң өвреден сөзлери билен айдярыс. Биз рухы хакыкаты рухы сөзлер билен дүшүндирйәрис.

¹⁴ Мукаддес Руха эермейән ынсан Худайың Рухундан болан затлара дүшүнмейәр. Ол булары акмаклык сайяр. Чүнки Мукаддес Рухуң пикирлерине диңе Оңа эерйәнлер дүшүнйәндирлер.

¹⁵ Мукаддес Руха эерйән адам хемме зада баха берип билйәр, эмма башгалар бу адама баха берерден эҗиздир.

¹⁶ «Реббе ким акыл етирди? Ким Оңа маслахат берип билди?» Эмма бизде велин Иса Месихиң акылы бардыр.