1 Korintoslylar 16 - Мукаддес Китап

16-нҗы бап Иманлылар үчин пул көмегини йыгнамак барадакы өвүтлер

¹ Инди болса Худайың йыгнакларына мадды пул көмегини бермек барада айтмакчы. Галатядакы йыгнаклара табшыранларымы сиз хем берҗай эдиң.

² Мен яныңыза баранымда йыгнама зерурлыгы болмаз ялы, хериңиз хер хепдәниң биринҗи гүни өз ягдайына гөрә белли мукдарда пул сүйшүрип, янында сакласын.

³ Баранымда болса, сизиң көмегиңизи Иерусалиме ашырҗак адамлары өзүңиз сайларсыңыз. Мен олары иберенимде, танатма хатларыны хем янларына гошарын.

⁴ Эгер Иерусалиме мениң гитмегим макул билинсе, олар маңа ёлдаш боларлар.

Павлусың арзув-ислеглери

⁵ Мен яныңыза Македонияда боланымдан соң барарын. Себәби мен Македонияның үсти билен гечмекчи.

⁶ Белки, мен яныңызда бираз галарын, хатда гышы шол ерде гечирмегим-де ахмал. Соңра сиз мени гитҗек ериме уградып билерсиңиз.

⁷ Хәзир болса сизи йөне ёл угруна гөрүп гечесим геленок. Гайтам, Худай ёл берсе, яныңызда көпрәк болмагы умыт эдйәрин.

⁸ Мен Эллинҗи гүн байрамына ченли Эфес шәхеринде галарын,

⁹ себәби маңа көп адамларың гаршы чыкяндыгына гарамаздан, бу ерде улы ве нетиҗели ишлер үчин улы мүмкинчиликлер дөреди.

¹⁰ Эгер яныңыза Тимотеос барса, онуң араңызда хич затдан горкман гезип билери ялы алада эдиң. Ол хем мен ялы Реббиң ишини эдйәр.

¹¹ Шоңа гөрә-де, хич ким Тимотеоса әсгермезчилик этмесин. Ол мениң яныма доланар ялы, оны саг-аман ёла салың. Мен Тимотеосың доганлар билен гайдып гелмегине гарашярын.

¹² Инди болса доганымыз Аполло барада: мен оңа доганлар билен билеликде сизиң яныңыза гитмеги үчин көп ялбардым. Йөне онуң эдил шу пурсат гитмәге мейли ёк. Ол яныңыза аматлы вагт тапанда барар.

Соңкы өвүтлер ве саламлар

¹³ Хүшгәр болуң, иманда берк дуруң, мерт болуң, гайратлы болуң.

¹⁴ Әхли зады сөйги билен эдиң.

¹⁵ Эй, доганлар, сиз Степанасың өй-ичерсини танаярсыңыз. Оларың Ахаяда илкинҗилериң хатарында Иса Месихе иман эдендиклерини, Худайың халкына җан-тенден хызмат эдйәндиклерини хем билйәнсиңиз. Шоңа гөрә-де, сизден шуны хайыш этмекчи:

¹⁶ сиз хем шейле адамлара, олар билен ишләп зәхмет чекйәнлериң хер бирине гулак асың.

¹⁷ Мен Степанас, Фортунат ве Ахайык дагы геленде, өрән бегендим. Олар сизиң ёклугыңызы билдирмейәрлер.

¹⁸ Олар сизиң көңлүңизе арам беришлери ялы, мениң көңлүме-де арам берйәрлер. Шейле адамларың гадырыны билиң.

¹⁹ Азия велаятындакы йыгнаклар сизе догайы салам иберйәрлер. Акила, Прискилла ве оларың өйүндәки йыгнак хем сизе Ребде догайы салам иберйәрлер.

²⁰ Доганларың әхлиси хем сизе догайы салам иберйәрлер. Бири-бириңизи мәхирли огшап саламлашың.

²¹ Мен – Павлусдан сизе салам болсун. Мен муны өз элим билен яздым.

²² Кимде-ким Ребби сөймейән болса, гой, оңа нәлет болсун. Я Реббимиз, гелсене!

²³ Гой, Реббимиз Исаның мерхемети сизе яр болсун!

²⁴ Мен сизиң барыңызы Иса Месихиң сөйгүси билен сөййәрин! Омын.