1 Korintoslylar 15 - Мукаддес Китап

15‑нҗи бап Дирелиш барадакы Хош Хабар

¹ Инди болса, эй, доганлар, сизе вагыз эден Хош Хабарымы ятладып гечмекчи. Сиз оны кабул эдип, онда берк дурсуңыз.

² Сизе вагыз эден Хош Хабарымы гайым тутсаңыз, ол аркалы халас боларсыңыз. Тутмасаңыз, бидерек ере иман этдигиңиз болар.

³ Чүнки мен кабул эденими өрән ваҗып хабар хөкмүнде сизе-де говшурдым. Бу хабар, ине, шундан ыбарат: Мукаддес Язгылара гөрә, Месих бизиң гүнәлеримиз үчин өлди.

⁴ Ол җайланып, Мукаддес Язгылара гөрә хем үчүленҗи гүн дийленде дирелди.

⁵ Онсоң Иса Месих Петруса, соң Онкилере гөрүнди.

⁶ Мундан соң Ол шол бир вагтың өзүнде бәш йүзден-де говрак догана гөрүнди. Бу доганларың кәбири эййәм арадан чыкды, йөне аглаба бөлеги хәзир хем дири.

⁷ Соңра Ол Якуба гөрүнди, соң ресулларың әхлисине гөрүнди.

⁸ Иң соңунда болса маңа, ягны шейле дереҗә асла мынасып болмадыга гөрүнди.

⁹ Чүнки мен ресулларың арасында иң кичисидирин. Мен хатда ресул адыны алмага-да мынасып дәл, себәби Худайың йыгнагына азар берипдим.

¹⁰ Эмма мен нәхили болсам-да, диңе Худайың мерхемети аркалы шейле болдум. Онуң маңа эден мерхемети пуҗа чыкмады: мен хеммелерден-де көп зәхмет чекдим. Аслында муны мен дәл-де, маңа яр болан Худайың мерхемети этди.

¹¹ Шунлукда, исле мен болайын, исле-де бейлеки ресуллар болсун – тапавуды ёк: биз бу Хош Хабары вагыз эдйәрис, сиз-де оңа ынандыңыз.

Мерхумларың дирелмеги

¹² Биз Месих дирелди дийип вагыз эдйәрис. Онда сизиң араңыздан кәбирлери нәдип мерхумлар дирелмез дийип билйәр?

¹³ Эгер мерхумлар дирелмейән болса, онда Месих хем дирелен дәлдир.

¹⁴ Эгер Месих дирелмедик болса, онда бизиң вагзымыз-да, сизиң иманыңыз-да бидерекдир.

¹⁵ Мунуң үстесине-де, бизиң Худай барада ялан шаятлык этдигимиз боляр. Себәби биз Худай Иса Месихи дирелтди дийип шаятлык эдйәрис ахырын. Эгер мерхумлар дирелмейән болса, онда Худай Иса Месихи-де дирелден дәлдир.

¹⁶ Хава, мерхумлар дирелмейән болса, онда Иса Месих-де дирелен дәлдир.

¹⁷ Эгер Иса Месих дирелмедик болса, онда сизиң иман гетирмегиңиз хем пучдур: сиз өңкиңиз ялы гүнәлериңизиң ичиндесиңиз.

¹⁸ Диймек, Иса Месихде иманлы болуп арадан чыканлар хем хеләк боландыр.

¹⁹ Эгер биз диңе бу дурмушда Иса Месихе умыт баглаян болсак, әхли ынсанларың иң бетбагтыдырыс.

²⁰ Йөне Иса Месих хакыкатдан-да илкинҗи болуп өлүмден дирелди. Бу бейлеки мерхумларың хем дирелҗекдигини кепиллендирйәр.

²¹ Чүнки өлүмиң бу дүнйә адам аркалы гелши ялы, өлүмден дирелиш-де адам аркалы гелйәндир.

²² Адам атаның несиллериниң әхлиси өлйәр. Шунуң ялы, Иса Месихе дегишли боланларың-да әхлиси яшайша говшар.

²³ Йөне хер кес өз гезегинде дирелер. Иса Месих илкинҗи болуп дирелди. Месих геленде, Оңа дегишли боланлар-да дирелер.

²⁴ Иса Месих әхли агалыклары, ыгтыярлыклары ве гүйчлери ёк эдип, Шалыгы Ата Худая табшыранда болса дүнйәниң соңы болар.

²⁵ Чүнки Худай Иса Месихиң әхли душманларыны Онуң аяк астына салянча, Месих шалык сүрмелидир.

²⁶ Ёк эдилмели душманларың иң соңкусы хем өлүмдир.

²⁷ Чүнки Худай «әхли зады Онуң аягының астында гойды». Хава, Худай әхли зады Месихиң аяк астында гойды. Йөне «әхли зады» дийленде, мунуң Худая дегишли дәлдиги месе-мәлимдир.

²⁸ Худай әхли зады Оглуна табын эденден соң, Огул хем Өзүни әхли зады Онуң аяк астына гоян Худая табын эдер. Бу Худайың әхли затда долы хөкүм сүрмеги үчиндир.

²⁹ Эгер дирелиш ёк болса, мерхумлара дерек сува чүмдүриленлер нәме эдеркә? Эгер мерхумлар хич хачан дирелмеҗек болса, адамлар нәме үчин олара дерек сува чүмдүрилйәркә?

³⁰ Биз хем нәме үчин өзүмизи сагатсайын ховп астына саляркак?

³¹ Реббимиз Иса Месихиң хузурында сизе болан буйсанҗымдан ант ичйәрин: мен хер гүн өлүм билен йүзбе-йүз болярын.

³² Эгер-де мениң делиллерим диңе ынсан делиллери болан болса, мен хей-де Эфесдәки вагшы хайванлар билен гөрешермидим? Мундан нәме пейда газанардым? Эгер мерхумлар дирелмейән болсалар, «гелиң, иелиң, ичелиң, эртир биз өлерис!»

³³ Алданмаң! Ярамаз яранлар ягшы хәсиетлини хем аздыряндыр.

³⁴ Акылыңыза айланың, гүнә этмеги бес эдиң. Сизиң араңызда Худайы танамаянлар хем бар. Мен муны сизи утандырмак үчин айдярын.

Дирелен тен

³⁵ Йөне кимдир бириниң: «Мерхумлар нәдип дирелер? Олар гайдып геленлеринде беденлери нәхили боларка?» дийип сорамагы мүмкин.

³⁶ Нәхили наданлык! Сениң экен тохумың өлмесе, яшайша говушмаз.

³⁷ Сен экениңде гөгерҗек өсүмлиги тутушлыгына экмейәрсиң. Сен йөне тохум, мысал үчин бугдай я-да башга бир өсүмлигиң тохумыны экйәрсиң.

³⁸ Худай болса бу тохума Өз беллән гөрнүшини берйәр. Хер тохумың-да өз гөрнүши боляндыр.

³⁹ Беденлериң хеммеси бирмеңзеш дәлдир. Ынсаның өз бедени, хайванларың өз бедени, гушларың өз бедени, балыкларың-да өз бедени боляр.

⁴⁰ Шейле-де, гөклере я ере дегишли затлар-да бардыр. Гөклере дегишли затларың өз гөрки, ере дегишли затларың-да өз гөрки бардыр.

⁴¹ Гүнүң өз гөрки, айың өз гөрки бардыр, йылдызларың-да өз гөрки бардыр. Бир йылдызың гөрки бейлеки йылдызыңкыдан тапавутлыдыр.

⁴² Мерхумларың дирелиши-де шуңа меңзейәндир. Чүйрейән беден җайланып, чүйремеҗек беден дирелйәр.

⁴³ Абрайсызлыкда җайланып, шан-шөхратда дирелйәр. Эҗизликде җайланып, гүйч-кувватда дирелйәр.

⁴⁴ Паны беденде җайланып, бакы беденде дирелйәр. Паны беден бар болса, бакы беден хем боляндыр.

⁴⁵ Чүнки Мукаддес Язгыларда шейле язылгыдыр: «Илкинҗи адам – Адам ата җанлы барлык болды». Соңкы Адам болса яшайыш берйән Рух болды.

⁴⁶ Бакы беден паны беденден өң болуп билмейәр. Терсине, илки паны беден боляр, соңра болса бакы беден боляр.

⁴⁷ Илкинҗи ынсан ериң топрагынданды, икинҗи Ынсан болса Гөклерденди.

⁴⁸ Топракдан ярадылан илкинҗи ынсан нәхили болса, ердәки ынсанлар хем шейледир. Гөклерден инен Ынсан нәхили болса, гөклере дегишли ынсанлар хем шейледир.

⁴⁹ Биз топракдан ярадылан ынсана нәхили меңзән болсак, гөклерден Болана хем шейле меңзәрис.

⁵⁰ Шоңа гөрә-де, эй, доганлар, мен сизе айтмакчы: эт билен гандан болан ердәки ынсан Худайың Шалыгыны мирас алып билйән дәлдир. Чүйрейән беден чүйремейән бедене шәрик болуп билйән дәлдир.

⁵¹ Гулак гоюң, сизе бир сыры аян эдейин: биз өлмерис, йөне хеммәмиз өзгердилерис.

⁵² Бу иң соңкы сурнай чалнанда гөз-ачып юмасы салымда, бир пурсатда амала ашар. Сурнай чалнар, мерхумлар чүйремезек халда дирелдилер, биз хем өзгердилерис.

⁵³ Чүнки чүйрейән беден чүйремезлик донуна, өлйән тен өлмезлик донуна бесленмелидир.

⁵⁴ Шунлукда, чүйрейән тен чүйремезлиге, өлйән тен өлмезлиге беслененде, «Еңиш өлүми ювутды» дийлен сөзлер берҗай болар.

⁵⁵ «Эй, өлүм, ханы сениң еңшиң? Эй, өлүм, ханы сениң зәхерли нешдериң?»

⁵⁶ Гүнә – бу өлүмиң зәхерли нешдеридир. Канун болса гүнәниң гүйч-кувватыдыр.

⁵⁷ Йөне Худая мүң-де бир шүкүр! Ол Реббимиз Иса Месих аркалы бизе еңиш берди.

⁵⁸ Шоңа гөрә-де, эй, эзиз доганларым, берк дуруң. Гой, сизи асла хич зат сарсдырмасын. Реббиң ишине ыхласлы япышың. Чүнки Реб угрунда чекен зәхметиңизиң бидерек дәлдигини өзүңиз-де билйәнсиңиз.