1 Korintoslylar 14 - Мукаддес Китап

14‑нҗи бап Пыгамберлик ве нәмәлим диллер барада

¹ Сөйгиниң йөрелгесине эериң. Рухы пешгешлери алмага, айратын-да пыгамберлик этмәге ымтылың.

² Нәмәлим дилде гүрлейән адам адамлар билен дәл-де, Худай билен гүрлешйәндир. Чүнки онуң Мукаддес Рухдан ылхамланып айдян сырларына хич ким дүшүнйән дәлдир.

³ Пыгамберлик эдйән болса адамлара йүзленип, олара өвүт-несихат берйәр, голдаяр, теселли берйәр.

⁴ Нәмәлим дилде гүрлейән өз-өзүне өвүт берйәндир, пыгамберлик эдйән болса йыгнага өвүт берйәндир.

⁵ Сизиң әхлиңиз нәмәлим диллерде гүрлесеңиз, элбетде, говы, йөне пыгамберлик этмәге ымтылың. Нәмәлим дилде гүрлейән адам йыгнага өвүт-үндев бермек үчин өз айданларыны маныландырмаса, онда пыгамберлик эдйән ондан хас говудыр.

⁶ Эй, доганлар, мен яныңыза барып, нәмәлим диллерде гүрлесем, йөне аянлык, билим, пыгамберлик, я-да таглымат өвретмесем, мениң сизе пейдам дегерми?

⁷ Мысал хөкмүнде җансыз саз гуралларыны: түйдүги я-да арфаны алып гөрелиң. Эгер олар тапавутлы әхеңде чалынмаса, хайсы мукамың чалыняндыгыны нәдип сайгарҗак?

⁸ Ене-де бир мысал: эгер сурнайың чагырыш сеси айдың болмаса, урша тайынланҗак бармы?

⁹ Сиз бабатда хем шейледир. Эгер-де сиз дил аркалы айдянларыңыз айдың болмаса, сизе ким дүшүнер? Бу диңе ховайы гүррүң эден ялыдыр.

¹⁰ Дүнйәде өрән көп диллер бар. Оларың хер бириниң манысының бардыгы гүррүңсиздир!

¹¹ Эмма мен кимдир бириниң айдянларына дүшүнмесем, мен онуң үчин кесеки юртлудырын. Ол хем мениң үчин кесеки юртлудыр.

¹² Шонуң үчин-де, рухы затлара шейле ымтылян болсаңыз, йыгнагы беркидйән пешгешлери алмага дырҗашың.

¹³ Нәмәлим диллерде гүрлейән адам оны маныландырып билмеги үчин-де дога-дилег этмелидир.

¹⁴ Чүнки мен нәмәлим дилде дога-дилег эдйән болсам, муны диңе рухум эдйәндир. Акылым муңа гатнашян дәлдир.

¹⁵ Нәме этмели? Мен рухум билен дога-дилег этсем, муны аңымда-да этҗек. Мен рухум билен нагма айтсам, муны аңымда-да айтҗак.

¹⁶ Эгер сен Худайы өз калбыңда шөхратландырсаң, сениң айдян затларыңа дүшүнмейән адам шүкүрлериңе нәдип «омын» дийсин? Ол сениң айдянларыңа дүшүнмейәр ахырын.

¹⁷ Белки, сен оңат шүкүр эдйәнсиң, йөне башга бири бу аркалы өвүт алян дәлдир.

¹⁸ Худая шүкүр, мен нәмәлим диллерде хеммәңизден көп гүрлейәрин.

¹⁹ Йөне йыгнакда бейлекилере-де өвүт-үндев берер ялы, дүшнүкли бәш сөз айданымы говы гөрйәрин. Бу нәмәлим диллерде айдылан мүңлерче сөзден говудыр.

²⁰ Эй, доганлар, чагалар ялы пикир йөретмегиңизи бес эдиң. Яманлык бабатда чага ялы болуң, йөне акыл бабатда кәмил яшлы болуң.

²¹ Чүнки Мукаддес Язгыларда шейле язылгыдыр: «Мен бу халка ят диллерде гүрлейәнлер аркалы, кесеки халкларың дили аркалы сөзләрин. Эмма шонда-да олар Мени диңлемезлер – диййәр Реб».

²² Шунлукда, нәмәлим диллер иман эденлер үчин дәл-де, иман этмедиклер үчин аламатдыр. Пыгамберлик болса иман этмедиклер үчин дәл-де, иман эденлер үчин аламатдыр.

²³ Эгер бүтин йыгнак бир ере йыгнанып, хериңиз нәмәлим дилде гүрләп дуркаңыз, оңа дүшүнмейән я-да иман этмедик адамлар мунуң үстүне гелсе, нәме ойларлар? Олар: «Сиз акылыңыздан азашыпсыңыз» диймезми?

²⁴ Эмма иман этмедик я-да дүшүнмейәниң бири пыгамберлик айдылып дурка гелсе, ол хеммелер тарапындан паш эдилип, хөкүм эдилйәндигини эшидер.

²⁵ Шонда онуң йүрек сырлары аян болар-да, йүзин йыкылар. «Худай, догрудан-да, сизиң араңызда экен!» дийип, Оңа сежде эдер.

Тертипли ыбадат

²⁶ Эй, доганлар, мундан нәхили нетиҗе чыкарса болар? Сиз бир ере үйшениңизде, хер бириңизде нагма, өвүт сөзи, аянлык, нәмәлим диллерде гүрлемек я-да оны маныландырмак бардыр. Гой, буларың бары йыгнагы беркитмек үчин уланылсын.

²⁷ Эгер араңызда нәмәлим диллерде гүрлейән бар болса, гой, икиси я-да үчүси гезек-гезегине гүрлесин; ене бири маныландырсын.

²⁸ Эмма маныландырып билйән болмаса, онда нәмәлим дилде гүрлейән дымсын. Гой, ол өзүне ве Худая гүррүң берсин.

²⁹ Пыгамберлериң болса икиси я-да үчүси гүрлесин. Бейлекилер болса оларың айданларыны салдарлап гөрсүнлер.

³⁰ Эмма диңләп отуранлардан бирине Худайдан аянлык гелсе, онда гүрләп дуран дымсын.

³¹ Чүнки хеммелер өвүт алар ялы, хеммелер рухланар ялы, барыңыз гезек-гезегине пыгамберлик эдип билерсиңиз.

³² Пыгамберлик сөзлерини алан адам олары хачан айтмалыдыгыны өзи кесгитлемелидир.

³³ Чүнки Худай бидүзгүнчилигиң дәл-де, парахатлыгың Худайыдыр. Худайың халкының йыгнакларының әхлисинде болшы ялы,

³⁴ аяллар йыгнакда гүрлемесин. Олара гүрлемәге ругсат берилйән дәлдир. Төвратда айдылышы ялы, олар табын болмалыдыр.

³⁵ Эгер олар хайсыдыр бир зат барада билмекчи болсалар, гой, өйде әрлеринден сорасынлар. Аяла йыгнакда гүрлемек айып ахырын.

³⁶ Худайың сөзи сизден чыкандыр өйдйәрсиңизми? Я-да ол диңе сизе барып етдими?

³⁷ Эгер кимдир бири өзүни пыгамбер я-да Мукаддес Рухдан долан дийип сайян болса, шуңа дүшүнмелидир: мениң язянларым Худайың буйругыдыр.

³⁸ Эмма ол муны әсгермесе, гой, онуң өзи-де әсгерилмесин.

³⁹ Шунлукда, эй, доганлар, пыгамберлик этмәге җан-тенден ыхлас эдиң, йөне нәмәлим диллерде гүрлемеги-де гадаган этмәң.

⁴⁰ Эмма хемме зат мынасып тәрде ве тертип билен болсун.