1 Korintoslylar 13 - Мукаддес Китап

13‑нҗи бап Сөйги

¹ Ынсанларың ве перишделериң диллеринде гүрләп-де, сөйгим болмаса, гүңлеч сесленйән мисдирин я-да җыңңырдаян кимвалдырын.

² Эгер пыгамберлик пешгешим болуп-да, әхли сырлары ве ылымлары билип-де, даглары сүйшүрҗек гүйчли иманым болуп-да, сөйгим болмаса, мен хичдирин.

³ Эгер мен тутуш эмләгими гарып-гасарлара пайлап-да, магтанып билерим ялы теними гурбан эдип-де, сөйгим болмаса, буларың маңа хич пейдасы ёкдур.

⁴ Сөйги сабырлыдыр, мәхирлидир. Сөйги бахыллык эдйән дәлдир, өзүни бейгелдйән дәлдир. Сөйги гопбамсырамаяр,

⁵ биабрайлык этмейәр. Сөйги өз бәхбидини арамаяр, гахарланмаяр, өйке-кине сакламаяр.

⁶ Сөйги яманлыга шатланмаяр, ол хакыката шатланяндыр.

⁷ Сөйги хемме зады багышлаяндыр, элмыдама ынаняндыр. Сөйги хич хачан умытдан дүшйән дәлдир, хемме зада чыдаяндыр.

⁸ Пыгамберликлер тамамланар, диллер йитер, билим гутарар, сөйги болса асла түкенмез.

⁹ Чүнки биз хәзир бөлеклейин билйәрис, бөлеклейин пыгамберлик эдйәрис.

¹⁰ Кәмиллик геленде, бөлеклейин затлар тамамланар.

¹¹ Мен чагакам, чага ялы гүрлейәрдим, чага ялы ойланярдым, чага ялы пикир йөредйәрдим. Эмма улалып кемала геленимде, чагалык йөрелгелерини ташладым.

¹² Шинди әхли зады өчүгси айнадан гөрен ялы гөрйәрис. Эмма соңра әхли зады йүзбе-йүз гөрерис. Мен шинди бөлеклейин билйәрин, йөне шонда Худайың мени билши ялы долы билерин.

¹³ Хәзир шу үчүси галяр: иман, умыт ве сөйги. Буларың иң улусы болса сөйгүдир.