1 Korintoslylar 12 - Мукаддес Китап

12‑нҗи бап Рухы пешгешлер

¹ Инди болса, эй, доганлар, мен сизиң Рухуң пешгешлери бабатда хабарлы болмагыңызы ислейәрин.

² Ядыңыздамы, сиз бутпаразкаңыз, дилсиз-агызсыз бутларың тәсирине дүшүп, олара эерйәрдиңиз.

³ Шоңа гөрә-де, шуңа айдың дүшүнмегиңизи ислейәрин: Худайың Рухундан ылхам алян ынсан: «Иса Месихе нәлет болсун!» диймез. Мукаддес Рух ынандырмаса, ынсан: «Иса Ребдир!» дийип билмез.

⁴ Мукаддес Рухуң берйән пешгешлери дүрлүдир, йөне оларың бары шол бир Рухдандыр.

⁵ Хызматлар дүрли-дүрлүдир, йөне оларың бары шол бир Реб үчиндир.

⁶ Амаллар дүрли-дүрлүдир, йөне хер кесде әхли зады эдйән шол бир Худайдыр.

⁷ Хер кесде Мукаддес Рухуң аян болмагы хеммелериң бәхбиди үчиндир.

⁸ Мукаддес Рух кимдир бирине даналык билен, ене бирине билим билен өвретмек пешгешини берйәр.

⁹ Башга бирине Мукаддес Рух иман байлыгыны, ене бирине шыпа берме пешгешлерини берйәр.

¹⁰ Ол бирине гудрат гөркезме, башгасына пыгамберлик, ене бирине рухлары сайгарма, башга бирине нәмәлим диллер, ене бирине бу диллери маныландырма пешгешини берйәр.

¹¹ Буларың барыны еке-тәк бир Мукаддес Рух эдйәндир. Ол хер кесе Өз ислейшине гөрә берйәндир.

¹² Беден бир болса-да, агзалары көпдүр. Агзалары көп болса-да, олар бүтеви бир тени эмеле гетирйәрлер. Месих бабатда хем шейледир.

¹³ Чүнки биз ким болсак-да: яхудымы, грекми, гулмы, эркинми – тапавуды ёк, барымыз бир беден болмак үчин, бир Мукаддес Руха чүмдүрилдик. Бизиң барымыз бир Мукаддес Рухы кабул этдик.

¹⁴ Беден бир агзадан ыбарат дәлдир. Онуң агзасы көпдүр.

¹⁵ Аяк: «Мен эл дәл, мен бу бедене дегишли дәл» диени билен беден агзасы болмагыны бес эдйәрми нәме?

¹⁶ Гулак хем «Мен гөз дәл, мен бедене дегишли дәл» дийсе-де, беден агзалыгына галяндыр.

¹⁷ Эгер бүтин беден гөз болан болса, онда ол нәдип эшидерди? Эгер бүтин беден гулак болан болса, онда ол нәдип ыс аларды?

¹⁸ Эмма Худай хемме агзалары бир беденде ерлешдирип, оларың херсини Өз халайшына гөрә гойды.

¹⁹ Эгер агзаларың бары хайсыдыр бир агза болан болса, онда беден ниреде боларды?

²⁰ Аслында агзалар көп, беден болса бирдир.

²¹ Гөз эле: «Сен маңа герек дәл!» дийип билмейәр. Келле хем аяклара: «Сиз маңа герек дәл!» дийип билмейәр.

²² Терсине, бедениң эҗиз сайылян агзалары хас гереклидир.

²³ Хорматсызрак сайылян агзалара велин айратын хормат гойярыс. Гелшиксиз сайылян агзаларымыз барада айратын алада эдйәрис.

²⁴ Бедениң гелшикли агзалары болса шейле алада мәтәч дәлдир. Худай беден агзаларыны бирикдиренде, онуң әхмиетсиз сайылян агзаларына хас көп әхмиет берди.

²⁵ Ол муны беденде хич бөлүнишик болман, агзалар бири-бири барада дең дереҗеде алада этсинлер дийип этди.

²⁶ Эгер бир агза хорлук чексе, бейлеки агзалар хем хорлук чекерлер. Эгер бир агза хорматланылса, әхли агзалар муңа шатланар.

²⁷ Сизиң әхлиңиз Иса Месихиң беденисиңиз, хер бириңиз бедениниң бир агзасысыңыз.

²⁸ Худай йыгнага илки билен ресуллары, соңра пыгамберлери, үчүнҗи эдип өвредиҗилери белледи. Соңра гудрат гөркезйәнлери ве шыпа берйәнлери, ярдам берйәнлери ве доландырянлары, соңра нәмәлим диллерде гүрлейәнлери белледи.

²⁹ Эйсем хеммелер ресулмыдыр? Хеммелер пыгамбермидир? Хеммелер таглым өвредиҗимидир? Хеммелер гудрат гөркезйәнмидир?

³⁰ Шыпа берме пешгеши хеммелерде бармы? Хеммелер нәмәлим диллерде гүрлейәрми? Хеммелер бу диллерде айдыланлары дүшүндирип билйәрми?

³¹ Йөне сиз хас улурак пешгешлери алмага ымтылың. Инди болса сизе иң говы ёлы салгы берейин.