1 Ёханна 5 - Мукаддес Китап

5‑нҗи бап

¹ Исаның Месихдигине ынанян хер бир адам Худайың перзендидир. Атаны сөййән адам Онуң перзендини-де сөййәндир.

² Биз Худайың перзентлерини сөййәндигимизи нәдип билйәрис? Худайы сөйүп, Онуң буйрукларыны берҗай эдйәнлигимизден билйәрис.

³ Худайы сөймек Онуң буйрукларыны берҗай этмекдир. Онуң буйруклары болса агыр дәлдир.

⁴ Чүнки Худайың хер бир перзенди дүнйәни еңмеги башаряндыр. Биз дүнйәниң үстүнден бу еңши иманымыз аркалы газанярыс.

⁵ Эйсем дүнйәни ким еңип билер? Элбетде, Исаның Худайың Оглудыгына иман эдйән адам еңип билер!

⁶ Иса Месих геленде, сува чүмдүрилди. Ол бизиң үчин ганыны дөкди. Ол диңе сува чүмдүрилиш аркалы дәл, эйсем дөкен ганы аркалы хем Өзүни аян этди. Мукаддес Рух муңа шаятдыр ве Онуң шаятлыгы хакыкатдыр.

⁷ Шейлеликде, үч шаятлык бар:

⁸ Рух, сув ве ган. Буларың үчүсиниң хем шаятлыгы бирдир.

⁹ Биз ынсанларың шаятлыгыны кабул эдйәрис, эмма Худайың шаятлыгы хас-да мөхүмдир. Себәби Худай хем Өз Оглы хакында шаятлык этди.

¹⁰ Худайың Оглуна иман эдйәнде Худайың шаятлыгы бардыр. Ким Худайың Өз Оглы барадакы шаятлыгына ынанмаян болса, ол Худайы яланчы чыкарып, Оңа иман эдйән дәлдир.

¹¹ Худайың шаятлыгы, ине, шундан ыбарат: Худай бизе бакы яшайыш берди, бу яшайшы Өз Оглы аркалы берди.

¹² Ким Худайың Оглуна иман эдйән болса, онда яшайыш бардыр, ким иман этмейән болса, онда яшайыш ёкдур.

Бакы яшайыш

¹³ Мен муны сизе, Худайың Оглуна иман эденлере яздым. Шейлеликде, шуны билип гоюң: Худайың Оглуна иман эден сизде бакы яшайыш бардыр.

¹⁴ Биз Худая бил баглаярыс, себәби Онуң ырадасына гөрә нәме дилесек, дилегимизи эшидйәндигини билйәрис.

¹⁵ Онуң әхли дилеглеримизи эшидйәндигини билйән болсак, Ондан дилән задымызы алҗакдыгымызы-да билйәндирис.

¹⁶ Эгер бири доганының өлүме элтмейән гүнә эдйәнини гөрсе, гой, онуң үчин Худая ялбарсын. Худай оңа яшайыш берер. Муны өлүме элтмейән гүнә эдйәнлер хакда айдярын. Өлүме элтйән гүнә-де бардыр. Бейле гүнә эдйән адам үчин Худая ялбарың диймейәрин.

¹⁷ Хер яманлык гүнәдир, йөне өлүме элтмейән гүнә хем бардыр.

¹⁸ Биз Худайың перзентлериниң гүнә этмейәндигини билйәрис. Худайың Оглы олары гораяндыр, шейтан олара эл гатмаз.

¹⁹ Биз өзүмизиң Худайдандыгымызы, бүтин дүнйәниң болса шейтаның голастындадыгыны билйәрис.

²⁰ Биз ене шуны билйәрис: хак Худайы танап билмегимиз үчин, Худайың Оглы гелип, бизе акыл-пайхас берди. Биз хак Худай ве Онуң Оглы Иса Месих билен яшаярыс. Иса Месих хак Худайдыр ве бакы яшайышдыр.

²¹ Эзиз балаларым, өзүңизи бутлардан гораң!