1 Ёханна 4 - Мукаддес Китап

4‑нҗи бап Рухлары сайгарың

¹ Мәхрибанларым, өзүнде Худайың Рухуның бардыгыны айдян хер бир адама ынанып йөрмәң. Оларың Худайдандыгыны я-да дәлдигини билмек үчин сынагдан гечириң. Себәби дүнйәде энчеме галп пыгамберлер пейда болды.

² Худайың Рухуның бардыгыны, ине, шундан билерсиңиз: олар Иса Месихиң, хакыкатданам, ынсан болуп гелендигини ыкрар эдйәрлер.

³ Муны ыкрар этмейән адам Худайдан дәлдир. Бу адам Месихиң душманыдыр. Сиз бу душманың гелҗекдигини эшиденсиңиз. Ине, ол эййәм бу дүнйәдедир.

⁴ Эзиз балалар, сиз болса Худайдансыңыз. Сиздәки Рухуң дүнйәдәки рухлардан үстүндиги үчин, сиз галп пыгамберлери еңенсиңиз.

⁵ Олар бу дүнйә дегишлидирлер, оларың гепи хем бу дүнйәниң гарайшына лайыкдыр, шонуң үчин дүнйә олара гулак асяр.

⁶ Биз болса Худая дегишлидирис. Ким Худайы танаян болса, бизе гулак асар. Ким Худайдан болмаса, бизе гулак асмаз. Хакыкы Рух билен ялан рухы, ине, биз шейдип сайгарярыс.

Худай сөйгүдир

⁷ Мәхрибанларым, бири-биримизи сөелиң, чүнки сөйги Худайдандыр. Ким сөййән болса, Худайың перзендидир, ол Худайы танаяндыр.

⁸ Ким сөймейән болса, Худайы танаян дәлдир, себәби Худай сөйгүдир.

⁹ Бизе Худайың сөйгүси, ине, шундан аян болды: Худай бизе яшайыш бермек үчин, Өзүниң еке-тәк Оглуны дүнйә иберип, Өз сөйгүсини аян этди.

¹⁰ Биз Худайы дәл-де, илки Худай бизи сөйди. Ол бизиң гүнәлеримизи пәклемек үчин, Өз Оглуны гурбанлык хөкмүнде иберди. Ине, хакыкы сөйги шудур.

¹¹ Мәхрибанларым, Худай бизи шейле сөендиги үчин, биз хем бири-биримизи сөймелидирис.

¹² Хич ким хич хачан Худайы гөрен дәлдир. Эмма биз бири-биримизи сөййән болсак, онда Худбьай бизиң билен яшаяндыр, Онуң сөйгүси калбымыза орнашандыр.

¹³ Худай бизиң билен ве бизиң хем Худай билен яшаяндыгымызы Онуң хер биримизе берен Рухундан билйәрис.

¹⁴ Биз Атаның Өз Оглуны дүнйәниң Халасгәри эдип иберендигини гөрдүк ве муңа шаятлык эдйәрис.

¹⁵ Исаның Худайың Оглудыгыны ыкрар эдйән хер бир адам Худай билен, Худай хем онуң билен яшаяндыр.

¹⁶ Худайың бизе болан чәксиз сөйгүсине гөз етирип, бу сөйгә ынанярыс. Худай сөйгүдир. Сөйгүде яшаян адам Худай билен, Худай хем онуң билен яшаяндыр.

¹⁷ Шейлелик билен сөйги бизде кәмиллешип, кыямат гүни бизе ынам берер. Себәби биз бу дүнйәде эдил Месих ялы яшаярыс.

¹⁸ Сөйгүде горкы ёкдур. Терсине, кәмил сөйги горкыны ковуп чыкаряндыр. Ким кыямат гүнүнден горкуп яшаян болса, онуң сөйгүси кәмил дәлдир.

¹⁹ Биз Худайы сөййәрис, себәби илки Ол бизи сөйди.

²⁰ Ким «Худайы сөййәрин» дийип хем, өз доганыны йигренйән болса, ол яланчыдыр. Өзүниң гөрүп дуран доганыны сөймейән адам гөрмедик Худайыны сөйүп билмез ахыры.

²¹ Худай бизе: «Худайы сөййән адам өз доганыны-да сөйсүн» дийип буйрук берди.