1 Ёханна 3 - Мукаддес Китап

3‑нҗи бап Худайың перзентлери

¹ Атамыз Худайың бизи нәхили гүйчли сөййәндигини бир гөрсеңизләң! Ол бизи Өз перзентлери дийип атландыряр. Догрудан-да, биз Онуң перзентлеридирис! Дүнйә Худайы танамансоң, бизи-де танамаяр.

² Мәхрибанларым, биз инди Худайың перзентлеридирис. Бизиң нәхили өзгерҗекдигимиз энтек белли дәл, эмма Месихиң гелҗек пурсадында Оңа меңзеҗекдигимизи билйәрис, себәби Оны болшы ялы гөрерис.

³ Оңа умыт баглаян хер бир адам Месихиң пәк болшы ялы, өзүни пәк саклар.

⁴ Гүнә эдйән адам Худайың кануныны бозяндыр. Себәби гүнә этмек Худая баш галдырмак ахыры.

⁵ Месихиң болса бизи гүнәлеримизден сапламак үчин гелендигини билйәнсиңиз. Онда асла гүнә ёкдур.

⁶ Месих билен яшаян адам гүнәден йүз өврер. Эмма хенизем гүнә эдйән адам Оны не гөрйәндир, не-де танаяндыр.

⁷ Эзиз балаларым! Хич киме өзүңизи алдатмаң! Месихиң догручыл болшы ялы, догры иш эдйән адам хем догручылдыр.

⁸ Гүнә эдйән адам иблисе дегишлидир, себәби иблис башлангычдан бәри гүнә эдип гелйәндир. Эмма Худайың Оглы иблисиң ишлерини ёк этмек үчин гелди.

⁹ Худайың перзенди гүнә этмегини довам этмез, себәби оңа Худайың яшайыш берйән гүйҗи орнандыр. Инди гүнә этмез, себәби ол Худайың перзендидир.

¹⁰ Кимиң Худайың перзендидиги, кимиң болса иблисиңкидиги шундан белли: догры иш этмейән ве доганыны сөймейән адам Худайдан дәлдир.

Бири-биримизи сөелиң

¹¹ Сиз бири-биримизи сөймелидигимиз барада овал-башдан эшиденсиңиз.

¹² Шейтана дегишли болуп, өз доганыны өлдүрен Кабыл ялы болмалың. Кабыл оны нәме үчин өлдүрди? Себәби өз эден ишлери писликди, доганыныңкы болса догруды.

¹³ Эй, доганларым, эгер дүнйә сизи йигренйән болса, гең галмаң.

¹⁴ Биз өзүмизиң өлүмден яшайша говшандыгымызы билйәрис, себәби доганларымызы сөййәрис. Доганыны сөймейән адам өлүмиң пенҗесинде галяндыр.

¹⁵ Доганыны йигренйән адам ганхордыр. Хич бир ганхорың болса бакы яшайша говушмаяндыгыны билйәнсиңиз.

¹⁶ Иса Месих бизиң үчин Өз җаныны пида эденде, биз хакыкы сөйгиниң нәмедигини билдик. Диймек, биз хем доганымыз үчин җанымызы пида этмәге тайяр болмалыдырыс.

¹⁷ Дүнйә малына бай болуп, доганыны мәтәчликде гөренде, оңа йүреги авамаян адамда, хей-де, Худайың сөйгүси болуп билерми?

¹⁸ Эзиз балалар, хакыкы сөйгимизи йөне бир гуры геп билен дәл-де, иш йүзүнде амал билен гөркезелиң.

^19-20 Шонда биз өзүмизиң хакыката дегишлидигимизи билерис ве Худайың хузурында бизиң выжданымыз пәк болар. Эгер выжданымыз бизи язгарайса-да, Худай ондан бейикдир, Ол хемме зады билйәндир.

²¹ Мәхрибанларым, эгер выжданымыз бизи язгармаса, онда Худайың хузурында ынамлы боларыс.

²² Ондан нәме дилесек аларыс, себәби биз Онуң буйрукларыны берҗай эдип, Оны хошнут эдйән ишлери эдйәндирис.

²³ Биз Онуң Оглы Иса Месихе иман этмелидирис ве Исаның буйрушы ялы бири-биримизи сөймелидирис. Бу Худайың буйругыдыр.

²⁴ Худайың буйрукларыны берҗай эдйән адам Худай билен, Худай хем онуң билен яшаяндыр. Худайың бизиң билен яшаяндыгыны Онуң хер биримизе берен Рухундан билйәрис.