1 Ёханна 2 - Мукаддес Китап

2‑нҗи бап

¹ Эзиз балаларым! Мен сизе шулары гүнә этмезлигиңиз үчин язярын. Эмма кимдир бири гүнә этсе, Атаның хузурында аклавчымыз Иса Месих бар, Ол адылдыр.

² Ол бизиң үчин гурбан болды. Худай Ол аркалы бизиң гүнәлеримизи, диңе бизиң дәл, эйсем, бүтин дүнйәниң гүнәлерини багышлады.

³ Эгер Худайың буйрукларыны берҗай эдйән болсак, онда Оны танаяндыгымызы мәлим эдйәрис.

⁴ «Худайы танаярын» дийибем, Онуң буйрукларыны берҗай этмейән адам яланчыдыр, онда хакыкат ёкдур.

⁵ Эмма Худайың сөзүни берҗай эдйән адамда Онуң сөйгүси хакыкатданам кәмилдир. Ине, биз Худай билен яшаяндыгымызы шейдип билйәрис.

⁶ «Мен Худая сыгынып яшаярын» диййән адам Иса Месихиң яшайшы ялы яшамалыдыр.

⁷ Мәхрибанларым, мен сизе тәзе буйрук дәл-де, илкибашдан берлен көне буйругы язярын. Бу көне буйрук сизиң өңки эшиден сөзүңиздир.

⁸ Эмма мениң сизе язян бу буйругыма тәзе дийсең хем болар, себәби бу буйругың хакыкаты Месихде ве сизде аян боляр. Чүнки түмлүк өтүп баряр, хакыкы нур болса эййәм парлаяндыр.

⁹ Өзүниң нурда яшаяндыгыны айдып-да, доганыны йигренйән адам хенизем түмлүкдедир.

¹⁰ Доганыны сөййән адам нурда яшаяндыр, онда бүдремәге себәп болуп билмез.

¹¹ Йөне ким доганыны йигренйән болса, ол түмлүкдедир. Ол түмлүкде гезип, нирә баряныны билйән дәлдир, себәби түмлүк онуң гөзлерини көр эдендир.

¹² Эй, балалар, сизе язярын: Месихиң хатырасына гүнәлериңиз багышланды.

¹³ Эй, аталар, сизе язярын: сиз овал-башдан аян болан Исаны танаярсыңыз. Эй, йигитлер, сизе язярын: сиз шейтаны еңдиңиз.

¹⁴ Эй, балалар, сизе язярын: сиз Атамыз Худайы танаярсыңыз. Эй, аталар, сизе язярын: сиз овал-башдан аян болан Исаны танаярсыңыз. Эй, йигитлер, сизе язярын: сиз гүйчлүсиңиз, Худайың сөзи калбыңыза орнандыр. Сиз шейтаны еңдиңиз.

¹⁵ Дүнйә ве ондакы затлара көңүл бермәң. Дүнйәни сөййән адамда Атаның сөйгүси ёкдур.

¹⁶ Себәби дүнйәдәки әхли затлар: гүнәли хөвеслер, ачгөзлүк ве байлык билен магтанмак Атадан дәлдир, дүнйәдендир.

¹⁷ Дүнйә ве онуң хөвеслери гечер гидер, эмма Худайың ырадасыны берҗай эдйән адам бакы яшар.

Месих е гаршы таглымат барада дуйдурыш

¹⁸ Эй, балалар, бу дүнйәниң ахыркы гүнлери етип гелендир. Сиз Месихиң душманының гелҗекдигини эшиденсиңиз. Хут шу вагт хем Месихе гаршы чыкянларың энчемеси пейда болды. Ине, бу вакалардан биз дүнйәниң ахыркы гүнлериниң етип гелендигини билйәрис.

¹⁹ Олар бизиң арамыздан гитдилер, аслында-да бизе дегишли дәлдилер. Дегишли болсадылар, бизиң арамызда галардылар. Эмма чыкып гитмеклери оларың хич бириниң бизе дегишли дәлдигини әшгәр этди.

²⁰ Сизиң хеммәңиз болса хакыкаты билйәнсиңиз, чүнки Иса Месих сизе Мукаддес Рухы берди.

²¹ Мен сизе хакыкаты билмейәндигиңиз үчин дәл-де, эйсем, оны хут билйәндигиңиз үчин язярын, себәби хич бир яланың хакыкат билен умумылыгы ёкдур.

²² Онда яланчы ким? Исаның Месихдигини инкәр эдйән адам яланчыдыр. Ол Месихиң душманыдыр! Ол Атаны-да, Оглы-да инкәр эдйәр.

²³ Оглы инкәр эдйән адамда Ата ёкдур. Эмма Оглы ыкрар эдйән адамда велин Ата бардыр.

²⁴ Гой, сизиң илкибашдан эшиден сөзүңиз калбыңызда орнасын. Шонда сиз Огул биленем, Ата биленем яшарсыңыз.

²⁵ Чүнки Месих бизе бакы яшайшы вада берди.

²⁶ Бу затлары сизи аздырҗак болян адамлардан хабардар болмагыңыз үчин яздым.

²⁷ Эмма Месихиң сизе берен Мукаддес Рухы өзүңизде галяндыр, сизе өвретмегиң гереги ёк. Мукаддес Рухуң сизе өвредйән хер бир зады ялан дәл-де, хакыкатдыр. Онуң сизе өвредиши ялы, Месих билен яшамалысыңыз.

²⁸ Инди, эй, балалар, Месих геленде ынамымыз болуп, Онуң хузурында утанмаз ялы, Онуң билен яшалың.

²⁹ Сиз Месихиң адылдыгыны билйәнсиңиз, шонуң үчин адалаты берҗай эдйән хер бир ынсан Худайың перзендидир.