Matayu 3 - Maaron Saveeŋ Tooni Patabuyaaŋ Tuam

Ŋeer rughuzaaŋa Yoan igharaat eez pa Yesu Krisi

¹ Saawe tau ŋeer rughuzaaŋa Yoan ipaburigin uraat tooni, i ila ivot nugh ŋginaaŋa to Yudea, ve ivovotia Maaron aliiŋa pa tamtamon ighe:

² “Apul ŋgar tsiam sasaghati ileple, ve atoor ŋgar tsiam imuul ila pa Maaron! Pa malau mako pale pooz to nugh sambam ivot ighazooŋ.” Mt 4:17; Mbaŋ 2:38

³ Yoan tawe ta muuŋ propet Isaia isavia saveeŋ siriv iŋaruini ighe: “Ŋeer ee iboboob izi nugh ŋginaaŋa ighe: ‘Agharaat eez pa Ŋeer Tiina. Apaduduŋai eez ta naol ne pani le tiduduuŋ.’ ” Is 40:3

⁴ Yoan inonogh ghi pa uuli tau tigharaata pa kamel ooro, ve ipuus ŋgaali pa puus tau tigharaata pa ŋgai uuli. Ve ighanghan siis, ve ighunghun tok suuru. 2King 1:8

⁵ Eval tiina to Yerusalem, yesŋa nugh naol to Yudea tomania taan sirivu tau igharau yaa Yordan na, tilala tooni izi yaa Yordan.

⁶ Yes tivovotia sosor toozi ila tooni, ve i irurughuuz zi ta sewe. Mbaŋ 22:16

⁷ Zeran tutuuŋa ve Sadusi katini tila tooni paam tighe i irughuuz zi. Eemon Yoan ighit zi, ve isaav pazi ighe: “Yam moot sasaghati natŋa! Sei imbaaŋ payam ighe alam ta sene? Mindai, yam aghe aŋguaaz taumim pa aatyavyav to Maaron tau ighe ivot ne? Mt 12:34, 23:33

⁸ Isaav ighe onoon yam apul ŋgar tsiam sasaghati ileple ve atoor ŋgar tsiam ila pa Maaron, na atotoi anooŋa tooni popoia siriv ivot gha taghita. Mt 7:16; Mbaŋ 26:20

⁹ Yam aghe Abaram paaghu tooni yam. Eemon anumeer tana sov. Pa yau nasaav payam: Maaron, i irau isaav pa maet tane, ve tiburig timin Abaram paaghu tooni. Yo 8:33, 39; Ro 2:28+; Ga 3:7

¹⁰ Alooŋ. Nakavasi to Maaron igheen ila ai pughuzi ve isaŋan wa. Ai tisov tau anoŋazi popoia mako, ene aat nakavasi ighan zi tizi, ve tisik zi tizala yav ighan zi. Mt 7:17+; Lu 13:6+; Yo 15:2, 6; Ro 11:17+

¹¹ Yau narughuuz gham pa yaa imin ilaal payam ighe yam atoor ŋgar tsiam ila pa Maaron wa. Eemon ŋeer ee aat ilam murei payau. I tapiri tiina. Iliiv ghau kat. Uraat sorok imin badooŋ zuzuuŋa to aaghe, ene paam, yau poiag irau to nagham pani mako. I pale igham Avuvu Patabuyaaŋ payam tomania yav. Yo 3:5+; Mbaŋ 1:5, 19:4

¹² Gabua to tiriiŋ wit, ta i ikisi ila niima ve isasaŋan. Pasaa, i pale igabiiz tamtamon, ve ivureer zi imin ŋeer tau ilos wit tooni ve itiri izaa. Leso yaghur ivuvuur wit uuli ilale, ve wit anooŋa timburur tizi. Wit anooŋa tawe, i pale ighur poghania ila ruum to aniiŋ. Eemon wit uuli, i pale ikori ila yav ighani. Yav tawe, irau tirav matini mako. Ighanghan irau saawe.” Mt 13:30

Yesu igham yaa

¹³ Saawe tana, Yesu ipul taan sirivu to Galilaia, ve ilaagh ila ivot yaa Yordan, leso Yoan irughuuza.

¹⁴ Eemon Yoan iyok pani rekia mako. Isaav pani ighe: “Yo ulam tsiau pasaa? Yo urughuuz ghau, o iduduuŋ.”

¹⁵ Yesu iyol aliiŋa ighe: “Mako. Aazne, yo aat utaghon imin tau nasaav ne. Pa iit aat tataghon suvinia ŋgar duduuŋa, ve tagham anooŋa tooni ivot, o poia.” Tauvene Yoan ilooŋ Yesu aliiŋa, ve irughuuza.

¹⁶ Yesu ipul yaa ve izaa, ve saawe duduuŋ tana, sambam ikaak, ve i ighita Maaron Avuvu izilam imin mbuun, ve izala paavo. Yo 1:32

¹⁷ Ra saveeŋ sambam izilam ighe: “Ŋeer tana, ene yau taug Natug eemon. Yau lolog igheen tooni, ve igham ghau lolog poia kat.” Mbo 2:7; Is 42:1; Mt 12:18, 17:5