Bìoball air-loidhne

馬太福音 9 - 現代台語譯本羅馬字版

Iâ-so͘ I-hó Poàn-sin-put-sūi ê Lâng
( Khó 2.1-12 ; Lō͘ 5.17-26 )

¹ Iâ-so͘ chē-chûn kè ô͘, tńg-khì ka-kī ê siâⁿ.

² Ū lâng ēng chhn̂g kng chi̍t ê poàn-sin-put-sūi ê lâng lâi Iâ-so͘ hia. I khòaⁿ-kìⁿ in ê sìn-sim, chiū tùi hit-ê poàn-sin-put-sūi ê lâng kóng, “Siàu-liân-lâng, an-sim, lí ê chōe sià-bián lah!”

³ Ū kúi-nā ê keng-ha̍k-kàu-su sim-lāi siūⁿ, “Chit-ê lâng teh siat-to̍k Siōng-tè!”

⁴ Iâ-so͘ chai in ê sim-su chiū mn̄g in, “Sī-án-chóaⁿ lín sim-lāi ū chit-khoán pháiⁿ liām-thâu?

⁵ Tùi chit-ê lâng kóng ‘Lí ê chōe sià-bián lah’, á-sī kóng ‘Lí khí-lâi kiâⁿ’, tó chi̍t hāng khah kán-tan?

⁶ Put-kò góa beh hō͘ lín chai, Jîn-chú tī tōe-chiūⁿ ū sià-chōe ê koân-pèng.” Jiân-āu I tùi hit-ê poàn-sin-put-sūi ê lâng kóng, “Khí--lâi, giâ lí ê chhn̂g, tńg-khì lín tau!”

⁷ Hit-ê lâng chiū khí--lâi, tńg-khì in tau.

⁸ Chèng-lâng khòaⁿ--tio̍h chin tio̍h-kiaⁿ, kui êng-kng hō͘ Siōng-tè, in-ūi I ū chiong chit-khoán koân-pèng sù hō͘ lâng.

Iâ-so͘ Ho͘-tiàu Má-thài
( Khó 2.13-17 ; Lō͘ 5.27-32 )

⁹ Iâ-so͘ lī-khui hia ǹg thâu-chêng kiâⁿ ê sî khòaⁿ-tio̍h chi̍t ê lâng, miâ kiò-chòe Má-thài, chē tī sè-koan. Iâ-so͘ kā i kóng, “Lâi tè góa!” I chiū khí-lâi tè I.

¹⁰ Iâ-so͘ tī Má-thài ê chhù chia̍h-pn̄g ê sî, ū chin chōe ba̍uh-sè--ê kap chōe-jîn mā lâi kap Iâ-so͘ í-ki̍p I ê bûn-tô͘ chòe-hé chia̍h.

¹¹ Hoat-lī-sài-phài ê lâng khòaⁿ--tio̍h chiū tùi I ê bûn-tô͘ kóng, “Sī-án-chóaⁿ lín lāu-su kap ba̍uh-sè--ê í-ki̍p chōe-jîn chòe-hé chia̍h-pn̄g?”

¹² Iâ-so͘ thiaⁿ--tio̍h chiū kóng, “Kiān-khong--ê bô su-iàu i-seng, phòa-pīⁿ--ê chiah ū su-iàu.

¹³ Lín khì ha̍k-si̍p chit-kù Sèng-keng ê ōe, ‘Góa ài lîn-bín, bô ài chè-mi̍h.’ In-ūi góa lâi, m̄-sī beh chio gī-lâng, sī beh chio chōe-jîn.”

Kìm-chia̍h ê Būn-tôe
( Khó 2.18-22 ; Lō͘ 5.33-39 )

¹⁴ Ū chi̍t piàn, Iok-hān ê bûn-tô͘ lâi kìⁿ Iâ-so͘, tùi I kóng, “Goán kap Hoat-lī-sài-phài ê lâng siông-siông kìm-chia̍h, sī-án-chóaⁿ lí ê bûn-tô͘ bô kìm-chia̍h?”

¹⁵ Iâ-so͘ ìn kóng, “Sin-lông iáu kap hun-iàn ê lâng-kheh chòe-hé ê sî, lâng-kheh kiám ōe ai-siong? Ji̍t-chí teh-beh kàu, sin-lông ōe hō͘ lâng tùi in tiong-kan lia̍h--khì, hit-sî in chiū ōe kìm-chia̍h.

¹⁶ “Bô lâng ēng bô kiu-chúi ê pò͘ khì pó͘ kū-saⁿ, in-ūi pó͘--ê hit-tè ōe kā saⁿ kiù-li̍h, tian-tò phòa koh-khah tōa-khang.

¹⁷ Mā bô lâng chiong sin-chiú ji̍p tī kū phê-tē. Nā án-ni chòe, phê-tē ōe piak-phòa, chiú lâu--chhut-lâi, phê-tē mā pháiⁿ--khì. Sin-chiú eng-kai ji̍p tī sin phê-tē, án-ni nn̄g hāng chiū lóng pó-choân.”

Hōe-tn̂g Chú-koán ê Cha-bó͘-kiáⁿ kap Tì-tio̍h Hiat-lāu-pīⁿ ê Hū-jîn-lâng
( Khó 5.21-43 ; Lō͘ 8.40-56 )

¹⁸ Iâ-so͘ tùi in kóng chiah-ê ōe ê sî, ū chi̍t ê hōe-tn̂g ê chú-koán lâi kūi tī I ê bīn-chêng, kóng, “Góa ê cha-bó͘-kiáⁿ tú-á sí--khì, chhiáⁿ lí lâi kā i hōaⁿ-chhiú, i chiū ōe oa̍h--khí-lâi.”

¹⁹ Iâ-so͘ chiū khí--lâi, tè i khì; I ê bûn-tô͘ mā khì.

²⁰ Tú hit-sî, ū chi̍t ê tì-tio̍h hiat-lāu-pīⁿ cha̍p-jī nî kú ê hū-jîn-lâng kiâⁿ óa-khì Iâ-so͘ ê āu-bīn, bong I saⁿ-á-ku ê chhiu.

²¹ In-ūi i sim-lāi siūⁿ, “Góa kan-ta bong-tio̍h I ê saⁿ, pīⁿ chiū ōe hó.”

²² Iâ-so͘ oa̍t kè-lâi khòaⁿ i, kā i kóng, “Cha-bó͘-kiáⁿ, an-sim; lí ê sìn-sim hō͘ lí hó--khì lah!” Hū-jîn-lâng sûi-sî tit-tio̍h i-hó.

²³ Iâ-so͘ lâi kàu hōe-tn̂g chú-koán ê chhù, khòaⁿ-tio̍h pûn phín-á--ê kap kui tōa-tīn lâng lōng-lōng-kún,

²⁴ chiū kā in kóng, “Lín lóng chhut--khì, chit-ê cha-bó͘ gín-á m̄-sī sí--khì, sī teh khùn.” In chiū kā I thí-chhiò.

²⁵ Kóaⁿ kûn-chiòng chhut--khì liáu-āu, Iâ-so͘ ji̍p-khì cha-bó͘ gín-á ê pâng-keng, khan i ê chhiú, cha-bó͘ gín-á chiū khí--lâi.

²⁶ Tùi án-ni, chit-ê siau-sit thoân kàu hit tōe-khu ê ta̍k só͘-chāi.

Iâ-so͘ I-hó Nn̄g Ê Bông-jîn

²⁷ Iâ-so͘ lī-khui hia ê sî, ū nn̄g ê bông-jîn tè I khì; in tōa-siaⁿ hoah, “Tāi-pi̍t ê Kiáⁿ, lîn-bín goán!”

²⁸ Iâ-so͘ ji̍p-khì chhù-lāi, bông-jîn chiū kiâⁿ óa--khì. Iâ-so͘ mn̄g in, “Lín sìn góa ōe-tàng kā lín chòe chit-ê tāi-chì sī--bô?” In ìn kóng, “Chú ah, lí ōe.”

²⁹ Jiân-āu, Iâ-so͘ bong in ê ba̍k-chiu, kóng, “Chiàu lín ê sìn-sim hō͘ lín si̍t-hiān.”

³⁰ In ê ba̍k-chiu chiū khui, ōe khòaⁿ--kìⁿ. Iâ-so͘ giâm-giâm hoan-hù in kóng, “Chhian-bān m̄-thang hō͘ lâng chai chit-ê tāi-chì.”

³¹ M̄-kú in chi̍t-ē chhut--khì, soah chiong Iâ-so͘ ê tāi-chì thoân-piàn hit tōe-khu ê ta̍k só͘-chāi.

Iâ-so͘ I-hó Chi̍t Ê Bōe Kóng-ōe ê Lâng

³² In chhut--khì ê sî, ū lâng chhōa chi̍t ê hō͘ kúi hū-sin bōe kóng-ōe ê lâng lâi Iâ-so͘ hia.

³³ Kúi chi̍t-ē hō͘ Iâ-so͘ kóaⁿ--chhut-khì, hit-ê bōe kóng-ōe ê lâng chiū kóng-ōe. Kûn-chiòng lóng tio̍h-kiaⁿ, kóng, “Tī Í-sek-lia̍t goán m̄-bat khòaⁿ-tio̍h chit-khoán tāi-chì.”

³⁴ Put-kò Hoat-lī-sài-phài ê lâng kóng, “I sī khò kúi-ông teh kóaⁿ-kúi.”

Iâ-so͘ Khó-lîn Kûn-chiòng

³⁵ Iâ-so͘ kiâⁿ-thàu chiu-ûi só͘-ū ê siâⁿ-chhī kap chng-siā, tī in ê hōe-tn̂g kà-sī lâng, thoân Thian-kok ê hok-im, i-hó ta̍k-khoán ê chèng-thâu kap pīⁿ-thiàⁿ.

³⁶ I khòaⁿ-tio̍h hiah tōa-tīn ê lâng, chiū khó-lîn in, in-ūi in chhin-chhiūⁿ iûⁿ bô bo̍k-chiá, khùn-khó͘, bô lâng chiàu-kò͘.

³⁷ Iâ-so͘ chiū tùi I ê bûn-tô͘ kóng, “Thang siu-sêng--ê chin chōe, choh-kang ê lâng chin chió.

³⁸ Só͘-í, lín tio̍h kî-kiû koán siu-sêng ê Chú phài kang-lâng khì siu-sêng.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan