Bìoball air-loidhne

馬太福音 6 - 現代台語譯本羅馬字版

Chín-chè

¹ “Tio̍h kín-sīn, m̄-thang ūi-tio̍h beh hō͘ lâng khòaⁿ chiah kò͘-ì tī lâng ê bīn-chêng tián lín ê kèng-khiân; án-ni chòe bōe-tàng tùi lín ê Thiⁿ-pē tit-tio̍h pò-siúⁿ.

² “Só͘-í, lí chín-chè ê sî, m̄-thang seng pûn lat-pah pò lâng chai, chhin-chhiūⁿ ké-hó ê lâng tī hōe-tn̂g kap koe-lō͘ án-ni chòe, ài hō͘ lâng o-ló. Góa si̍t-chāi kā lín kóng, in í-keng tit-tio̍h in ê pò-siúⁿ lah.

³ Lí chín-chè ê sî, m̄-thang hō͘ lí ê tò-chhiú chai chiàⁿ-chhiú ê só͘-chòe,

⁴ hō͘ lí thang tiām-tiām-á chín-chè, tiām-tiām-á teh khòaⁿ ê lí ê Pē ōe kā lí pò-siúⁿ.”

Kî-tó
( Lō͘ 11.2-4 )

⁵ “Lín kî-tó ê sî, m̄-thang chhin-chhiūⁿ ké-hó ê lâng, in-ūi in ài hō͘ lâng khòaⁿ, kò͘-ì khiā tī hōe-tn̂g á-sī lō͘-kháu kî-tó. Góa si̍t-chāi kā lín kóng, in í-keng tit-tio̍h pò-siúⁿ lah.

⁶ Lí kî-tó ê sî, tio̍h ji̍p-khì pâng-keng lāi, koaiⁿ-mn̂g, tùi lí tiām-tiām-á teh khòaⁿ ê Pē kiû, án-ni tiām-tiām-á teh khòaⁿ ê lí ê Pē ōe kā lí pò-siúⁿ.

⁷ “Lín kî-tó ê sî, m̄-thang chhin-chhiūⁿ Gōa-pang-lâng kóng-liáu koh kóng, in-ūi in siūⁿ, kóng khah chōe ōe Siōng-tè chiah ōe thiaⁿ--kìⁿ.

⁸ Lín m̄-thang kap in siâng-khoán; in-ūi iáu-bē kiû í-chêng, lín ê Pē í-keng chai lín ê su-iàu.

⁹ Só͘-í, lín tio̍h án-ni kî-tó: Goán ê Thiⁿ-pē: Goān lí ê sèng-miâ siū chun-chông.

¹⁰ Goān lí si-hêng chú-koân; goān lí ê chí-ì si̍t-hiān, tī tōe-chiūⁿ chhin-chhiūⁿ tī thiⁿ-téng.

¹¹ Kiû lí kin-á-ji̍t sù goán su-iàu ê chia̍h-mi̍h.

¹² Kiû lí sià-bián goán ê ko͘-hū, chhin-chhiūⁿ goán mā ū sià-bián ko͘-hū goán ê lâng.

¹³ Kiû lí m̄-thang hō͘ goán hām-lo̍h tam-tng bōe khí ê chhì-thàm, kiù goán thoat-lī hit-ê Siâ-ok-chiá.

¹⁴ “Lín nā sià-bián lâng ê kè-sit, lín ê Thiⁿ-pē mā ōe sià-bián lín;

¹⁵ lín nā bô sià-bián lâng, lín ê Thiⁿ-pē mā bōe sià-bián lín ê kè-sit.”

Kìm-chia̍h

¹⁶ “Lín kìm-chia̍h ê sî, m̄-thang chhin-chhiūⁿ ké-hó ê lâng iu-thâu-kat-bīn; in-ūi in kò͘-ì hō͘ bīn pháiⁿ-khòaⁿ, ài hō͘ lâng khòaⁿ-chhut in teh kìm-chia̍h. Góa si̍t-chāi kā lín kóng, in í-keng tit-tio̍h pò-siúⁿ lah.

¹⁷ Lí kìm-chia̍h ê sî, thâu-mn̂g tio̍h boah-iû, bīn tio̍h sóe,

¹⁸ hō͘ lâng khòaⁿ bōe chhut lí teh kìm-chia̍h, chí-ū hō͘ tiām-tiām-á teh khòaⁿ ê Pē khòaⁿ--kìⁿ, án-ni tiām-tiām-á teh khòaⁿ ê lí ê Pē ōe kā lí pò-siúⁿ.”

Thiⁿ-téng ê Châi-pó
( Lō͘ 12.33-34 )

¹⁹ “M̄-thang ūi-tio̍h ka-kī chek-chū châi-pó tī tōe-chiūⁿ, tī chia ū thâng kā, ōe siⁿ-sian, chha̍t ōe ó͘-khang thau-the̍h.

²⁰ Tio̍h ūi-tio̍h ka-kī chek-chū châi-pó tī thiⁿ-téng, tī hia bô thâng kā, bōe siⁿ-sian, bô chha̍t ó͘-khang thau-the̍h.

²¹ In-ūi lí ê châi-pó tī tó-ūi, lí ê sim mā ōe tī hia.”

Seng-khu ê Kng
( Lō͘ 11.34-36 )

²² “Ba̍k-chiu sī seng-khu ê teng. Lí ê ba̍k-chiu nā kim, kui seng-khu chiū kng-bêng;

²³ lí ê ba̍k-chiu nā hoe, kui seng-khu chiū o͘-àm. Án-ni, lí lāi-bīn ê kng nā pìⁿ-chòe àm, chit-ê o͘-àm sī jōa-á-ni̍h giâm-tiōng!”

Siōng-tè á-sī Châi-hù
( Lō͘ 16.13 ; 12.22-31 )

²⁴ “Bô lâng ōe-tàng ho̍k-sāi nn̄g ê chú-lâng; i nā m̄-sī oàn-hūn chit-ê, thiàⁿ hit-ê, chiū-sī khòaⁿ-tāng chit-ê, khòaⁿ-khin hit-ê. Lín bōe-tàng siâng-sî ho̍k-sāi Siōng-tè koh ho̍k-sāi chîⁿ-châi.

²⁵ “Só͘-í, góa kā lín kóng, m̄-thang ūi-tio̍h lín ê sìⁿ-miā beh chia̍h sím-mi̍h, beh lim sím-mi̍h teh chhau-hoân; mā m̄-thang ūi-tio̍h lín ê seng-khu beh chhēng sím-mi̍h teh chhau-hoân. Sìⁿ-miā kiám m̄-sī pí chia̍h-mi̍h khah tiōng-iàu? Seng-khu kiám m̄-sī pí i-ho̍k khah tiōng-iàu?

²⁶ Lín khòaⁿ khong-tiong ê pe-chiáu, in bô chèng-choh, bô siu-sêng, mā bô tún-chek niû-si̍t tī chhng-khò͘, lín ê Thiⁿ-pē mā teh kā in iúⁿ-chhī. Lín kiám bô pí in khah kùi-tiōng?

²⁷ Lín kiám ū lâng siūⁿ-kóng chhau-hoân ōe-tàng hō͘ ka-kī ê sìⁿ-miā ke oa̍h chi̍t-sî-á kú?

²⁸ “Lín ná tio̍h in-ūi beh chhēng sím-mi̍h chhau-hoân? Lín siūⁿ-khòaⁿ soaⁿ-iá ê hoe án-chóaⁿ teh tōa-châng; in bô lô-khó͘, mā bô pháng-chit.

²⁹ Put-kò góa kā lín kóng, liân Só͘-lô-bûn siōng êng-hôa ê sî, i chhēng ê saⁿ to bô pí chiah-ê hoe ê chi̍t lúi koh-khah súi.

³⁰ Soaⁿ-iá ê hoe-chháu kin-á-ji̍t teh oa̍h, bîn-á-chài hō͘ lâng hiat-lo̍h hé-lô͘, Siōng-tè to án-ni kā in chng-thāⁿ, I kiám bōe koh-khah kā lín chng-thāⁿ? Lín ná chiah-ni̍h bô sìn-sim!

³¹ “Só͘-í, lín m̄-bián chhau-hoân kóng ‘Goán beh chia̍h sím-mi̍h’ á-sī ‘Goán beh lim sím-mi̍h, beh chhēng sím-mi̍h’.

³² Chiah-ê lóng sī Gōa-pang-lâng teh tui-kiû--ê. Lín ê Thiⁿ-pē chai chiah-ê lóng sī lín só͘ su-iàu--ê.

³³ Tio̍h seng tui-kiû I ê chú-koân kap I ê chí-ì si̍t-hiān, chiah-ê mi̍h-kiāⁿ chiū ōe lóng sòa hō͘ lín.

³⁴ Só͘-í, m̄-thang ūi-tio̍h bîn-á-chài chhau-hoân; bîn-á-chài ê tāi-chì bîn-á-chài chiah chhau-hoân. Chi̍t ji̍t ê kan-khó͘ chi̍t ji̍t tng.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan