馬太福音 4 - 現代台語譯本羅馬字版

Iâ-so͘ Siū Chhì-thàm
( Khó 1.12-13 ; Lō͘ 4.1-13 )

¹ Āu-lâi, Iâ-so͘ hō͘ Sèng Sîn chhōa-khì khòng-iá, tī hia siū Mô͘-kúi chhì-thàm.

² Iâ-so͘ kìm-chia̍h sì-cha̍p mî-ji̍t, āu-lâi chiū iau.

³ Chhì-thàm-chiá óa-lâi tùi I kóng, “Kì-jiân lí sī Siōng-tè ê Kiáⁿ, bēng-lēng chiah-ê chio̍h-thâu pìⁿ-chòe piáⁿ!”

⁴ Iâ-so͘ ìn kóng, “Sèng-keng ū kì-chài: Lâng teh oa̍h m̄-nā óa-khò piáⁿ, sī óa-khò tùi Siōng-tè ê chhùi só͘ chhut ê ta̍k-kù ōe.”

⁵ Jiân-āu, Mô͘-kúi chhōa Iâ-so͘ ji̍p-khì Sèng-tiān, hō͘ I khiā tī Sèng-tiān chhù-téng siōng-koân ê só͘-chāi,

⁶ tùi I kóng, “Kì-jiân lí sī Siōng-tè ê Kiáⁿ, thiàu--lo̍h-khì! In-ūi Sèng-keng ū kì-chài: Siōng-tè ōe ūi-tio̍h lí bēng-lēng I ê thiⁿ-sài, in ōe ēng chhiú hû lí, hō͘ lí ê kha bōe kha̍p-tio̍h chio̍h-thâu.”

⁷ Iâ-so͘ ìn kóng, “Sèng-keng koh ū kì-chài: M̄-thang chhì-thàm Chú — lí ê Siōng-tè.”

⁸ Mô͘-kúi koh chhōa Iâ-so͘ chiūⁿ chi̍t ê chin-koân ê soaⁿ, chiong sè-chiūⁿ bān-kok kap in ê êng-hôa hō͘ I khòaⁿ,

⁹ tùi I kóng, “Lí nā phak lo̍h-lâi pài góa, chiah-ê it-chhè góa lóng hō͘ lí.”

¹⁰ Iâ-so͘ ìn kóng, “Sat-tàn, cháu! Sèng-keng ū kì-chài: Tio̍h pài Chú — lí ê Siōng-tè, chí-ū ho̍k-sāi I.”

¹¹ Jiân-āu Mô͘-kúi lī-khui Iâ-so͘; ū thiⁿ-sài lâi kā I sū-hāu.

Iâ-so͘ tī Ka-lī-lī Khai-sí Thoân-tō
( Khó 1.14-15 ; Lō͘ 4.14-15 )

¹² Iâ-so͘ thiaⁿ-tio̍h Iok-hān hō͘ lâng lia̍h--khì chiū thè-khì Ka-lī-lī.

¹³ I lī-khui Ná-sat-le̍k khì tòa tī Se-pò͘-lûn kap Ná-hut-tha-lī tōe-khu, Ka-lī-lī ô͘-piⁿ ê Ka-pek-lông.

¹⁴ Che sī beh èng-giām thong-kè sian-ti Í-sài-a só͘ kóng ê ōe:

¹⁵ Se-pò͘-lûn ê tōe, Ná-hut-tha-lī ê tōe, iân-hái ê lō͘, Iok-tàn-hô tang-hōaⁿ, Gōa-pang-lâng ê Ka-lī-lī,

¹⁶ tiàm tī o͘-àm tiong ê lâng ū khòaⁿ-kìⁿ tōa-kng; tiàm tī sí-ìm ê tōe--ê ū kng chiò in.

¹⁷ Tùi hit-sî, Iâ-so͘ khai-sí soan-iông kóng, “Tio̍h hóe-kái, in-ūi Thian-kok teh-beh si̍t-hiān lah!”

Iâ-so͘ Ho͘-tiàu Sì Ê Lia̍h-hî--ê
( Khó 1.16-20 ; Lō͘ 5.1-11 )

¹⁸ Iâ-so͘ tī Ka-lī-lī ô͘-piⁿ teh kiâⁿ ê sî, khòaⁿ-tio̍h nn̄g ê hiaⁿ-tī, kiò-chòe Pí-tek ê Se-bûn kap i ê sió-tī An-tek-lia̍t, tī ô͘--ni̍h teh pha-bāng, in-ūi in sī lia̍h-hî--ê.

¹⁹ I tùi in kóng, “Lâi tè góa, góa beh hō͘ lín tit-tio̍h lâng chhin-chhiūⁿ lia̍h-hî--ê tit-tio̍h hî.”

²⁰ In sûi-sî kā bāng pàng--leh, khì tè Iâ-so͘.

²¹ Iâ-so͘ kiâⁿ chìn-chêng, khòaⁿ-tio̍h lēng-gōa nn̄g ê hiaⁿ-tī, Se-pì-thài ê kiáⁿ Ngá-kok kap i ê sió-tī Iok-hān. In kap lāu-pē Se-pì-thài tī chûn-téng teh chéng-lí bāng, I chiū ho͘-tiàu in.

²² In sûi-sî chiong chûn kap lāu-pē pàng--leh, khì tè Iâ-so͘.

Iâ-so͘ tī Ka-lī-lī Thoân-tō
( Lō͘ 6.17-19 )

²³ Iâ-so͘ kàu Ka-lī-lī ta̍k só͘-chāi, tī in ê hōe-tn̂g kà-sī lâng, thoân Thian-kok ê hok-im, i-hó bîn-kan ta̍k-khoán ê pīⁿ-chèng.

²⁴ I ê miâ-siaⁿ thoân kàu Sū-lī-a ê ta̍k só͘-chāi. Lâng chiong só͘-ū ê pīⁿ-lâng, chiū-sī siâ-sîn hū-sin, iûⁿ-hîn, kap poàn-sin-put-sūi, téng, hoān-tio̍h ta̍k-khoán chèng-thâu kap pīⁿ-thiàⁿ ê lâng lóng chhōa-lâi I hia, I chiū kā in i-hó.

²⁵ Ū chi̍t tōa-tīn lâng tùi Ka-lī-lī, Te-ka-pho-lí, Iâ-lō͘-sat-léng, Iû-thài, kap Iok-tàn-hô tang-hōaⁿ lâi tè I.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan