Bìoball air-loidhne

馬太福音 27 - 現代台語譯本羅馬字版

Iâ-so͘ Hō͘ Lâng Ah-khì Kìⁿ Pí-lia̍p-to
( Khó 15.1 ; Lō͘ 23.1-2 ; Iok 18.28-32 )

¹ Thàu-chá, só͘-ū ê chè-si-tiúⁿ kap bîn-kan ê tiúⁿ-ló tàu-tīn chham-siông beh hām-hāi Iâ-so͘, kā I chhú sí-hêng.

² In kā Iâ-so͘ pa̍k--khí-lâi, ah-khì kau hō͘ Lô-má chóng-tok Pí-lia̍p-to.

Iû-tāi ê Sí
( Tô͘ 1.18-19 )

³ Chhut-bōe Iâ-so͘ ê Iû-tāi khòaⁿ-tio̍h Iâ-so͘ í-keng siū tēng-chōe, chiū hō͘-hóe, the̍h hit saⁿ-cha̍p ê gûn-á khì hêng hō͘ hiah-ê chè-si-tiúⁿ kap tiúⁿ-ló,

⁴ kóng, “Chhut-bōe bû-ko͘ ê lâng, góa ū chōe lah!” In ìn kóng, “Bô goán ê tāi-chì, lí ka-kī hū-chek!”

⁵ Iû-tāi chiong hiah-ê gûn-á hiat tī Sèng-tiān ê lāi-bīn chiū lī-khui, khì tiàu--sí.

⁶ Hiah-ê chè-si-tiúⁿ chiong gûn-á khioh--khí-lâi, kóng, “Che sī huih-chîⁿ, bô eng-kai khǹg-ji̍p Sèng-tiān ê kim-khò͘.”

⁷ In chham-siông liáu, koat-tēng ēng chiah-ê chîⁿ khì bóe sio-hûi-lâng ê hn̂g, thang bâi-chòng chhut-gōa-lâng.

⁸ Só͘-í hit-ê hn̂g kàu kin-á-ji̍t iáu kiò-chòe Huih-hn̂g.

⁹ Chit-ê tāi-chì èng-giām Siōng-tè thong-kè sian-ti Iâ-lī-bí só͘ kóng ê ōe: “In the̍h hit saⁿ-cha̍p ê gûn-á, chiū-sī Í-sek-lia̍t-lâng ūi-tio̍h i kó͘-kè ê kè-chîⁿ,

¹⁰ chiàu Chú só͘ bēng-lēng góa--ê, khì bóe hit-khu sio-hûi-lâng ê hn̂g.”

Iâ-so͘ tī Pí-lia̍p-to Bīn-chêng Siū Sím
( Khó 15.2-5 ; Lō͘ 23.3-5 ; Iok 18.33-38 )

¹¹ Iâ-so͘ khiā tī chóng-tok ê bīn-chêng, chóng-tok mn̄g I kóng, “Lí sī Iû-thài-lâng ê Ông sī--bô?” Iâ-so͘ ìn kóng, “Che sī lí kóng--ê.”

¹² Hiah-ê chè-si-tiúⁿ kap tiúⁿ-ló khòng-kò Iâ-so͘ ê sî, I lóng bô ìn.

¹³ Āu-lâi Pí-lia̍p-to tùi I kóng, “In kā lí khòng-kò chiah chōe hāng tāi-chì, lí kiám bô thiaⁿ--kìⁿ?”

¹⁴ Iâ-so͘ iû-goân bô kā i ìn, liân chi̍t kù mā bô, chóng-tok soah kám-kak hui-siông kî-koài.

Iâ-so͘ Siū Phòaⁿ Sí-hêng
( Khó 15.6-15 ; Lō͘ 23.13-25 ; Iok 18.39-19.16 )

¹⁵ Ta̍k-nî ê Pôaⁿ-kè-choeh, chiàu koàn-lē chóng-tok lóng ū pàng chi̍t ê kûn-chiòng ài pàng ê hoān-lâng.

¹⁶ Hit-sî tú-hó ū chi̍t ê tāi-ke lóng bat ê hoān-lâng, miâ kiò-chòe Iâ-so͘ Pa-lia̍p-pa.

¹⁷ Só͘-í, kûn-chiòng chū-chi̍p ê sî, Pí-lia̍p-to mn̄g in kóng, “Lín ài góa pàng tó chi̍t ê hō͘ lín? Iâ-so͘ Pa-lia̍p-pa, á-sī chheng-chòe Ki-tok ê Iâ-so͘?”

¹⁸ Pí-lia̍p-to chai in sī in-ūi oàn-tò͘ chiah chiong Iâ-so͘ kau hō͘ i.

¹⁹ Pí-lia̍p-to khui-têng sím-mn̄g ê sî, i ê hu-jîn chhe lâng lâi kā i kóng, “Hit-ê gī-lâng ê tāi-chì, lí chhian-bān m̄-thang chhap; chā-àm góa tī bîn-bāng tiong in-ūi I siū chin chōe khó͘.”

²⁰ Hiah-ê chè-si-tiúⁿ kap tiúⁿ-ló siàn-tōng bîn-chiòng, kah in tio̍h iau-kiû pàng Pa-lia̍p-pa, kā Iâ-so͘ chhú sí-hêng.

²¹ Chóng-tok koh mn̄g in, “Chit nn̄g ê lâng lín ài góa pàng tó chi̍t ê hō͘ lín?” In ìn, “Pa-lia̍p-pa!”

²² Pí-lia̍p-to mn̄g in, “Án-ni, hit-ê chheng-chòe Ki-tok ê Iâ-so͘, lín ài góa án-chóaⁿ chhú-lí?” Kûn-chiòng lóng ìn, “Kā tèng si̍p-jī-kè!”

²³ Pí-lia̍p-to kóng, “Sī-án-chóaⁿ? I ū chòe sím-mi̍h pháiⁿ tāi-chì?” In koh-khah tōa-siaⁿ hoah, “Kā tèng si̍p-jī-kè!”

²⁴ Pí-lia̍p-to khòaⁿ í-keng bô-chhái-kang, kiông-beh ín-khí pō-tōng, chiū the̍h chúi tī kûn-chiòng bīn-chêng sóe-chhiú, kóng, “Lín ka-kī hū-chek.”

²⁵ Bîn-chiòng lóng ìn kóng, “Chit-ê lâng ê huih-chè, goán kap goán ê kiáⁿ-sun lâi sêng-tam.”

²⁶ Pí-lia̍p-to chiū pàng Pa-lia̍p-pa hō͘ in, koh bēng-lēng lâng ēng piⁿ phah Iâ-so͘, jiân-āu kau I khì tèng si̍p-jī-kè.

Peng-sū Hì-lāng Iâ-so͘
( Khó 15.16-20 ; Iok 19.2-3 )

²⁷ Chóng-tok ê peng-sū ah Iâ-so͘ ji̍p-khì chóng-tok-hú, tiàu-chi̍p choân-tūi ê peng kā I ûi--khí-lâi.

²⁸ In chiong Iâ-so͘ ê saⁿ thǹg--khí-lâi, kā I chhēng chu-âng-sek ê tn̂g-phàu,

²⁹ koh ēng chhì-á pīⁿ chi̍t téng ông-koan kā tì tī thâu-khak téng, chiong chi̍t ki lô͘-tek-á hō͘ I gia̍h tī chiàⁿ-chhiú. In koh kūi tī I ê bīn-chêng hì-lāng, kóng, “Iû-thài-lâng ê Ông bān-sòe!”

³⁰ In koh kā I phùi chhùi-nōa, gia̍h hit-ki lô͘-tek-á sut I ê thâu-khak.

³¹ In kā I hì-lāng liáu-āu, chiong hit-niá tn̂g-phàu kā thǹg--khí-lâi, koh chiong I ka-kī ê saⁿ kā chhēng tò-tńg--khì, jiân-āu kau I khì tèng si̍p-jī-kè.

Iâ-so͘ Siū Tèng Si̍p-jī-kè
( Khó 15.21-32 ; Lō͘ 23.26-43 ; Iok 19.17-27 )

³² In chhut--khì ê sî tú-tio̍h chi̍t ê Kó͘-lī-nāi-lâng, miâ kiò-chòe Se-bûn. In kiông-pek i giâ Iâ-so͘ ê si̍p-jī-kè.

³³ In kàu chi̍t ê só͘-chāi kiò-chòe Kok-kok-tha, chiū-sī “Thâu-khak-óaⁿ-niá”,

³⁴ chiū ēng chham khó͘-táⁿ ê chiú hō͘ Iâ-so͘ lim; I tam chi̍t-ē, m̄ lim.

³⁵ Peng-sū tèng Iâ-so͘ tī si̍p-jī-kè liáu-āu thiu-chhiam pun I ê saⁿ,

³⁶ jiân-āu chē tī hia kò͘-siú.

³⁷ In tī I ê thâu-khak téng tèng chi̍t ê chōe-chn̄g, siá kóng, “Chit-ê sī Iû-thài-lâng ê Ông Iâ-so͘.”

³⁸ Ū nn̄g ê kiông-tō kap Iâ-so͘ chòe-hé tèng si̍p-jī-kè, chi̍t ê tī chiàⁿ-pêng, chi̍t ê tī tò-pêng.

³⁹ Tùi hia keng-kè ê lâng kā I bú-jio̍k, iô-thâu,

⁴⁰ kóng, “Lí chit-ê lâng, kóng beh thiah-húi Sèng-tiān saⁿ ji̍t lāi koh khí--khí-lâi, tio̍h kiù lí ka-kī. Lí nā-sī Siōng-tè ê Kiáⁿ, tio̍h tùi si̍p-jī-kè lo̍h--lâi!”

⁴¹ Chè-si-tiúⁿ, keng-ha̍k-kàu-su, kap tiúⁿ-ló mā lóng án-ni kā I thí-chhiò, kóng,

⁴² “I kiù pa̍t-lâng, bô hoat-tō͘ kiù ka-kī. I sī Í-sek-lia̍t ê Ông, hiān-chāi tio̍h tùi si̍p-jī-kè lo̍h--lâi, lán chiū sìn I.

⁴³ I sìn-khò Siōng-tè; Siōng-tè nā beh kiù I, hiān-chāi tio̍h kiù I, in-ūi I kóng, ‘Góa sī Siōng-tè ê Kiáⁿ.’”

⁴⁴ Kap Iâ-so͘ chòe-hé tèng si̍p-jī-kè hit nn̄g ê kiông-tō mā kâng-khoán kā I bú-jio̍k.

Iâ-so͘ ê Sí
( Khó 15.33-41 ; Lō͘ 23.44-49 ; Iok 19.28-30 )

⁴⁵ Tùi tiong-tàu khí sòa kàu ē-po͘ saⁿ tiám, choân-tōe lóng o͘-àm.

⁴⁶ Ē-po͘ saⁿ tiám chó-iū, Iâ-so͘ tōa-siaⁿ hoah, “Í-lī, Í-lī, la-má sat-pak-tāi-nî?” Ì-sù sī “Góa ê Siōng-tè, góa ê Siōng-tè, lí sī-án-chóaⁿ pàng-sak góa?”

⁴⁷ Ū chi̍t-kóa khiā tī hia ê lâng thiaⁿ--tio̍h, kóng, “Chit-ê lâng teh kiò Í-lī-a.”

⁴⁸ Kî-tiong ū chi̍t ê lâng sûi-sî cháu-khì the̍h hái-mî, chìm sng-chiú, pa̍k tī lô͘-tek-á bé, tu-khì hō͘ Iâ-so͘ suh.

⁴⁹ Kî-tha ê lâng kóng, “Tán--chi̍t-ē! Khòaⁿ Í-lī-a ōe lâi kā I kiù bōe.”

⁵⁰ Iâ-so͘ koh tōa-siaⁿ hoah chi̍t siaⁿ, khùi chiū tn̄g.

⁵¹ Hut-jiân, Sèng-tiān lāi ê tiùⁿ-lî tùi téng kàu ē li̍h-chòe nn̄g pêng; tōe tōa tín-tāng, chio̍h-pôaⁿ piak-li̍h;

⁵² bōng mā khui; ū chin chōe í-keng sí--khì ê Siōng-tè chú-bîn ê si-thé lóng koh-oa̍h--khí-lâi.

⁵³ Iâ-so͘ koh-oa̍h í-āu hiah-ê lâng tùi bōng chhut--lâi, ji̍p-khì Sèng-siâⁿ, chhut-hiān hō͘ chin chōe lâng khòaⁿ--kìⁿ.

⁵⁴ Hit-ê kun-koaⁿ kap chòe-hé kò͘-siú Iâ-so͘ ê peng-sū khòaⁿ-tio̍h tōe-tāng kap só͘ hoat-seng ê tāi-chì, hui-siông kiaⁿ-hiâⁿ, kóng, “Chit-ê khak-si̍t sī Siōng-tè ê Kiáⁿ!”

⁵⁵ Tī hia ū chin chōe hū-jîn-lâng tùi hn̄g-hn̄g teh khòaⁿ; in sī tùi Ka-lī-lī tè Iâ-so͘ lâi sū-hāu I--ê,

⁵⁶ kî-tiong ū Boa̍t-tāi-lia̍p ê Má-lī-a, Ngá-kok kap Iok-sek ê lāu-bú Má-lī-a, koh ū Se-pì-thài nn̄g ê kiáⁿ ê lāu-bú.

Iâ-so͘ ê An-chòng
( Khó 15.42-47 ; Lō͘ 23.50-56 ; Iok 19.38-42 )

⁵⁷ Hông-hun ê sî, ū chi̍t ê A-lī-má-thài ê hó-gia̍h-lâng lâi, i miâ kiò-chòe Iok-sek, mā-sī Iâ-so͘ ê bûn-tô͘.

⁵⁸ Chit-ê lâng khì kìⁿ Pí-lia̍p-to, chhéng-kiû chiong Iâ-so͘ ê ûi-thé hō͘ i. Pí-lia̍p-to chiū hoan-hù lâng chiong ûi-thé hō͘ i.

⁵⁹ Iok-sek kā Iâ-so͘ ê ûi-thé siu--lo̍h-lâi í-āu, ēng chheng-khì ê iù-môa-pò͘ pau--khí-lâi,

⁶⁰ jiân-āu kā I an-chòng tī ka-kī ê sin bōng, chiū-sī Iok-sek phah tī chio̍h-piah--ni̍h ê bōng. I koh kō chi̍t tè tōa tè chio̍h lâi that tī bōng-kháu chiah lī-khui.

⁶¹ Hit-sî, ū Boa̍t-tāi-lia̍p ê Má-lī-a kap pa̍t-ê Má-lī-a tī hia, chē tī bōng ê tùi-bīn.

Phài Ōe-peng Kò͘ Bōng

⁶² Keh-ji̍t, chiū-sī Pī-pān-ji̍t āu hit-ji̍t, hiah-ê chè-si-tiúⁿ kap Hoat-lī-sài-phài ê lâng chòe-hé khì kìⁿ Pí-lia̍p-to,

⁶³ kóng, “Tāi-jîn, goán ōe-kì-tit hit-ê pián-sian-á iáu oa̍h--teh ê sî bat kóng, ‘Saⁿ ji̍t āu, góa ōe koh-oa̍h.’

⁶⁴ Só͘-í, chhiáⁿ lí hā-lēng giâm-siú hûn-bōng kàu tē-saⁿ ji̍t, chiah bōe hō͘ I ê bûn-tô͘ lâi thau-the̍h I ê sin-si, soah kā bîn-chiòng kóng ‘I í-keng tùi sí-lâng tiong koh-oa̍h’. Nā án-ni, chit-ê chòe-āu ê khi-phiàn ōe pí thâu chi̍t piàn ê koh-khah giâm-tiōng.”

⁶⁵ Pí-lia̍p-to kā in kóng, “Lín chhōa ōe-peng khì, chīn só͘-ōe giâm-bi̍t kò͘-siú hit-ê bōng.”

⁶⁶ In chiū khì, ēng hong-tiâu hong hit-tè chio̍h-thâu, lâu ōe-peng tī hia kò͘-siú.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan