Bìoball air-loidhne

« Roimhe

Air adhart »

馬太福音 26 - 現代台語譯本羅馬字版

Hāi-sí Iâ-so͘ ê Im-bô͘
( Khó 14.1-2 ; Lō͘ 22.1-2 ; Iok 11.45-53 )

¹ Iâ-so͘ kóng chiah-ê ōe liáu-āu kā I ê bûn-tô͘ kóng,

² “Lín chai koh nn̄g ji̍t chiū-sī Pôaⁿ-kè-choeh, Jîn-chú ōe siū chhut-bōe hō͘ lâng tèng si̍p-jī-kè.”

³ Hit-sî, chè-si-tiúⁿ kap bîn-kan ê tiúⁿ-ló chū-chi̍p tī tōa-chè-si Kai-a-hoat ê kong-koán.

⁴ In chham-siông beh ēng kè-bô͘ lia̍h Iâ-so͘, kā I hāi-sí.

⁵ M̄-kú in kóng, “M̄-thang tī choeh-kî tiong, kiaⁿ-liáu bîn-chiòng khí pō-tōng.”

Iâ-so͘ tī Pek-tāi-nî Siū Boah-iû
( Khó 14.3-9 ; Iok 12.1-8 )

^6-7 Iâ-so͘ tī Pek-tāi-nî bâ-hong pīⁿ-lâng Se-bûn ê chhù teh chē-toh chia̍h-pn̄g ê sî, ū chi̍t ê hū-jîn-lâng the̍h chi̍t koàn ge̍k-pân, lāi-bīn tóe hui-siông ko-kùi ê phang-iû, kiâⁿ óa--lâi, chiong phang-iû tò tī Iâ-so͘ ê thâu-khak téng.

⁸ Bûn-tô͘ khòaⁿ--tio̍h chin siū-khì, kóng, “Ná tio̍h chiah lōng-hùi?

⁹ Chit-koàn phang-iû ōe-tàng bōe chin chōe chîⁿ lâi kiù-chè sàn-chhiah-lâng.”

¹⁰ Iâ-so͘ chai-iáⁿ, chiū tùi in kóng, “Lín ná beh tiau-lân chit-ê hū-jîn-lâng? I ū ūi-tio̍h góa chòe chi̍t hāng hó-sū.

¹¹ Put-sî ū sàn-chhiah-lâng kap lín chòe-hé, put-kò góa bōe put-sî kap lín chòe-hé.

¹² I tò phang-iû tī góa ê seng-khu sī kā góa chún-pī bâi-chòng.

¹³ Góa si̍t-chāi kā lín kóng, chit-ê hok-im bô-lūn thoân kàu choân sè-kài sím-mi̍h só͘-chāi, lâng lóng ōe kóng-khí chit-ê hū-jîn-lâng só͘ chòe ê tāi-chì lâi kì-liām i.”

Iû-tāi Chhut-bōe Iâ-so͘
( Khó 14.10-11 ; Lō͘ 22.3-6 )

¹⁴ Cha̍p-jī sù-tô͘ ê chi̍t ê, kiò-chòe Í-su-ka-lio̍k ê Iû-tāi, khì kìⁿ hiah-ê chè-si-tiúⁿ,

¹⁵ kóng, “Góa nā chiong Iâ-so͘ kau hō͘ lín, lín beh hō͘ góa sím-mi̍h?” In chiū the̍h saⁿ-cha̍p ê gûn-á hō͘ i.

¹⁶ Tùi hit-sî khí, Iû-tāi it-ti̍t teh chhē ki-hōe beh chhut-bōe Iâ-so͘.

Chún-pī Pôaⁿ-kè-choeh ê Boán-chhan
( Khó 14.12-21 ; Lō͘ 22.7-13 , 21-23 ; Iok 13.21-30 )

¹⁷ Tû-kàⁿ-choeh ê thâu chi̍t ji̍t, bûn-tô͘ lâi mn̄g Iâ-so͘, “Lí ài goán tī tó-ūi kā lí chún-pī chia̍h Pôaⁿ-kè-choeh ê boán-chhan?”

¹⁸ Iâ-so͘ kóng, “Lín ji̍p-siâⁿ khì chhē hit-ê bó͘-lâng, kā i kóng, ‘Lāu-su kóng: Góa ê sî í-keng kàu, góa beh kap góa ê bûn-tô͘ tī lí ê chhù siú Pôaⁿ-kè-choeh.’”

¹⁹ Bûn-tô͘ chiū chiàu Iâ-so͘ ê hoan-hù khì chún-pī Pôaⁿ-kè-choeh ê boán-chhan.

²⁰ Hông-hun ê sî, Iâ-so͘ kap cha̍p-jī sù-tô͘ chē-toh.

²¹ In teh chia̍h-pn̄g ê sî, Iâ-so͘ kóng, “Góa si̍t-chāi kā lín kóng, lín tiong-kan ū chi̍t ê lâng beh kā góa chhut-bōe.”

²² In chin siong-sim, chi̍t-ê chi̍t-ê kā I mn̄g, “Chú ah, m̄-sī góa ho͘hⁿ?”

²³ Iâ-so͘ ìn kóng, “Chhun-chhiú kap góa siâng-sî the̍h chia̍h-mi̍h tī pôaⁿ--ni̍h teh ùn hit-ê lâng beh kā góa chhut-bōe.

²⁴ Chiàu Sèng-keng só͘ kì-chài, Jîn-chú ōe siū hāi, put-kò chhut-bōe Jîn-chú hit-ê lâng chhám ah! Hit-ê lâng lêng-khó bô chhut-sì khah hó.”

²⁵ Chhut-bōe Iâ-so͘ ê Iû-tāi mā kā I mn̄g, “Lia̍p-pí, m̄-sī góa ho͘hⁿ?” Iâ-so͘ ìn kóng, “Che sī lí kóng--ê.”

Chú ê Boán-chhan
( Khó 14.22-26 ; Lō͘ 22.14-20 ; 1 Lîm 11.23-25 )

²⁶ In teh chia̍h ê sî, Iâ-so͘ the̍h piáⁿ, kám-siā liáu-āu peh-khui, pun hō͘ bûn-tô͘, kóng, “The̍h-khì chia̍h; che sī góa ê seng-khu.”

²⁷ Jiân-āu I phâng-poe, kám-siā liáu-āu the̍h hō͘ bûn-tô͘, kóng, “Lín lóng tio̍h lim chit-poe,

²⁸ in-ūi che sī góa ê huih, sī li̍p-iok ê huih, ūi-tio̍h chin chōe lâng lâu-chhut--ê, beh hō͘ in ê chōe tit-tio̍h sià-bián.

²⁹ Góa kā lín kóng, tī góa ê Pē ê Kok kap lín lim sin ê phû-tô-chiú hit-ji̍t í-chêng, góa choa̍t-tùi bōe koh lim chit-ê chiú.”

³⁰ In gîm-si liáu-āu chiū chhut--khì, khì Kaⁿ-ná-soaⁿ.

Iâ-so͘ Ū-giân Pí-tek M̄ Jīn I
( Khó 14.27-31 ; Lō͘ 22.31-34 ; Iok 13.36-38 )

³¹ Iâ-so͘ kā in kóng, “Kim-mî lín lóng ōe pàng-sak góa, in-ūi Sèng-keng ū kì-chài: Góa beh phah bo̍k-chiá, kui-kûn iûⁿ chiū sì-sòaⁿ.

³² M̄-kú góa koh-oa̍h í-āu ōe pí lín seng khì Ka-lī-lī.”

³³ Pí-tek tùi Iâ-so͘ kóng, “Sui-jiân in tāi-ke lóng pàng-sak lí, góa choa̍t-tùi bōe pàng-sak lí!”

³⁴ Iâ-so͘ kā i kóng, “Góa si̍t-chāi kā lí kóng, kim-mî koe thî í-chêng, lí ōe saⁿ piàn m̄ jīn góa.”

³⁵ Pí-tek ìn kóng, “Nā it-tēng tio̍h kap lí chòe-hé sí, góa mā choa̍t-tùi bōe m̄ jīn lí!” Kî-tha ê bûn-tô͘ mā lóng án-ni kóng.

Tī Khek-se-má-nî Kî-tó
( Khó 14.32-42 ; Lō͘ 22.39-46 )

³⁶ Āu-lâi, Iâ-so͘ kap bûn-tô͘ lâi kàu chi̍t ê só͘-chāi kiò-chòe Khek-se-má-nî. I kā bûn-tô͘ kóng, “Góa khì hia kî-tó, lín tiàm chia chē.”

³⁷ I chiū chhōa Pí-tek kap Se-pì-thài ê nn̄g ê kiáⁿ chòe-hé khì. I pi-siong, hui-siông thòng-khó͘,

³⁸ tùi in kóng, “Góa sim iu-siong kàu beh sí. Lín tiàm chia, kap góa chòe-hé kéng-séng.”

³⁹ I kiâⁿ khah chìn-chêng, bīn phak--lo̍h-khì, kî-tó kóng, “Góa ê Pē ah, nā ōe-tàng, kiû lí hō͘ góa bián lim chit-ê poe, m̄-kú m̄-sī chiàu góa ê ì-sù, tio̍h chiàu lí ê chí-ì si̍t-hiān.”

⁴⁰ I tńg-lâi bûn-tô͘ hia, khòaⁿ-tio̍h in teh khùn, chiū tùi Pí-tek kóng, “Lín chin-chiàⁿ bōe-tàng kap góa kéng-séng chi̍t tiám-cheng kú sī--bô?

⁴¹ Tio̍h kéng-séng, tio̍h kî-tó, chiah bōe hām-lo̍h iú-he̍k. Lín sui-jiân sim chin ì-ài, m̄-kú jio̍k-thé loán-jio̍k.”

⁴² Iâ-so͘ tē-jī piàn koh khì kî-tó, kóng, “Góa ê Pē ah, chit-ê poe nā bōe-tàng bián, góa it-tēng tio̍h lim, goān lí ê chí-ì si̍t-hiān.”

⁴³ I koh tńg--lâi, khòaⁿ-tio̍h in in-ūi ba̍k-chiu siap iáu-teh khùn.

⁴⁴ Iâ-so͘ koh lī-khui in, tē-saⁿ piàn khì kî-tó, mā-sī kóng siâng-khoán ê ōe.

⁴⁵ Jiân-āu I koh tńg-lâi bûn-tô͘ hia, tùi in kóng, “Lín iáu-teh khùn, iáu-teh hioh-khùn o͘h? Lín khòaⁿ, sî-kan chiap-kūn lah; Jîn-chú siū chhut-bōe kau tī chōe-jîn ê chhiú-thâu lah.

⁴⁶ Khí--lâi, lán lâi-khì. Lín khòaⁿ, chhut-bōe góa ê lâng lâi lah.”

Iâ-so͘ Siū Lia̍h
( Khó 14.43-50 ; Lō͘ 22.47-53 ; Iok 18.3-12 )

⁴⁷ Iâ-so͘ iáu-teh kóng ê sî, cha̍p-jī sù-tô͘ ê chi̍t ê — Iû-tāi lâi, chè-si-tiúⁿ kap bîn-kan ê tiúⁿ-ló phài--lâi ê chi̍t tōa-tīn lâng gia̍h to gia̍h kùn kap i tàu-tīn lâi.

⁴⁸ Chhut-bōe Iâ-so͘ hit-ê lâng ū hō͘ in chi̍t ê àm-hō, kóng, “Góa kā I chim hit-ê chiū-sī; lín kā lia̍h.”

⁴⁹ Iû-tāi sûi-sî kiâⁿ-óa Iâ-so͘, tùi I kóng, “Lia̍p-pí, pêng-an!” chiū kā I chim.

⁵⁰ Iâ-so͘ kā i kóng, “Pêng-iú, lí ná tī chia?” Hiah-ê lâng chiū óa--khì, hē-chhiú lia̍h Iâ-so͘.

⁵¹ Hut-jiân, ū chi̍t ê kap Iâ-so͘ tàu-tīn ê lâng chhun-chhiú pu̍ih to tùi tōa-chè-si ê po̍k-jîn phut--lo̍h-khì, kā i chi̍t pêng ê hī-á siah--khí-lâi.

⁵² Iâ-so͘ kā i kóng, “To siu--khí-lâi, in-ūi gia̍h-to--ê lóng ōe sí tī to-ē.

⁵³ Lí siūⁿ-kóng góa bōe-tàng khún-kiû góa ê Pē sûi-sî chhe cha̍p-jī iâⁿ khah ke ê thiⁿ-sài lâi sī--bô?

⁵⁴ Góa nā án-ni chòe, Sèng-keng só͘ kì-chài it-tēng tio̍h hoat-seng ê tāi-chì ná ōe èng-giām?”

⁵⁵ Hit-sî Iâ-so͘ tùi kûn-chiòng kóng, “Lín gia̍h to gia̍h kùn chhut-lâi lia̍h góa, sī beh lia̍h kiông-tō sī--bô? Góa ta̍k-ji̍t tī Sèng-tiān chē-teh kà-sī lâng, lín bô kā góa lia̍h.

⁵⁶ Put-kò che it-chhè ê tāi-chì lóng í-keng si̍t-hiān, sī beh èng-giām sian-ti tī Sèng-keng só͘ kóng ê ōe.” Jiân-āu, só͘-ū ê bûn-tô͘ lóng pàng-sak Iâ-so͘ tô-cháu.

Iâ-so͘ tī Gī-hōe Siū Sím
( Khó 14.53-65 ; Lō͘ 22.54-55 , 63-71 ; Iok 18.13-14 , 19-24 )

⁵⁷ Hiah-ê lia̍h Iâ-so͘ ê lâng kā I chhōa-khì tōa-chè-si Kai-a-hoat hia; keng-ha̍k-kàu-su kap tiúⁿ-ló lóng í-keng chū-chi̍p tī hia.

⁵⁸ Pí-tek lī hn̄g-hn̄g teh tè Iâ-so͘, tè kàu tōa-chè-si kong-koán ê tiâⁿ. I ji̍p-khì lāi-bīn kap kéng-ōe chòe-hé chē, beh khòaⁿ tāi-chì ê kiat-kio̍k.

⁵⁹ Chè-si-tiúⁿ kap choân gī-hōe it-ti̍t teh chhē ké chèng-kù beh kò Iâ-so͘, thang kā I chhú-sí.

⁶⁰ Sui-jiân ū chin chōe lâng chhut-lâi kā I bû-kò, m̄-kú in lóng chhē bô chèng-kù. Āu-lâi ū nn̄g ê lâng chhut--lâi,

⁶¹ kóng, “Chit-ê lâng bat kóng ‘Góa ū hoat-tō͘ húi-hoāi Siōng-tè ê Sèng-tiān, saⁿ ji̍t lāi koh kā i khí--khí-lâi’.”

⁶² Tōa-chè-si khiā khí-lâi tùi Iâ-so͘ kóng, “Chiah-ê lâng teh kā lí kò sím-mi̍h, lí ná lóng bô tap-piān?”

⁶³ M̄-kú Iâ-so͘ lóng tiām-tiām. Tōa-chè-si koh chi̍t piàn tùi I kóng, “Góa kí éng-oán-oa̍h ê Siōng-tè bēng-lēng lí kā goán kóng, lí sī Ki-tok, Siōng-tè ê Kiáⁿ á m̄-sī.”

⁶⁴ Iâ-so͘ ìn kóng, “Lí í-keng kóng lah. M̄-kú góa kā lín kóng, tùi taⁿ í-āu lín ōe khòaⁿ-kìⁿ Jîn-chú chē tī Choân-lêng-chiá ê chiàⁿ-pêng, chē thiⁿ-téng ê hûn lâi-lîm.”

⁶⁵ Tōa-chè-si chiū thiah-li̍h ka-kī ê gōa-saⁿ, kóng, “I í-keng siat-to̍k Siōng-tè. Lán iáu su-iàu sím-mi̍h chèng-jîn? Taⁿ lín í-keng ū thiaⁿ-tio̍h I siat-to̍k Siōng-tè.

⁶⁶ Lín siūⁿ án-chóaⁿ?” In ìn kóng, “I kai sí!”

⁶⁷ Āu-lâi in phùi-nōa tī Iâ-so͘ ê bīn, kā I cheng, koh ū lâng kā I siàn,

⁶⁸ kóng, “Ki-tok ah, lí sī sian-ti, kā goán kóng khòaⁿ-bāi, siáⁿ-lâng kā lí phah?”

Pí-tek M̄ Jīn Iâ-so͘
( Khó 14.66-72 ; Lō͘ 22.56-62 ; Iok 18.15-18 , 25-27 )

⁶⁹ Pí-tek tī kong-koán gōa-bīn ê tiâⁿ teh chē, ū chi̍t ê lú-pī kiâⁿ óa--khì, kóng, “Lí mā lóng ū teh kap hit-ê Ka-lī-lī-lâng Iâ-so͘ chòe-hé.”

⁷⁰ Pí-tek tī chèng-lâng ê bīn-chêng m̄ jīn, kóng, “Góa m̄ chai lí teh kóng sím-mi̍h.”

⁷¹ Pí-tek kiâⁿ chhut-khì kàu tōa mn̂g-kháu ê sî, ū lēng-gōa chi̍t ê lú-pī khòaⁿ-tio̍h i, chiū kā tī hia ê lâng kóng, “Chit-ê lâng ū teh kap Ná-sat-le̍k-lâng Iâ-so͘ chòe-hé.”

⁷² Pí-tek koh chi̍t piàn chiù-chōa m̄ jīn, kóng, “Góa m̄ bat hit-ê lâng.”

⁷³ Kè bô jōa kú, khiā tī piⁿ--á ê lâng óa--lâi, tùi Pí-tek kóng, “Lí khak-si̍t mā-sī in hit-tīn ê lâng, thiaⁿ lí ê khiuⁿ chiū chai.”

⁷⁴ I chiū chiù-chōa kóng, “Góa m̄ bat hit-ê lâng. Góa nā kóng pe̍h-chha̍t, goān Thiⁿ chek-hoa̍t góa!” Koe sûi-sî thî.

⁷⁵ Pí-tek siūⁿ-tio̍h Iâ-so͘ só͘ kóng ê ōe “Koe thî í-chêng, lí ōe saⁿ piàn m̄ jīn góa”, chiū chhut-khì gōa-bīn tōa-siaⁿ thî-khàu.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan