Bìoball air-loidhne

« Roimhe

Air adhart »

馬太福音 25 - 現代台語譯本羅馬字版

Cha̍p Ê Chāi-sek-lú ê Phì-jū

¹ “Thian-kok thang phì-jū chòe cha̍p ê chāi-sek-lú gia̍h teng chhut-khì gêng-chiap sin-lông.

² Kî-tiong ū gō͘ ê gōng--ê, gō͘ ê khiáu--ê.

³ Hiah-ê gōng--ê gia̍h teng, bô lēng-gōa tòa iû,

⁴ m̄-kú khiáu--ê gia̍h teng, ū lēng-gōa tòa kúi-nā koàn iû.

⁵ Sin-lông khah òaⁿ kàu, in soah lóng tuh-ku khùn--khì.

⁶ “Pòaⁿ-mî, ū lâng tōa-siaⁿ hoah, ‘Sin-lông lâi lah, chhut-lâi gêng-chiap!’

⁷ Hit-sî, hiah-ê chāi-sek-lú lóng chhíⁿ--khí-lâi, siu-chéng in ê teng.

⁸ Gōng--ê kā khiáu--ê kóng, ‘Goán ê teng teh-beh hoa--khì lah, lín ê iû pun chi̍t-kóa hō͘ goán.’

⁹ Khiáu--ê ìn kóng, ‘Kiaⁿ-liáu iû bô-kàu pun lín ēng, siōng-hó lín ka-kī khì kā bōe-iû--ê bóe.’

¹⁰ In khì bóe ê sî sin-lông kàu-ūi, hiah-ê chún-pī hó-sè--ê kap i ji̍p-khì hù hun-iàn, mn̂g chiū koaiⁿ--khí-lâi.

¹¹ “Āu-lâi hiah-ê gōng ê chāi-sek-lú mā lâi, kóng, ‘Sian-siⁿ, sian-siⁿ, chhiáⁿ kā goán khui-mn̂g!’

¹² Sin-lông ìn kóng, ‘Góa si̍t-chāi kā lín kóng, góa m̄ bat lín!’

¹³ “Só͘-í, tio̍h kéng-séng, in-ūi hit-ê ji̍t hit-ê sî lín m̄ chai.”

Saⁿ Ê Po̍k-jîn ê Phì-jū
( Lō͘ 19.11-27 )

¹⁴ “Thian-kok chhin-chhiūⁿ ū chi̍t ê lâng beh chhut-gōa lú-hêng, kiò ka-kī ê po̍k-jîn lâi, chiong châi-sán kau-tài in.

¹⁵ I chiàu ta̍k-lâng ê châi-tiāu kau kim-pè hō͘ in, chi̍t ê gō͘-chheng, chi̍t ê nn̄g-chheng, chi̍t ê chi̍t-chheng, chiū chhut-gōa--khì.

¹⁶ Hit-ê niá gō͘-chheng--ê sûi-sî the̍h-khì chòe seng-lí, koh thàn gō͘-chheng.

¹⁷ Siâng-khoán, hit-ê niá nn̄g-chheng--ê mā koh thàn nn̄g-chheng.

¹⁸ M̄-kú hit-ê niá chi̍t-chheng--ê chhut--khì, tī thô͘-kha ó͘ chi̍t khang, kā chú-lâng ê kim-pè chhàng--khí-lâi.

¹⁹ “Kè chin kú, hiah-ê po̍k-jîn ê chú-lâng tńg--lâi, kap in sǹg-siàu.

²⁰ Hit-ê niá gō͘-chheng--ê kiâⁿ chìn-chêng, lēng-gōa the̍h gō͘-chheng lâi, kóng, ‘Thâu-ke, lí kau-tài góa gō͘-chheng ê kim-pè, chhiáⁿ khòaⁿ, góa ū koh thàn gō͘-chheng.’

²¹ Chú-lâng kā i kóng, ‘Chin hó, hó koh tiong-si̍t ê po̍k-jîn, lí kì-jiân tī chió--ê ū tiong-si̍t, góa beh phài lí koán khah chōe--ê; ji̍p-lâi kap chú-lâng chòe-hé hoaⁿ-hí.’

²² “Niá nn̄g-chheng--ê mā lâi, kóng, ‘Thâu-ke, lí kau-tài góa nn̄g-chheng ê kim-pè, chhiáⁿ lí khòaⁿ, góa ū koh thàn nn̄g-chheng.’

²³ Chú-lâng kā i kóng, ‘Chin hó, hó koh tiong-si̍t ê po̍k-jîn, lí kì-jiân tī chió--ê ū tiong-si̍t, góa beh phài lí koán khah chōe--ê; ji̍p-lâi kap chú-lâng chòe-hé hoaⁿ-hí.’

²⁴ “Chit-sî, hit-ê niá chi̍t-chheng--ê mā kiâⁿ chìn-chêng, kóng, ‘Thâu-ke, góa chai lí sī giâm-hat ê lâng, bô iā-chéng mā beh siu-koah, bô chèng-choh mā beh siu-sêng.

²⁵ Góa chin kiaⁿ, chiah chiong lí ê kim-pè the̍h-khì chhàng tī thô͘-kha-tóe. Taⁿ lí ê kim-pè hêng lí.’

²⁶ “Chú-lâng ìn kóng, ‘Pháiⁿ koh pîn-tōaⁿ ê po̍k-jîn, lí kì-jiân chai góa bô iā-chéng mā beh siu-koah, bô chèng-choh mā beh siu-sêng,

²⁷ lí eng-kai chiong góa ê kim-pè kià gûn-hâng, góa tńg--lâi ê sî thang liân-pún-tài-lī siu-hôe.’

²⁸ Kā i ê kim-pè the̍h--lâi, kau hō͘ ū chi̍t-bān kim-pè hit-ê lâng.

²⁹ In-ūi ū--ê, beh hō͘ i koh-khah chōe, sīm-chì ū chhun; bô--ê, liân i só͘-ū--ê mā beh kā i chhiúⁿ--khí-lâi.

³⁰ Chit-ê bô lō͘-ēng ê po̍k-jîn, kā i kóaⁿ chhut-khì gōa-bīn o͘-àm ê só͘-chāi; tī hia i ōe thî-khàu, kā-gê-chhiat-chhí.”

Chòe-āu ê Sím-phòaⁿ

³¹ “Jîn-chú choh-ông chhōa chèng thiⁿ-sài lâi-lîm ê sî, I ōe chē tī êng-iāu ê pó-chō.

³² Tōe-chiūⁿ bān-bîn lóng ōe chū-chi̍p tī I ê bīn-chêng. I ōe chiong in hun-chòe nn̄g pêng, chhin-chhiūⁿ bo̍k-chiá chiong mî-iûⁿ kap soaⁿ-iûⁿ hun-khui;

³³ kā mî-iûⁿ an-pâi tī chiàⁿ-pêng, soaⁿ-iûⁿ tī tò-pêng.

³⁴ Āu-lâi, Ông ōe kā chiàⁿ-pêng ê lâng kóng, ‘Lâi, lín chiah-ê siū góa ê Pē chiok-hok--ê, lâi sêng-siū tùi chhòng-chō ú-tiū í-lâi chiū ūi-tio̍h lín chún-pī ê kok-tō͘.

³⁵ In-ūi góa iau, lín ū hō͘ góa chia̍h; góa chhùi-ta, lín ū hō͘ góa lim; góa choh chhut-gōa-lâng, lín ū kā góa siu-liû;

³⁶ góa chhiah-sin-lō͘-thé, lín ū hō͘ góa chhēng; góa phòa-pīⁿ, lín ū kā góa chiàu-kò͘; góa tī kaⁿ--ni̍h, lín ū lâi thàm góa.’

³⁷ “Hit-sî, gī-lâng ōe ìn I kóng, ‘Chú ah, sím-mi̍h sî goán khòaⁿ-tio̍h lí iau ū hō͘ lí chia̍h, chhùi-ta ū hō͘ lí lim?

³⁸ Sím-mi̍h sî goán khòaⁿ-tio̍h lí choh chhut-gōa-lâng ū kā lí siu-liû, chhiah-sin-lō͘-thé ū hō͘ lí chhēng?

³⁹ Sím-mi̍h sî goán khòaⁿ-tio̍h lí phòa-pīⁿ á-sī tī kaⁿ--ni̍h, goán ū khì thàm lí?’

⁴⁰ Ông ōe ìn kóng, ‘Góa si̍t-chāi kā lín kóng, lín ū án-ni tùi-thāi góa hiaⁿ-tī chí-bē siōng bî-sòe ê chi̍t ê, chiū-sī hó khoán-thāi góa.’

⁴¹ “Āu-lâi, Ông ōe kā tò-pêng ê lâng kóng, ‘Lín chiah-ê siū chiù-chó͘ ê lâng, lī-khui góa, ji̍p-khì ūi-tio̍h Mô͘-kúi kap i ê sù-chiá só͘ chún-pī éng-oán ê hé--ni̍h.

⁴² In-ūi góa iau, lín bô hō͘ góa chia̍h; góa chhùi-ta, lín bô hō͘ góa lim;

⁴³ góa choh chhut-gōa-lâng, lín bô kā góa siu-liû; góa chhiah-sin-lō͘-thé, lín bô hō͘ góa chhēng; góa phòa-pīⁿ á-sī tī kaⁿ--ni̍h, lín bô lâi thàm góa.’

⁴⁴ “Hit-sî, in mā ōe ìn kóng, ‘Chú ah, sím-mi̍h sî goán khòaⁿ-tio̍h lí iau, chhùi-ta, choh chhut-gōa-lâng, chhiah-sin-lō͘-thé, phòa-pīⁿ, á-sī tī kaⁿ--ni̍h, bô kā lí chiàu-kò͘?’

⁴⁵ Ông ōe kā in kóng, ‘Góa si̍t-chāi kā lín kóng, lín bô án-ni tùi-thāi siōng bî-sòe ê chi̍t ê, chiū-sī bô hó khoán-thāi góa.’

⁴⁶ Chiah-ê lâng ōe siū éng-oán ê hêng-hoa̍t, chóng-sī gī-lâng ōe tit-tio̍h éng-oán ê oa̍h-miā.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan