馬太福音 23 - 現代台語譯本羅馬字版

Khiàn-chek Keng-ha̍k-kàu-su kap Hoat-lī-sài-phài ê Lâng
( Khó 12.38-40 ; Lō͘ 11.43 , 46 ; 20.45-47 )

¹ Āu-lâi, Iâ-so͘ tùi kûn-chiòng kap I ê bûn-tô͘ kóng,

² “Keng-ha̍k-kàu-su kap Hoat-lī-sài-phài ê lâng chē Mô͘-se ê ūi kóe-seh Lu̍t-hoat.

³ Só͘-í, in só͘ kā lín kóng--ê, lín lóng tio̍h chòe, tio̍h chun-siú; put-kò m̄-thang o̍h in ê hêng-ûi, in-ūi in ōe-kóng bōe-chòe.

⁴ In chiong lâng taⁿ bô hoat ê tāng-tàⁿ khún hō͘ lâng taⁿ, ka-kī liân chi̍t ki chńg-thâu-á to m̄-khéng tín-tāng.

⁵ In só͘-ū ê hêng-ûi lóng sī beh chòe hō͘ lâng khòaⁿ, in-ūi in chiong ka-kī ê keng-bûn-tē chòe khah khoah, saⁿ-á-ku ê chhiu chòe khah tn̂g.

⁶ In ài tī iàn-hōe chē tōa-ūi, tī hōe-tn̂g chē koân-ūi,

⁷ tī chhī-tiûⁿ-kháu hō͘ lâng chhéng-an, hō͘ lâng chheng-ho͘ ‘lia̍p-pí’.

⁸ M̄-kú lín m̄-thang hō͘ lâng chheng-chòe ‘lia̍p-pí’, in-ūi lín chí-ū chi̍t ūi ‘Lāu-su’, lín lóng sī hiaⁿ-tī chí-bē.

⁹ Tī tōe-chiūⁿ, lín m̄-thang chheng-ho͘ lâng chòe ‘lāu-pē’, in-ūi lín chí-ū chi̍t ūi ‘Lāu-pē’, chiū-sī tī thiⁿ-téng Hit-ūi.

¹⁰ Lín mā m̄-thang hō͘ lâng chheng-chòe ‘kàu-su’, in-ūi lín chí-ū chi̍t ūi ‘Kàu-su’, chiū-sī Ki-tok.

¹¹ Lín tiong-kan siōng-tōa--ê tio̍h chòe lín ê chhe-ēng.

¹² Thê-ko ka-kī--ê, ōe siū kàng-kē; khut-kē ka-kī--ê, ōe siū ko-seng.”

Chek-pī Ké-hó ê Lâng
( Lō͘ 11.39-42 , 44 , 52 ; 20.47 )

¹³ “Ké-hó ê keng-ha̍k-kàu-su kap Hoat-lī-sài-lâng, lín chhám ah! Lín chiong Thian-kok ê mn̂g koaiⁿ--khí-lâi, m̄ hō͘ lâng ji̍p--khì; lín ka-kī m̄ ji̍p--khì, liân beh ji̍p--khì ê lâng mā m̄ hō͘ in ji̍p--khì.

¹⁵ “Ké-hó ê keng-ha̍k-kàu-su kap Hoat-lī-sài-lâng, lín chhám ah! Lín ūi-tio̍h beh hō͘ chi̍t ê lâng kái-chong ji̍p-kàu, thiⁿ-piⁿ-hái-kak kiâⁿ-thàu-thàu. Hit-ê lâng ji̍p-kàu liáu-āu, lín soah hō͘ i pìⁿ-chòe tōe-ge̍k ê kiáⁿ, pí lín têng-pē pháiⁿ.

¹⁶ “Chhiⁿ-mî chòe chhōa-lō͘--ê, lín chhám ah! Lín kóng, ‘Lâng kí Sèng-tiān chiù-chōa bô chún-sǹg, m̄-kú nā kí tiān-lāi ê kim-khì chiù-chōa chiū tio̍h siú.’

¹⁷ Lín chiah-ê tòng-gōng koh chhiⁿ-mî ê lâng ah, tó chi̍t hāng khah tiōng-iàu? Sī kim-khì á-sī hō͘ kim-khì chiâⁿ-chòe sîn-sèng ê Sèng-tiān?

¹⁸ Lín koh kóng, ‘Lâng kí chè-tôaⁿ chiù-chōa bô chún-sǹg, nā kí chè-tôaⁿ téng ê chè-mi̍h chiù-chōa chiū tio̍h siú.’

¹⁹ Lín chiah-ê chhiⁿ-mî ê lâng ah, sī chè-mi̍h á-sī hō͘ chè-mi̍h chiâⁿ-chòe sîn-sèng ê chè-tôaⁿ, tó chi̍t hāng khah tiōng-iàu?

²⁰ Só͘-í, lâng kí chè-tôaⁿ chiù-chōa, chiū-sī kí chè-tôaⁿ kap hit téng-bīn só͘-ū ê chè-mi̍h chiù-chōa.

²¹ Lâng kí Sèng-tiān chiù-chōa, chiū-sī kí Sèng-tiān kap tiàm tī hit lāi-bīn ê Siōng-tè chiù-chōa.

²² Lâng kí thiⁿ chiù-chōa, chiū-sī kí Siōng-tè ê pó-chō kap chē tī hit téng-bīn ê Siōng-tè chiù-chōa.

²³ “Ké-hó ê keng-ha̍k-kàu-su kap Hoat-lī-sài-lâng, lín chhám ah! In-ūi lín liân phang-liāu, po̍k-hô, poeh-kak, sió-hôe-hiong to hiàn cha̍p-hūn-chi̍t hō͘ Siōng-tè, Lu̍t-hoat só͘ tiōng-sī ê chèng-gī, jîn-chû, kap sìn-si̍t, lín tian-tò hut-lio̍k. Chiah-ê chiah sī lín eng-kai si̍t-hêng--ê; téng-bīn hiah-ê mā m̄-thang hut-lio̍k.

²⁴ Lín chiah-ê chhiⁿ-mî chòe chhōa-lō͘--ê, chi̍t chiah sòe chiah báng-thâng lín to kā lū--chhut-lâi, lo̍k-tô tian-tò kui-chiah kā thun--lo̍h-khì.

²⁵ “Ké-hó ê keng-ha̍k-kàu-su kap Hoat-lī-sài-lâng, lín chhám ah! In-ūi lín chiong poe kap pôaⁿ ê gōa-bīn sóe chheng-khì, lāi-bīn khiok tóe-móa tham-io̍k kap hòng-chhiòng.

²⁶ Lín chiah-ê chhiⁿ-mî ê Hoat-lī-sài-lâng ah, tio̍h seng kā poe ê lāi-bīn sóe chheng-khì, gōa-bīn chū-jiân chiū chheng-khì.

²⁷ “Ké-hó ê keng-ha̍k-kàu-su kap Hoat-lī-sài-lâng, lín chhám ah! In-ūi lín chhin-chhiūⁿ chhat pe̍h-pe̍h ê bōng, gōa-bīn hó-khòaⁿ, lāi-bīn khiok tóe-móa sí-lâng ê kut-thâu kap ta̍k-hāng ê ù-òe.

²⁸ Lín mā chhin-chhiūⁿ án-ni, gōa-bīn hō͘ lâng khòaⁿ-chòe gī-lâng, lāi-bīn khiok chhiong-móa ké-hó kap put-hoat.

²⁹ “Ké-hó ê keng-ha̍k-kàu-su kap Hoat-lī-sài-lâng, lín chhám ah! In-ūi lín chō sian-ti ê bōng, chéng-siu gī-lâng ê kì-liām-pi,

³⁰ koh kóng ‘Goán nā oa̍h tī goán chó͘-sian ê sî-tāi, it-tēng bōe kap in chòe-hé sat-hāi sian-ti’.

³¹ Án-ni, lín sī teh chèng-si̍t lín ka-kī sī sat-hāi sian-ti ê lâng ê kiáⁿ-sun.

³² Lín chó͘-sian chòe ê pháiⁿ-tāi, chòe lín khì oân-sêng hó lah!

³³ Lín chiah-ê to̍k-chôa ê kiáⁿ-sun, kan-kúi ê lâng ah, lín kiám ōe-tàng tô-siám tōe-ge̍k ê hêng-hoa̍t?

³⁴ Só͘-í, góa beh chhe sian-ti, tì-hūi ê lâng, kap keng-ha̍k-kàu-su khì lín hia; in ū-ê ōe hō͘ lín sat-hāi á-sī tèng si̍p-jī-kè, ū-ê ōe hō͘ lín tī lín ê hōe-tn̂g piⁿ-phah, hō͘ lín tùi chit-ê siâⁿ kóaⁿ kàu hit-ê siâⁿ.

³⁵ Án-ni, lín tī tōe-chiūⁿ thâi-sí gī-lâng ê huih-chè lóng kui tī lín sin-chiūⁿ; chiū-sī tùi gī-lâng A-pek lâu ê huih kàu Pí-lī-ka ê kiáⁿ Sat-ka-lī-a tī sèng-só͘ kap chè-tôaⁿ ê tiong-kan lâu ê huih, lóng kui tī lín sin-chiūⁿ.

³⁶ Góa si̍t-chāi kā lín kóng, chiah-ê chè lóng ōe kui tī chit sè-tāi ê lâng.”

Ūi Iâ-lō͘-sat-léng Ai-khàu
( Lō͘ 13.34-35 )

³⁷ “Iâ-lō͘-sat-léng ah, Iâ-lō͘-sat-léng ah, lí thâi-sí sian-ti, koh ēng chio̍h-thâu tìm-sí Siōng-tè chhe-lâi lí chia ê sù-chiá. Góa jōa-chōe piàn ài-beh chū-chi̍p lí ê kiáⁿ-jî, chhin-chhiūⁿ koe-bú chū-chi̍p koe-á-kiáⁿ kā in áⁿ tī si̍t-kó͘-ē, lín lóng bô ài!

³⁸ Lín khòaⁿ, lín ê chhù ōe hong-hòe, bô lâng tòa.

³⁹ Góa kā lín kóng, tùi taⁿ í-āu lín choa̍t-tùi khòaⁿ bōe tio̍h góa, ti̍t-kàu lín kóng, ‘Hōng Chú ê miâ lâi Hit-ūi eng-kai siū chheng-chàn!’”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan