Bìoball air-loidhne

馬太福音 21 - 現代台語譯本羅馬字版

Iâ-so͘ Kong-êng Chìn-ji̍p Iâ-lō͘-sat-léng
( Khó 11.1-11 ; Lō͘ 19.28-40 ; Iok 12.12-19 )

¹ Iâ-so͘ kap bûn-tô͘ teh-beh kàu Iâ-lō͘-sat-léng, lâi kàu Kaⁿ-ná-soaⁿ hù-kūn ê Pek-hoat-kî. Hit-sî I chhe nn̄g ê bûn-tô͘,

² kā in kóng, “Lín khì tùi-bīn ê chng-siā, kàu hia sûi-sî ōe khòaⁿ-tio̍h chi̍t chiah lû pa̍k--teh, koh ū chi̍t chiah lû-á-kiáⁿ kap i tī hia; lín kā in tháu-khui, khan-lâi góa chia.

³ Nā ū lâng tùi lín kóng sím-mi̍h, lín chiū kóng, ‘Chú beh ēng in.’ Hit-ê lâng ōe sûi-sî chún lín khan--lâi.”

⁴ Chit-ê tāi-chì hoat-seng sī beh èng-giām Siōng-tè thong-kè sian-ti só͘ kóng ê ōe:

⁵ Tio̍h kā Sek-an ê hū-jîn-lâng kóng: Khòaⁿ leh, lín ê Ông beh lâi lín chia; I khiam-sùn khiâ lû-á, khiâ lû-á-kiáⁿ.

⁶ Bûn-tô͘ chiū khì, chiàu Iâ-so͘ ê chí-sī khì chòe.

⁷ In khan lû-á kap lû-á-kiáⁿ lâi, chiong gōa-saⁿ phoa̍h tī in téng-bīn, Iâ-so͘ chiū peh-khí-khì khiâ.

⁸ Tōa-pō͘-hūn ê kûn-chiòng chiong in ka-kī ê gōa-saⁿ pho͘ tī lō͘--ni̍h, mā ū lâng chhò chhiū-oe pho͘ tī lō͘--ni̍h kā I hoan-gêng.

⁹ Chêng-kiâⁿ-āu-tè ê kûn-chiòng hoah kóng: Tāi-pi̍t ê Kiáⁿ, hô-sàn-ná! Hōng Chú ê miâ lâi Hit-ūi eng-kai siū chheng-chàn! Chì-koân ê Siōng-tè, hô-sàn-ná!

¹⁰ Iâ-so͘ chi̍t-ē chìn-ji̍p Iâ-lō͘-sat-léng, choân-siâⁿ lóng hán--khí-lâi, kóng, “Chit-ê sī siáⁿ-lâng?”

¹¹ Chèng-lâng kóng, “Chit-ê sī tùi Ka-lī-lī ê Ná-sat-le̍k lâi ê sian-ti Iâ-so͘.”

Iâ-so͘ Kiat-chēng Sèng-tiān
( Khó 11.15-19 ; Lō͘ 19.45-48 ; Iok 2.13-22 )

¹² Iâ-so͘ ji̍p-khì Sèng-tiān, chiong tiān-lāi só͘-ū teh bóe-bōe ê lâng lóng kóaⁿ--chhut-khì, koh chhia-tó ōaⁿ-chîⁿ ê lâng ê toh kap bōe hún-chiáu ê lâng ê í.

¹³ I tùi in kóng, “Sèng-keng ū kì-chài: Góa ê chhù beh kiò-chòe kî-tó ê tiān, lín soah kā i pìⁿ-chòe thó͘-húi-á khut.”

¹⁴ Ū bông-jîn kap kha-pái ê lâng lâi Sèng-tiān chhē Iâ-so͘, I chiū kā in i-hó.

¹⁵ Chè-si-tiúⁿ kap keng-ha̍k-kàu-su khòaⁿ-tio̍h Iâ-so͘ só͘ kiâⁿ ê kî-sū, koh thiaⁿ-kìⁿ sòe-hàn gín-á tī Sèng-tiān tōa-siaⁿ hoah “Tāi-pi̍t ê Kiáⁿ, hô-sàn-ná”, chiū chin siū-khì,

¹⁶ kā Iâ-so͘ kóng, “Lí ū thiaⁿ-tio̍h in teh hoah sím-mi̍h bô?” Iâ-so͘ ìn kóng, “Ū. Lín kiám bô tha̍k-tio̍h Sèng-keng ê ōe: Lí hō͘ gín-á kap eⁿ-á ê chhùi tōa-siaⁿ chhiùⁿ-chhut o-ló.”

¹⁷ Āu-lâi Iâ-so͘ lī-khui in, chhut-siâⁿ khì Pek-tāi-nî, tī hia kè-mî.

Iâ-so͘ Chiù-chó͘ Bû-hoa-kó-chhiū
( Khó 11.12-14 , 20-24 )

¹⁸ Keh-chá-khí, beh tò-khì Iâ-lō͘-sat-léng ê sî, Iâ-so͘ pak-tó͘ iau.

¹⁹ I khòaⁿ-tio̍h lō͘-piⁿ ū chi̍t châng bû-hoa-kó-chhiū, chiū kiâⁿ óa--khì, m̄-kú chhiū-téng lóng bô khòaⁿ-tio̍h pòaⁿ-hāng, chí-ū hio̍h nā-tiāⁿ. I tùi hit-châng chhiū kóng, “Lí éng-oán bōe koh kiat ké-chí.” Hit-châng bû-hoa-kó-chhiū sûi-sî ta--khì.

²⁰ Bûn-tô͘ khòaⁿ--tio̍h, chin tio̍h-kiaⁿ, kóng, “Chit-châng bû-hoa-kó-chhiū ná ōe hut-jiân-kan ta--khì?”

²¹ Iâ-so͘ ìn kóng, “Góa si̍t-chāi kā lín kóng, lín nā ū sìn-sim, bô giâu-gî, m̄-nā ōe-tàng chòe góa tùi chit-châng bû-hoa-kó-chhiū só͘ chòe ê tāi-chì, sīm-chì bēng-lēng chit-chō soaⁿ kóng ‘Khí--lâi, khì thiām-hái’ mā it-tēng ōe si̍t-hiān.

²² Kî-tó ê sî, lín só͘ kiû ê it-chhè, ū sìn chiū ōe tit--tio̍h.”

Chit-būn Iâ-so͘ ê Koân-pèng
( Khó 11.27-33 ; Lō͘ 20.1-8 )

²³ Iâ-so͘ ji̍p-khì Sèng-tiān teh kà-sī lâng ê sî, chè-si-tiúⁿ kap bîn-kan ê tiúⁿ-ló lâi I hia, tùi I kóng, “Lí khò sím-mi̍h koân-pèng chòe chiah-ê tāi-chì? Sím-mi̍h-lâng hō͘ lí chit-ê koân-pèng?”

²⁴ Iâ-so͘ ìn kóng, “Góa mā beh mn̄g lín chi̍t kù ōe, lín nā kā góa ìn, góa chiah kā lín kóng góa khò sím-mi̍h koân-pèng chòe chiah-ê tāi-chì.

²⁵ Iok-hān kā lâng sóe-lé ê koân-pèng tùi tó-ūi lâi, sī tùi Thiⁿ á-sī tùi lâng?” In hō͘-siōng gī-lūn kóng, “Lán nā kóng ‘Tùi Thiⁿ’, I ōe kā lán kóng ‘Án-ni, lín sī-án-chóaⁿ bô sìn Iok-hān?’

²⁶ Lán nā kóng ‘Tùi lâng’, khióng-kiaⁿ kûn-chiòng hoán-kám, in-ūi in lóng siūⁿ-kóng Iok-hān sī sian-ti.”

²⁷ In chiū ìn Iâ-so͘, “Goán m̄ chai.” Iâ-so͘ kā in kóng, “Án-ni, góa mā m̄ kā lín kóng góa khò sím-mi̍h koân-pèng chòe chiah-ê tāi-chì.”

Nn̄g Ê Kiáⁿ ê Phì-jū

²⁸ Iâ-so͘ kóng, “Lín siūⁿ án-chóaⁿ? Ū chi̍t ê lâng ū nn̄g ê kiáⁿ; i khì kā tōa-kiáⁿ kóng, ‘Kiáⁿ ah, lí kin-á-ji̍t khì phû-tô-hn̂g chòe kang.’

²⁹ Tōa-kiáⁿ ìn kóng ‘Góa m̄ khì’, āu-lâi kái-piàn sim-ì ū khì.

³⁰ Lāu-pē mā khì kā tē-jī kiáⁿ kóng siâng-khoán ê ōe. Tē-jī kiáⁿ ìn kóng ‘A-pa, góa lâi-khì’, āu-lâi bô khì.

³¹ Chit nn̄g ê kiáⁿ tó chi̍t ê ū chiàu lāu-pē ê ì-sù khì chòe?” In kóng, “Tōa-kiáⁿ.” Iâ-so͘ kā in kóng, “Góa si̍t-chāi kā lín kóng, ba̍uh-sè--ê kap chhiong-ki ōe pí lín seng chìn-ji̍p Siōng-tè-kok.

³² In-ūi Si-sóe-chiá Iok-hān lâi lín chia, chí-sī lín kiâⁿ chiàⁿ-lō͘, lín bô sìn i, m̄-kú ba̍uh-sè--ê kap chhiong-ki ū sìn. Sīm-chì lín khòaⁿ--tio̍h liáu-āu mā bô hóe-kái lâi sìn i.”

Pháiⁿ Tiān-lông ê Phì-jū
( Khó 12.1-12 ; Lō͘ 20.9-19 )

³³ Iâ-so͘ kā in kóng, “Lín koh thiaⁿ chi̍t ê phì-jū. Ū chi̍t ê hn̂g-chú khai-khún chi̍t khu phû-tô-hn̂g, sì-bīn ûi lî-pa, lāi-bīn ó͘ chi̍t ê chiú-khut, khí chi̍t ê siú-bōng-tâi, chiong chit-khu hn̂g cho͘ hō͘ tiān-lông, āu-lâi chhut-gōa khì chin hn̄g ê só͘-chāi.

³⁴ Siu-sêng ké-chí ê sî kàu, hn̂g-chú chhe po̍k-jîn khì tiān-lông hia, beh tùi in siu ké-chí.

³⁵ Tiān-lông kā chiah-ê po̍k-jîn lia̍h--khí-lâi, chi̍t ê kā i phah, chi̍t ê kā i thâi--sí, chi̍t ê ēng chio̍h-thâu kā i tìm--sí.

³⁶ Hn̂g-chú koh chhe lēng-gōa chi̍t-kóa po̍k-jîn khì, pí thâu chi̍t piàn khah chōe lâng. Tiān-lông mā chiàu án-ni tùi-thāi in.

³⁷ Chòe-āu, hn̂g-chú chhe ka-kī ê kiáⁿ khì in hia, siūⁿ-kóng ‘In ōe chun-tiōng góa ê kiáⁿ’.

³⁸ M̄-kú tiān-lông chi̍t-ē khòaⁿ-tio̍h i ê kiáⁿ chiū chham-siông kóng, ‘Chit-ê sī i ê kè-sêng-jîn. Lâi, lán lâi kā thâi--sí, thang tit i ê châi-sán!’

³⁹ In chiū kā i lia̍h--khí-lâi, hiat chhut-khì phû-tô-hn̂g ê gōa-bīn, kā i thâi--sí.

⁴⁰ “Án-ni, phû-tô-hn̂g ê chú-lâng tò--lâi ê sî ōe án-chóaⁿ chhú-lí hiah-ê tiān-lông?”

⁴¹ In kā Iâ-so͘ kóng, “I it-tēng ōe chiong hiah-ê pháiⁿ-lâng thiat-tóe siau-bia̍t, chiong phû-tô-hn̂g cho͘ hō͘ pa̍t-ê ōe chiàu kùi-chiat la̍p ké-chí-cho͘ ê tiān-lông.”

⁴² Iâ-so͘ kā in kóng, “Lín kiám m̄-bat tha̍k-tio̍h Sèng-keng ū kì-chài: Khí-chhù sai-hū só͘ khì-sak ê chio̍h, í-keng chiâⁿ-chòe siōng tiōng-iàu ê ki-chio̍h. Che sī Chú ê chok-ûi, tùi lán lâi khòaⁿ si̍t-chāi chin kî-biāu!

⁴³ “Só͘-í, góa kā lín kóng, Siōng-tè ōe chiong Siōng-tè-kok tùi lín chhiúⁿ--khí-lâi, kau hō͘ ōe kiat ké-chí ê lâng.

⁴⁴ Hit-ê siak lo̍h-khì chit-tè chio̍h-thâu téng ê lâng, ōe siak kah chhùi-kut-hun-si; hō͘ hit-tè chio̍h-thâu teh--tio̍h ê lâng, ōe teh kah chhùi-kô͘-kô͘.”

⁴⁵ Chiah-ê chè-si-tiúⁿ kap Hoat-lī-sài-phài ê lâng thiaⁿ-tio̍h Iâ-so͘ ê phì-jū, chai-iáⁿ I sī teh kóng in.

⁴⁶ In chiū chhē khang-phāng beh kā I lia̍h, m̄-kú kiaⁿ kûn-chiòng, in-ūi in khòaⁿ I sī sian-ti.

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan