馬太福音 18 - 現代台語譯本羅馬字版

Sím-mi̍h-lâng Siōng Tōa
( Khó 9.33-37 ; Lō͘ 9.46-48 )

¹ Hit-sî, bûn-tô͘ lâi mn̄g Iâ-so͘, “Tī Thian-kok sím-mi̍h-lâng siōng tōa?”

² Iâ-so͘ kiò chi̍t ê gín-á lâi, hō͘ i khiā tī in tiong-kan,

³ kóng, “Góa si̍t-chāi kā lín kóng, lín nā bô kái-piàn pìⁿ-chòe chhin-chhiūⁿ gín-á, choa̍t-tùi bōe-tàng ji̍p Thian-kok.

⁴ Só͘-í, lâng ka-kī khiam-pi chhin-chhiūⁿ chit-ê gín-á, chit-ê lâng tī Thian-kok chiū-sī siōng tōa.

⁵ Bô-lūn sím-mi̍h-lâng, ūi-tio̍h góa ê miâ chiap-la̍p chit-khoán gín-á chiū-sī chiap-la̍p góa.”

Ín-khí Lâng Hoān-chōe
( Khó 9.42-48 ; Lō͘ 17.1-2 )

⁶ “Bô-lūn sím-mi̍h-lâng hō͘ sìn góa ê lâng tiong-kan bî-sòe ê chi̍t ê hoān-chōe, lêng-khó hō͘ lâng ēng tōa chio̍h-bō pa̍k tī ām-kún thiām-lo̍h chhim-hái.

⁷ Chit-ê sè-kan chhám ah, in-ūi ū hō͘ lâng poa̍h-tó hoān-chōe. Hō͘ lâng hoān-chōe ê sū it-tēng ū, m̄-kú ín-khí lâng hoān-chōe ê lâng chhám ah.

⁸ “Lí ê chi̍t ki chhiú á-sī chi̍t ki kha nā hō͘ lí hoān-chōe, tio̍h kā i chām khí-lâi tàn hiat-ka̍k. Lêng-khó chi̍t-kha chi̍t-chhiú ji̍p éng-oán-oa̍h, pí siang-kha siang-chhiú hó-hó hō͘ lâng hiat-lo̍h éng-oán ê hé khah hó.

⁹ Lí ê ba̍k-chiu nā hō͘ lí hoān-chōe, tio̍h kā i ó͘ chhut-lâi tàn hiat-ka̍k. Lêng-khó kiám chi̍t lúi ba̍k-chiu ji̍p éng-oán-oa̍h, pí nn̄g lúi ba̍k-chiu hó-hó, hō͘ lâng hiat-lo̍h hé teh to̍h ê tōe-ge̍k khah hó.”

Sit-bê ê Iûⁿ ê Phì-jū
( Lō͘ 15.3-7 )

¹⁰ “Lín tio̍h kín-sīn, m̄-thang khòaⁿ-khin chiah-ê bî-sòe ê lâng ê chi̍t ê. Góa kā lín kóng, in ê thiⁿ-sài tī thiⁿ-téng sî-siông teh kìⁿ góa Thiⁿ-pē ê bīn.

¹² “Lín siūⁿ siáⁿ-khoán? Ū chi̍t ê lâng ū chi̍t-pah chiah iûⁿ, kî-tiong chi̍t chiah sit-bê, i kiám bōe chiong káu-cha̍p-káu chiah pàng tī soaⁿ-téng, khì chhē hit-chiah sit-bê--ê?

¹³ Góa si̍t-chāi kā lín kóng, i nā chhē-tio̍h hit-chiah sit-bê ê iûⁿ, it-tēng chin hoaⁿ-hí, pí ū káu-cha̍p-káu chiah bô sit-bê--ê koh-khah hoaⁿ-hí.

¹⁴ Siâng-khoán, lín ê Thiⁿ-pē m̄-kam chiah-ê bî-sòe ê lâng ê chi̍t ê bia̍t-bông.”

Án-chóaⁿ Tùi-thāi Tek-chōe Lí ê Lâng

¹⁵ “Lí ê hiaⁿ-tī á-sī chí-bē nā tek-chōe lí, tio̍h khì chhē i, kan-ta lín nn̄g lâng chòe-hé ê sî su-hā kā i chí-chhut chhò-gō͘. I nā beh thiaⁿ, chiū hôe-ho̍k lí kap i chòe hiaⁿ-tī á-sī chí-bē ê koan-hē.

¹⁶ I nā m̄ thiaⁿ, tio̍h chhōa chi̍t nn̄g ê lâng kap lí khì, án-ni ta̍k-kù ōe ū nn̄g ê á-sī saⁿ ê lâng thang choh-chèng.

¹⁷ I nā iáu m̄ thiaⁿ, tio̍h kā kàu-hōe kóng; i nā liân kàu-hōe to m̄ thiaⁿ, chiū kā i khòaⁿ-chòe Gōa-pang-lâng á-sī ba̍uh-sè--ê.”

Kìm-chí kap Ún-chún

¹⁸ “Góa si̍t-chāi kā lín kóng, lín tī tōe-chiūⁿ kìm-chí--ê, tī thiⁿ-téng mā ōe kìm-chí; lín tī tōe-chiūⁿ ún-chún--ê, tī thiⁿ-téng mā ōe ún-chún.

¹⁹ “Góa koh kā lín kóng, lín tiong-kan nā ū nn̄g ê lâng tī tōe-chiūⁿ tâng-sim-ha̍p-ì kî-kiû, góa ê Thiⁿ-pē lóng ōe kā in sêng-choân.

²⁰ In-ūi, ū nn̄g ê á-sī saⁿ ê lâng hōng góa ê miâ chū-hōe, góa chiū tī in tiong-kan.”

M̄ Sià-bián Lâng ê Po̍k-jîn ê Phì-jū

²¹ Pí-tek lâi mn̄g Iâ-so͘, “Chú ah, góa ê hiaⁿ-tī á-sī chí-bē tek-chōe góa, góa tio̍h sià-bián i kúi piàn? Kàu chhit piàn sī--bô?”

²² Iâ-so͘ kā i kóng, “M̄-sī. Góa m̄-sī kā lí kóng tio̍h kàu chhit piàn, sī tio̍h kàu chhit-cha̍p ê chhit piàn.

²³ “Án-ni, Thian-kok thang ēng chit-ê phì-jū lâi soat-bêng: Ū chi̍t ê kok-ông beh kap i ê po̍k-jîn kiat-siàu,

²⁴ i khai-sí sǹg-siàu ê sî, ū lâng chiong khiàm kúi-nā pah-bān gûn-á ê lâng chhōa-lâi i ê bīn-chêng.

²⁵ Hit-ê lâng bōe-tàng hêng, chú-lâng chiū bēng-lēng lâng chiong hit-ê lâng kap i ê bó͘-kiáⁿ í-ki̍p it-chhè só͘ ū--ê lóng khì bōe lâi hêng-chè.

²⁶ Hit-ê po̍k-jîn chiū kūi lo̍h-khì kiû kóng, ‘Chhiáⁿ hō͘ góa ān chi̍t-ē, góa ōe lóng hêng.’

²⁷ Po̍k-jîn ê chú-lâng chiū khó-lîn i, chhat-siau i ê chè, pàng i khì.

²⁸ “Hit-ê po̍k-jîn chhut--khì, tú-tio̍h chi̍t ê pîⁿ-pîⁿ chòe po̍k-jîn--ê, hit-ê lâng chí-ū khiàm i kúi ê gûn-á, chiū kā i lia̍h--teh, tīⁿ i ê ām-kún, kóng, ‘Lí só͘ khiàm--ê, lóng tio̍h hêng!’

²⁹ Pîⁿ-pîⁿ chòe po̍k-jîn--ê kūi lo̍h-khì kiû i kóng, ‘Pài-thok hō͘ góa ān chi̍t-ē, góa ōe lóng hêng.’

³⁰ I m̄-khéng, tian-tò chiong chit-ê lâng koaiⁿ-lo̍h kaⁿ, koaiⁿ kàu só͘ khiàm--ê lóng hêng chheng-chhó.

³¹ Lēng-gōa pîⁿ-pîⁿ chòe po̍k-jîn--ê khòaⁿ--tio̍h, hui-siông thòng-sim, chiū chiong só͘ hoat-seng it-chhè ê tāi-chì khì kā chú-lâng pò-kò.

³² Chú-lâng chiū kiò hit-ê po̍k-jîn lâi, tùi i kóng, ‘Lí chit-ê pháiⁿ po̍k-jîn, in-ūi lí tùi góa kiû, góa chiū chiong lí só͘ khiàm ê chè lóng chhat-siau.

³³ Góa ū lîn-bín lí, lí kiám m̄ eng-kai chhin-chhiūⁿ án-ni lîn-bín hit-ê pîⁿ-pîⁿ chòe po̍k-jîn--ê?’

³⁴ I ê chú-lâng chin siū-khì, chiū kā i koaiⁿ-lo̍h kaⁿ siū-hêng, koaiⁿ kàu i chiong it-chhè ê chè-bū lóng hêng chheng-chhó.

³⁵ “Lín ta̍k-ê lâng nā bô tùi sim-tóe sià-bián ka-kī ê hiaⁿ-tī á-sī chí-bē, góa ê Thiⁿ-pē mā ōe án-ni tùi-thāi lín, bōe kā lín sià-bián.”

« Roimhe

Air adhart »

The Bible Society in Taiwan

Bible Society in Taiwan

Lean sinn:

Ceanglaichean taic

Sanasan